ကျပ်ဘီလီယံ ၄၀၀ ကို ရန်ပုံငွေထူ ထောင်ပြီး တိုင်းပြည်စီးပွားရေး တိုးတက်အောင်လုပ် မည်
နေပြည်တော်၊သြဂုတ် ၁
လာမည့် (၆) လတာ ကာလအတွင်း တိုင်းပြည်၏ စီးပွား ရေးအခြေအနေ တိုးတက်လာအောင် ပြည်တွင်းအင်အားများဖြင့် လုပ်ဆောင်မည်ဖြစ်ကြောင်း နိုင်ငံတော် ဝန်ကြီး ချုပ် ဗိုလ်ချုပ်မှူးကြီး မင်းအောင်လှိုင်က ပြောကြားလိုက် သည်။
ဩဂုတ်လ (၁) ရက် နံနက်ပိုင်းက ပြည်သူသို့ ပြောကြားသည့် မိန့်ခွန်းတွင် ထည့်သွင်းပြောကြားခဲ့ခြင်းဖြစ်သည်။
” ကျွန်တော်ထင်ပါတယ်။ ၆ လအတွင်း တိုးတက်မှုရပါလိမ့်မယ်။ အလုပ် အကိုင် အခွင့်အလမ်းများစွာပေါ်လာမယ်၊ အလုပ်လုပ်သူတိုင်းဝင်ငွေရလာမယ်၊ ဝယ်လိုအားတိုးတက်လာမယ်၊ ရောင်းကုန်ပစ္စည်းများတိုးတက်လာတဲ့အတွက် တိုင်းပြည်ဝင်ငွေ ပိုမိုတိုး တက်လာပါမယ်၊ တိုင်း ပြည်ရဲ့အားဟာ ပြည်တွင်းမှာသာရှိပါ တယ်၊ တိုင်းပြည်အားနဲ့ တိုင်းပြည်တိုးတက်အောင် လုပ်ကြရပါမယ်” ဟု ဗိုလ်ချုပ်မှူးကြီး မင်းအောင်လှိုင်က ပြောသည်။
လက်ရှိတွင် နိုင်ငံ၏ စီးပွားရေး ဖွံ့ဖြိုးတိုးတက်လာရန်အတွက် စီးပွားရေးဦးတည်ချက်(၃)ရပ်ကို အခြေခံ မူဝါဒများ ချမှတ်ကာ ဦးစားပေးအစီအစဉ်အတိုင်း ဆောင်ရွက်လျက်ရှိကြောင်းလည်း ၎င်းကပြောသည်။
ပြီးခဲ့သည့် နှစ်များအတွင်း ကိုဗစ်-၁၉ ကပ်ရောဂါကြောင့် ထိခိုက်ခဲ့သည့် စီးပွားရေး လုပ်ငန်းများ ပြန်လည်နလံထလာစေရန် ချေးငွေများထုတ်ပေးသော်လည်း အကြောင်းအမျိုးမျိုးကြောင့် သိသာသည့် တိုးတက်မှုများမရသေးသည့်အတွက် ကုန်ထုတ်လုပ်မှုကို ဦးစားပေးအနေဖြင့် ဦး စားပေး လုပ်ဆောင်သွားမည်ဖြစ်ကြောင်းလည်း ထည့် သွင်း ပြောကြားခဲ့သည်။
ယင်းသို့ဆောင်ရွက်ရန်အတွက် ကိုဗစ်ရန်ပုံငွေ လက်ကျန် ၄၉၁ ဒသမ ၁၈ ဘီလီယံမှ ကျပ်ဘီလီယံ ၄၀၀ ကို စီးပွား ရေးဖွံ့ဖြိုးတိုးတက်မှုအတွက် သီးသန့်ရန်ပုံငွေ တစ်ရပ်ထူ ထောင်ပြီး ဆောင်ရွက်ပေးသွားမည်ဖြစ်ကြောင်း သိရသည်။
အဆိုပါ ရံပုံငွေများအား ပထမ ဦးစားပေးအနေဖြင့် စိုက် ပျိုးရေးနှင့် မွေးမြူရေး ကဏ္ဍကို ဆောင်ရွက်မည် ဖြစ်ပြီး ဒုတိယ ဦးစားပေးအနေဖြင့် အဆိုပါ ကဏ္ဍမှ ထွက်ကုန်များကို ကုန်ချောအဖြစ်ဆောင်ရွက်မည့် စက်ရုံ၊ အလုပ်ရုံများ အဆင့်မြှင့်တင်ရေး၊ SME မှာ အကျုံးဝင်မည့်စက်ရုံများတည်ထောင်ရေးကို ထောက်ပံ့ဆောင်ရွက်သွားမည် ဖြစ်ကြောင်း သိရသည်။
နစက အစိုးရ တာဝန်ယူသည့် ကာလအတွင်း ကုန်သွယ်မှုပိုငွေ အနေဖြင့် ၂၀၂၁ ခုနှစ်၊ ဖေဖော်ဝါရီလမှစ၍ ၂၀၂၂ ခုနှစ် မေလအထိ အမေရိကန်ဒေါ်လာ ၁ ဒသမ ၁၄ ဘီလီယံရရှိခဲ့ပြီး နိုင်ငံအတွက် ဝင်ငွေများရရှိအောင်ပြည်တွင်း ထွက်ကုန်များကို ပြည်ပသို့ ကုန်ကြမ်းတင်ပို့ခြင်းထက် ကုန်ချောတင်ပို့နိုင်ရေးကို ဦးစားပေးလုပ်ဆောင် လျက်ရှိကြောင်း နိုင်ငံတော် ဝန်ကြီးချုပ်က ထည့်သွင်း ပြောကြားသွားသည်။
