တရုတ်တိုက်လေယာဉ်များပျံနေ၍ ထိုင်ဝမ်ဂျက်များ အရေးပေါ်တက်ခဲ့ရ

တရုတ်တိုက်လေယာဉ်များပျံနေ၍ ထိုင်ဝမ်ဂျက်များ အရေးပေါ်တက်ခဲ့ရ

တိုင်ပေ၊ဩဂုတ် ၃

ထိုင်ဝမ်သည် ၎င်းလေပိုင်နက်အနားကပ်လာသည့် တရုတ်လေယာဉ် ၂၇ စင်းအားသတိပေးရန် ဂျက်လေယာဉ်များ အရေးပေါ်တက်ခဲ့ရကြောင်း ဩဂုတ် ၃ ရက်နေ့၌ ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့သည်။တရုတ်နှင့်ထိုင်ဝမ်တင်းမာမှုမြင့်တက်နေချိန်တွင် အဆိုပါလေယာဉ် ၂၇ စင်းထဲမှ ၂၂ စင်းသည် နှစ်နိုင်ငံကြားမျဉ်းကိုဖြတ်ကျော်ပျံသန်းခဲ့ကြသည်ဟုဆိုသည်။

တရုတ်သည် အမေရိကန်အောက်လွှတ်တော်ဥက္ကဌ နန်စီပေလိုစီလာရောက်မှုအပေါ်မကျေနပ်သဖြင့် ထိုင်ဝမ်နားတစ်ဝိုက်စစ်ရေးလေ့ကျင့်မှုကိုပြုလုပ်ခဲ့ခြင်းဖြစ်သည်။ထို့ပြင် ပေကျင်းရှိအမေရိကန်သံအမတ်ကိုလည်းဆင့်ခေါ်တွေ့ဆုံခဲ့ပြီး ထိုင်ဝမ်မှ လယ်ယာထွက်ကုန်တင်သွင်းမှုကိုလည်းပိတ်ပင်ခဲ့သည်။

ယခုအချိန်၌ ထိလွယ်ရှလွယ်ဖြစ်နေသည့် တရုတ် – ထိုင်ဝမ်တင်းမာမှုနောက်ဆုံးအခြေအနေတွင် ထိုင်ဝမ်က တရုတ်၏လှုပ်ရှားမှုများကို စောင့်ကြည့်ရန် ၎င်း၏လေကြောင်းရန်ကာကွယ်ရေးဇုန် သို့ လေယာဉ်များကို စေလွှတ်ကာ ဒုံးကျည်စနစ်များကိုဖြန့်ကြက်ထားကြောင်းလည်းပြောကြားခဲ့သည်။

ထိုင်ဝမ်နားတစ်ဝိုက်တွင် တရုတ်ကယခုကဲ့သို့အယောင်ပြစစ်ရေးလေ့ကျင့်မှုများကိုပြုလုပ်ခဲ့သည်မှာ ယခုတစ်ကြိမ်တည်းမဟုတ်ဟုထိုင်ဝမ်ကဆိုသည်။နောက်ဆုံးအကြိမ်တရုတ်၏ စစ်ရေးလေ့ကျင့်မှုတွင် Su 30 တိုက်လေယာဉ် ၁၆ စင်းနှင့် ဂျက်လေယာဉ် ၁၁ စီးပါဝင်သည်ဟုဆိုသည်။

တရုတ်လေယာဉ် ၂၂ စင်းသည် နှစ်နိုင်ငံကြားအလယ်မျဉ်းကိုဖြတ်ကာ ထိုင်ဝမ်လေပိုင်နက်နှင့်အနီးဆုံးအထိ ပျံသန်းခဲ့သည်ဟု ထိုင်ဝမ်လုံခြုံရေးအစီစဉ်နှင့် နီးစပ်သူကရိုက်တာသတင်းဌာန သို့ပြောသည်။ပုံမှန်တွင် နှစ်ဖက်လေယာဉ်များသည် အလယ်မျဉ်းကိုပင်ကျော်၍ပျံလေ့မရှိဟု၎င်းကဆိုသည်။

ယခုသီတင်းပတ်အတွင်း တရုတ်၏ စစ်ရေးလေ့ကျင့်မှုအချို့သည် ထိုင်ဝမ်၏ ရေမိုင် ၁၂ မိုင်အကွာ ပင်လယ်ပြင်နှင့် လေကြောင်းပိုင်နက်အတွင်း ပြုလုပ်ရန်ရှိပြီး ထိုင်ဝမ်၏ ပင်လယ်ပြင်နှင့် လေကြောင်းပိတ်ဆို့ခြင်းပမာဏသည်မကြုံစဖူးများပြားသည်ဟု ဗုဒ္ဓဟူးနေ့အစောပိုင်းက ထိုင်ဝမ်အကြီးတန်း ကာကွယ်ရေးအရာရှိတစ်ဦးက ပြောကြားခဲ့သည်။

တရုတ်နိုင်ငံသည် ထိုင်ဝမ်အား ၎င်း၏အုပ်ချုပ်မှုကို လက်ခံရန် တွန်းအားပေးသည့်အနေဖြင့် စစ်ရေးနှင့် နိုင်ငံရေးဖိအားများကို အရှိန်မြှင့်လိုက်သော်လည်းထိုင်ဝမ်သည် တရုတ်၏ တောင်းဆိုမှုကိုပယ်ချကာ မိမိကိုယ်ကို ခုခံကာကွယ်သွားမည်ဟုသာ ကတိပြုထားခဲ့သည်။

Source – Reuters/ic