အင်ဒိုနီးရှား၏ဂဠုန်ဒိုင်း ပူးတွဲစစ်ရေးလေ့ကျင့်မှုတွင် ဂျပန်ကာကွယ်ရေး တပ်ဖွဲ့ပါဝင်မည်
တိုကျို၊ ဇူလိုင် ၂၇ ရက်
ဂျပန်ကာကွယ်ရးတပ်ဖွဲ့များသည် လာမည့်လတွင် အင်ဒိုနီးရှားနိုင်ငံ၌ ပြုလုပ်မည့်စစ်ရေးလေ့ကျင့်မှုတွင် ပထမဆုံးအကြိမ် ပါဝင်သွားမည် ဖြစ်ကြောင်း အင်ဒိုနီးရှားသမ္မတ ဂျိုကိုဝီဒိုဒိုနှင် တွေ့ဆုံဆွေးနွေးမှုအပြီး ဂျပန်ဝန်ကြီးချုပ် ဖူမီယို ကီရှီဒါက ဇူလိုင်လ ၂၇ ရက် ဗုဒ္ဓဟူးနေ့တွင် ပြောကြားခဲ့သည်။
ခေါင်းဆောင်နှစ်ဦးသည် ယခုနှစ်အတွင်း ၎င်းတို့၏ ဒုတိယအကြိမ်တွေ့ဆုံမှုဖြစ်သည့် အဆိုပါ အစည်းအဝေးတွင် စွမ်းအင်ဆိုင်ရာ ကိစ္စရပ်များကိုလည်း ပိုမိုနီးကပ်စွာ ပူးပေါင်းဆောင်ရွက်သွားရန် သဘောတူညီခဲ့ကြပြီး ကီရှီဒါက အင်ဒိုနီးရှားသည် ဂျပန်အတွက် ပြီးပြည့်စုံသော မဟာဗျူဟာမြောက် မိတ်ဖက်ဖြစ်ကြောင်း ပြောကြားခဲ့သည်။
အမေရိက၊ ဩစတြေးလျနှင့် အခြားနိုင်ငံများနှင့်အတူ အင်ဒိုနီးရှား၌ ဩဂုတ်လ ၁ ရက်နေ့တွင် စတင်ကျင်းပမည်ဖြစ်သော ဂဠုန်ဒိုင်း အမည်ရ ပူးတွဲစစ်ရေးလေ့ကျင့်မှုတွင် ဂျပန်ကာကွယ်ရေးတပ်ဖွဲ့များ ပါဝင်သွားမည်ဖြစ်ကြောင်း ၎င်းက ပြောကြားခဲ့သည်။
အင်ဒိုနီးရှားနှင့် အမေရိကန်နိုင်ငံတို့ကြား နှစ်စဉ် ပုံမှန်ပြုနေသည့် စစ်ရေးလေ့ကျင့်မှုများသည် ပြီးခဲ့သည့် နှစ်များထက် ပို၍ သိသိသာသာ ကြီးမားကျယ်ပြန့်လာမည်ဖြစ်သည်ဟု အမေရိကန်က ဆိုသည်။
ယင်းကဲ့သို့ ဂျပန်နိုင်ငံမှ ပါဝင်လာမှုသည် ဝါရှင်တန်နှင့် ၎င်း၏ ဒေသတွင်း မဟာမိတ်များက အင်ဒို-ပစိဖိတ်ဒေသ၌ တရုတ်၏ ဩဇာလွှမ်းမိုးမှု ကြီးမားလာမှုအပေါ် တန်ပြန်ရန် ကြိုးပမ်းမှုများ အရှိန်မြှင့်တင်နေချိန်တွင် ပေါ်ပေါက်လာခြင်းဖြစ်သည်။
ထို့အပြင် ဂျပန်နိုင်ငံသည် အင်ဒိုနီးရှားအစိုးရအား အခြေခံအဆောက်အဦး စီမံကိန်းများနှင့် သဘာဝဘေးအန္တရာယ် ကြိုတင်ကာကွယ်ရေး လုပ်ငန်းစဉ်များအတွက် အမေရိကန်ဒေါ်လာ ၃၁၈ သန်း ချေးပေးမည်ဖြစ်ကြောင်း ကီရှီဒါက ပြောကြားသည်။
အင်ဒိုနီးရှားနိုင်ငံသည် ၂၀၂၀ ပြည့်နှစ်တွင် ဂျပန်နိုင်ငံသို့ ကုန်ကြမ်းပစ္စည်းများ တင်ပို့မှု စုစုပေါင်း အမေရိကန် ဒေါ်လာ ၁၄ ဒသမ ၅ ဘီလီယံ အထိရှိလာပြီး ဂျပန်နိုင်ငံ၏ ၁၂ ကြိမ်မြောက် အကြီးဆုံးပို့ကုန်ဈေးကွက် ဖြစ်လာသည်။
Source: CNA
