စင်္ကာပူ ခေါင်းဆောင်များနှင့် နန်စီပေလိုစီ တွေ့ဆုံ
စင်္ကာပူ၊ ဩဂုတ် ၁ ရက်
အမေရိကန် အောက်လွှတ်တော် ဥက္ကဌ နန်စီ ပေလိုစီ ဦးဆောင်သော အမေရိကန် ကိုယ်စားလှယ်အဖွဲ့သည် အာရှခရီးစဉ်၏ တစ်စိတ်တစ်ပိုင်းအဖြစ် ဩဂုတ်လ ၁ ရက် တနင်္လာနေ့တွင် စင်္ကာပူနိုင်ငံသို့ သွားရောက်ကာ သမ္မတ ဟာလီမာ ယာကော့ဘ် အပါအဝင် အခြားခေါင်းဆောင်များနှင့်ပါ တွေ့ဆုံခဲ့ကြောင်း သိရသည်။
နှစ်ဖက်စလုံးက စင်ကာပူနှင့် အမေရိကန်တို့ကြား ကောင်းမွန်ပြီး ရေရှည်တည်တံ့သော မိတ်ဖက်ဆက်ဆံရေးကို ဆက်လက်ထိန်းသိမ်းသွားရန် အတည်ပြုခဲ့ကြောင်း စင်္ကာပူနိုင်ငံခြားရေးဝန်ကြီးဌာန (MFA) က သတင်းထုတ်ပြန်ချက်တစ်ခုတွင် ပြောကြားခဲ့သည်။
၎င်းတို့သည် နှစ်နိုင်ငံကြား ပညာရေးအရလည်းကောင်း ပြည်သူချင်း နီးကပ်စွာ ထိတွေ့ဆက်ဆံရေးနှင့် ပတ်သက်၍လည်းကောင်း ဆွေးနွေးခဲ့ပြီး ရာသီဥတုဖောက်ပြန်ခြင်းကဲ့သို့သော ကြိုတင်ေမျှာ်ေတွးထားရမည့် နယ်ပယ်သစ်များတွင် နှစ်နိုင်ငံ ပူးပေါင်းဆောင်ရွက်မှုများကို တိုးချဲ့သွားရန် သဘောတူညီခဲ့ကြောင်း MFA ကပြောကြားခဲ့သည်။
မစ္စ ပေလိုစီနှင့် ကိုယ်စားလှယ်အဖွဲ့သည် ဝန်ကြီးချုပ် လီရှန်လွန်းနှင့် နိုင်ငံခြားရေးဝန်ကြီး ဗီဗီယန် ဘာလာခရစ်ရှ်နန် တို့ကို နိုင်ငံရပ်ခြားမှ ဂုဏ်သရေရှိ ဧည့်သည်တော်များကို ဧည့်ခံသည့် အီစတာနာ အစိုးရပိုင်ရုံးတွင် တွေ့ဆုံခဲ့ကြောင်း သိရသည်။
အမေရိကန် လွှတ်တော်ကိုယ်စားလှယ်အဖွဲ့မှ ဖော်ပြခဲ့သည့် စင်ကာပူဒေသတွင်း ပြုလုပ်မည့် အမေရိက၏ ခိုင်မာသော ထိတွေ့ဆက်ဆံရေး ကတိကဝတ်ကို မစ္စတာလီက သဘောတူညီခဲ့ကြောင်း MFA က ပြောကြားခဲ့သည်။
နှစ်ဖက်စလုံးသည် အင်ဒို-ပစိဖိတ်စီးပွားရေးမူဘောင်ကဲ့သို့သော အစီအစဉ်များမှတစ်ဆင့် ဒေသတွင်း၌ ဝါရှင်တန်၏ စီးပွားရေးအရ ထိတွေဆက်ဆံမှုများ ပိုမိုခိုင်မာလာစေမည့် နည်းလမ်းများကို ဆွေးနွေးခဲ့ကြောင်း MFA က ထည့်သွင်းပြောကြားခဲ့သည်။
ထို့အပြင် မစ္စတာလီနှင့် ကိုယ်စားလှယ်အဖွဲ့သည် ယူကရိန်းအရေးအခင်း၊ ရေလက်ကြားဖြတ်ကျော် ဆက်ဆံရေး၊ ရာသီဥတုပြောင်းလဲမှု အပါအဝင် နိုင်ငံတကာနှင့် ဒေသတွင်း ဖွံ့ဖြိုးတိုးတက်မှုများအပေါ် အမြင်ချင်းဖလှယ် ဆွေးနွေးခဲ့ကြသည်။
ဒေသတွင်း ငြိမ်းချမ်းရေးနှင့် လုံခြုံရေးအတွက် အမေရိက-တရုတ်ဆက်ဆံရေး တည်ငြိမ်ေရးသည်လည်း အရေးကြီးကြောင်းကို မစ္စတာလီက အေလးပေးပြောကြားသွားသည်ဟု MFA က ဆိုသည်။
ပေလိုစီသည် ဒုတိယဝန်ကြီးချုပ် လော့ရမ့် ဝေါင်၊ ဝါရင့် ဝန်ကြီးတီအို ချီဟင်နှင့် လူမှုရေး မူဝါဒရေးရာ ညှိနှိုင်းရေး ဝန်ကြီး တာမန် ရှန်မူဂရတ်နမ်တို့နှင့်လည်း ဆွေးနွေးမှု ပြုလုပ်ခဲ့ကြောင်း သိရသည်။
Source: CNA
