EC က ဘာဗေးရီးယမ်း နော်ဒစ်၏ မျောက်ကျောက်ကာကွယ်ဆေးကို သုံးခွင့် ပြု
အော်စလို၊ ဇူလိုင် ၂၅ ရက်
ဒိန်းမတ် ဇီဝနည်းပညာကုမ္ပဏီ ဘာဗေးရီးယမ်း နော်ဒစ် ကို ၎င်း၏ အင်ဗန်နက်စ် အမည်ရ ရေကျောက်ရောဂါ ကာကွယ်ဆေးအားမျောက်ကျောက်ရောဂါကာကွယ်ဆေးအဖြစ်ဈေးကွက်သို့ တင်ပို့ရောင်းချရန် ဥရောပကော်မရှင်(EC)ကခွင့်ပြုလိုက်ပြီဖြစ်ကြောင်း ဇူလိုင်လ ၂၅ ရက် တနင်္လာနေ့တွင် ပြောကြားခဲ့သည်။
ကမ္ဘာ့ကျန်းမာရေးအဖွဲ့ (WHO)က လျင်မြန်စွာ ပြန့်ပွားနေသော မျောက်ကျောက်ရောဂါဖြစ်ပွားမှုကို ကမ္ဘာလုံးဆိုင်ရာ ကျန်းမာရေးအခြေအနေအဖြစ် ကြေငြာပြီးနောက်ပိုင်း အဆိုပါ ခွင့်ပြုချက်ထွက်ပေါ်လာခြင်း ဖြစ်သည်။
အမေရိကနှင့် ကနေဒါနိုင်ငံများတွင် မျောက်ကျောက်ရောဂါ ကာကွယ်ရေးအတွက် တစ်ခုတည်းသော ခွင့်ပြုချက်ရရှိထားသည့် ဘာဗေးရီးယမ်း၏ ကာကွယ်ဆေးသည် အထက်ပါ ခွင့်ပြုချက်မရမီအချိန်ထိ ဥရောပတွင် ရေကျောက်ရောဂါ ကုသရန်အတွက်သာ အတည်ပြုထားခဲ့ခြင်းဖြစ်သည်။
သို့ရာတွင် ၎င်းကုမ္ပဏီသည် မျောက်ကျောက်ရောဂါ ဖြစ်ပွားနေချိန်အတွင်း ဥရောပနိုင်ငံအများအပြားသို့ မိမိနိုင်ငံတွင် ခွင့်ပြုချက်မရသေးသောကာကွယ်ဆေးအဖြစ် တင်ပို့ရောင်းချခဲ့သည်။
အဆိုပါခွင့်ပြုချက်အရ ဥရောပသမဂ္ဂအဖွဲ့ဝင်နိုင်ငံအားလုံးအပြင် အိုက်စလန်၊ လစ်ချ်တင်စတိန်းနှင့် နော်ဝေးတို့တွင် မိမိတို့ကုမ္ပဏီ၏ ကာကွယ်ဆေးကို တရားဝင် အသုံးပြုခွင့် ပေးလိုက်ပြီဖြစ်ကြောင်း ဘာဗေးရီးယမ်း နော်ဒစ် က ထုတ်ပြန်ချက်တွင် ဖော်ပြထားသည်။
အင်ဗန်နက်စ် ကာကွယ်ဆေးသည် လွန်ခဲ့သည့် ဆယ်စုနှစ် နှစ်စုအတွင်း အမေရိကန်အစိုးရထံမှ ကြီးမားသောရင်းနှီးမြှုပ်နှံမှုများမှတစ်ဆင့် ယခုကဲ့သို့ ဖွံ့ဖြိုးတိုးတက်ခဲ့ကြောင်း ကုမ္ပဏီက ပြောကြားခဲ့သည်။
ဘာဗေးရီးယမ်း ၏ရှယ်ယာစျေးနှုန်းသည် ကုမ္ပဏီ၏ မျောက်ကျောက်ရောဂါ ကာကွယ်ဆေးကို ဝယ်လိုအားများပြားခဲ့သောကြောင့် ပြီးခဲ့သည့်သုံးလအတွင်း ၁၂၂ ရာခိုင်နှုန်း မြင့်တက်ခဲ့သည်။
Source: Reuters
