ကိုဗစ်မျိုးကွဲများ ကူးစက်မှုများလာသဖြင့် ဒေသဆိုင်ရာ အာဏာပိုင်များက ကိုင်တွယ်ဖြေရှင်းရန် ဂျပန်အစိုးရတိုက်တွန်း

ကိုဗစ်မျိုးကွဲများ ကူးစက်မှုများလာသဖြင့် ဒေသဆိုင်ရာ အာဏာပိုင်များက ကိုင်တွယ်ဖြေရှင်းရန် ဂျပန်အစိုးရတိုက်တွန်း

တိုကျို၊ ဇူလိုင် ၂၉ ရက်

ဂျပန်နိုင်ငံသည် ကိုဗစ်-၁၉ ကပ်ရောဂါမျိုးကွဲသစ်များ၏ ပျံ့နှံ့မှုကြောင့် ကူးစက်သူများ စံချိန်တင်မြင့်တက်လာ၍ တိုက်ဖျက်‌ေရးအစီအမံများလုပ်ဆောင်ရန် ဒေသဆိုင်ရာ အာဏာပိုင်များကို တိုက်တွန်းအားပေးနေသော်လည်း တစ်နိုင်ငံလုံးအတိုင်းအတာဖြင့် မည်သည့်အစီအမံကိုမျှ ပြုလုပ်ရန် အစီအစဉ် မရှိသေးကြောင်း သိရသည်။

ဂျပန်နိုင်ငံ၌ ကိုဗစ်-၁၉ ကပ်ရောဂါ၏ သတ္တမလှိုင်းဖြစ်သည့် ကူးစက်မြန် ဗိုင်းရပ်စ် BA.5 မျိုးကွဲ ပျံ့နှံ့မှုကြောင့် ရောဂါကူးစက်သူများ နေ့စဉ်နှင့်အမျှများပြားလာကာ ကြာဿပတေးနေ့တွင် စံချိန်တင်ကာ ကူးစက်သူ စုစုပေါင်း ၂ သိန်း ၃ သောင်းကျော် ရှိလာပြီဖြစ်သည်။ ထို့ကြောင့် ဆေးဘက်ဆိုင်ရာ ဌာနများသည် ဖိအားများလာပြီး အချို့နေရာများ၌ ကုမ္ပဏီလုပ်ငန်းများကိုပါ အနှောင့်အယှက် ဖြစ်လာသည်။

ဂျပန်နိုင်ငံသည် အခြားနိုင်ငံများနှင့် ယှဉ်လျှင် မည်သည့်အခါကမျှ တစ်နိုင်ငံလုံးအတိုင်းအတာဖြင့် အသွားအလာ ပိတ်ဆို့ခြင်းကိုမလုပ်ခဲ့ပေ။ သို့သော်ပြည်သူများအား အိမ်တွင်း၌ အတတ်နိုင်ဆုံး နေကြရန်နှင့် စားသောက်ဆိုင်များနှင့် ဘားများ၏ ဖွင့်ချိန်ကို ကန့်သတ်ပေးရန် အခါအားလျော်စွာ တောင်းဆိုခဲ့သည်။

အစိုးရအဖွဲ့ ဒုတိယအတွင်းဝန် ဆဲဂျီ ကီဟာရာက ဒေသဆိုင်ရာ အာဏာပိုင်များသည် ၎င်းတို့၏ ဒေသအတွင်း ဖြစ်နေသော ကိုရိုနာဗိုင်းရပ် ပျံ့နှံ့မှု အခြေအနေများနှင့် ပြန်လည်တုံ့ပြန်မှုများကို အံဝင်ခွင်ကျဖြစ်အောင် လုပ်ဆောင်သင့်သည်ဟု ဇူလိုင်လ ၂၉ ရက် သောကြာနေ့တွင် ထပ်လောင်းပြောကြားခဲ့သည်။

“တစ်နိုင်ငံလုံးအတိုင်းအတာဖြင့် စီမံချက်ချပြီး တုန့်ပြန်တာထက် ဒေသဆိုင်ရာ အာဏာပိုင်တွေကို သူတို့ ဒေသမှာဖြစ်ပေါ်နေတဲ့ အခြေအနေတွေ အလိုက် တိုက်ဖျက်ဖို့ ကြိုးစားရာမှာ ကျွန်တော်တို့ ပံ့ပိုးကူညီချင်ပါတယ်” ဟု ကီဟာရာက ပုံမှန် သတင်းစာရှင်းလင်းပွဲတွင် ပြောကြားခဲ့သည်။

“အရေးကြီးတာက စီရင်စုနယ်တစ်ခုစီရဲ့ လူမှုရေးနဲ့ စီးပွားရေးဆိုင်ရာ လုပ်ဆောင်ချက်တွေမှာ ကူညီဖို့ပါပဲ” ၎င်းက ဆိုသည်။

အိုဆာကာမြို့အနောက်ပိုင်းရှိ သက်ကြီးရွယ်အိုများအား မလိုအပ်ဘဲ အပြင်ထွက်ခြင်းကို ရှောင်ကြဉ်ရန် မကြာသေးမီက တိုက်တွန်းခဲ့သည်။

ဂျပန်နိုင်ငံသည် ကိုဗစ်ရောဂါ စတင်ဖြစ်ပွားချိန်မှစ၍ သေဆုံးသူဦးရေ ၃၂,၃၀၈ သာရှိသဖြင့် အချို့နိုင်ငံကြီးများနှင့် ယှဉ်လျှင် အဆိုပါ ကပ်ရောဂါကို ကိုင်တွယ်ဖြေရှင်းရာ၌ ပိုမိုကောင်းမွန်နေသော်လည်း ယခုသီတင်းပတ်အတွင်း ကမ္ဘာပေါ်တွင် ကိုရိုနာဗိုင်းရပ်ကူးစက်မှု အမြင့်ဆုံးနိုင်ငံအဖြစ် ကမ္ဘာ့ကျန်းမာရေးအဖွဲ့က ထုတ်ပြန်ထားသည်။

Source: Reuters