တရုတ်-အာဆီယံ ဆက်ဆံရေးခိုင်မာစေရန်ကတိပြု
ဖနွမ်းပင်၊ဩဂုတ် ၅
အာဆီယံ-တရုတ် ဝန်ကြီးများအဆင့် အစည်းအဝေးတွင် တရုတ်နှင့်အာဆီယံအသိုင်းအဝိုင်းတို့သည် ဆက်ဆံရေးခိုင်မာစေရန် ကတိပြုခဲ့ကြပြီး ဒေသတွင်း ငြိမ်းချမ်းရေးနှင့် တည်ငြိမ်ရေးကို ထိန်းသိမ်းရန်လည်းတောင်းဆိုခဲ့ကြသည်။
အာဆီယံအစည်းအဝေးများမှ တားမြစ်ခြင်းခံထားရသော မြန်မာနိုင်ငံကိုယ်စား ကမ္ဘောဒီးယားနိုင်ငံခြားရေးဝန်ကြီး ပရပ်ဆွန်ခွန်း နှင့် တရုတ်နိုင်ငံခြားရေးဝန်ကြီး ဝမ်ယိ တို့ကဥက္ကဋ္ဌအဖြစ်ဆောင်ရွက်ခဲ့ကြသည်။
မကြာသေးမီနှစ်များအတွင်း တရုတ်နှင့်အာဆီယံနိုင်ငံများ ပူးပေါင်းဆောင်ရွက်မှု အားကောင်းလာပုံကို ဝမ်ကအဖွင့်အမှာစကားတွင် ထည့်သွင်းပြောကြားခဲ့သည်။အမေရိကန်အောက်လွှတ်တော်ဥက္ကဋ္ဌ နန်စီပေလိုစီ၏ ထိုင်ဝမ်ခရီးစဉ်အပြီး ဒေသတွင်း တင်းမာမှုများ မြင့်တက်နေချိန်တွင် အစည်းအဝေးများကိုကျင်းပခဲ့ခြင်းဖြစ်သည်။
“နိုင်ငံတကာရဲ့ လုံခြုံရေးအခြေအနေတွေရုန်းရင်းဆန်ခတ်ဖြစ်မှုေတွနဲ့ ရင်ဆိုင်နေရချိန်မှာ အိုအေစစ်နဲ့တူတဲ့ ငြိမ်းချမ်းရေးဆိုတဲ့အရာကို ကျွန်တော်တို့ကာကွယ် စောင့်ရှောက်ထားပြီးသားပါ” ဟု လည်းမစ္စတာဝမ်ယိကဆိုခဲ့သည်။
တရုတ်နိုင်ငံအနေဖြင့် “တိုးတက်မှုမြင့်မားရေး၊ဖွံ့ဖြိုးတိုးတက်မှုပုံစံသစ်တည်ဆောက်ရေး၊ဒေသတွင်းနှင့် ကမ္ဘာ့စီးပွားရေး ပြန်လည်ဦးမော့လာစေရန်နှင့် ဖွံ့ဖြိုးတိုးတက်မှုအတွက် အရှိန်အဟုန်မြှင့်တင်ရေး နှင့် အာဆီယံနိုင်ငံများအတွက် ဖွံ့ဖြိုးတိုးတက်မှုဆိုင်ရာအခွင့်အလမ်းများကို ပိုမိုပံ့ပိုးပေးနိုင်ရန် ဆက်လက်ကြိုးပမ်းသွားမည်” ဟုကတိပြုခဲ့သည်။
မစ္စတာဝမ်ယိနှင့်သီးသန့်တွေ့ဆုံစဉ် ဆွန်ခွန်းသည် ဟောင်ကောင်၊ ထိုင်ဝမ်၊ တိဗက်အပါအဝင် ရှင်ကျန်းတို့နှင့်ပတ်သက်သည့် ကိစ္စရပ်များသည် ပြည်တွင်းရေးရာကိစ္စဖြစ်ကာ တရုတ်ပြည်သူ့သမ္မတနိုင်ငံ၏ အချုပ်အခြာအာဏာအောက်တွင်သာ ထည့်သွင်းစဉ်းစားရန် ကမ္ဘောဒီးယားအစိုးရက ခိုင်မာသောရပ်တည်ချက်ရှိကြောင်းကို အလေးပေးဖော်ပြခဲ့သည်။
နှစ်နိုင်ငံနိုင်ငံခြားရေး၀န်ကြီးများသည် ၎င်းတို့နှစ်နိုင်ငံအကြား ‘တိုးတက်သော ဆက်ဆံရေး နှင့် နယ်ပယ်အသီးသီးတွင် အကျိုးဖြစ်ထွန်းသည့် ပူးပေါင်းဆောင်ရွက်မှုများ’ အတွက် အားရကျေနပ်ကြောင်း ထုတ်ဖော် ပြောကြားခဲ့ကြသည်။
လာမည့်နှစ်၌ နှစ်နိုင်ငံသံတမန်ဆက်ဆံရေး ထူထောင်ခြင်း ၆၅ နှစ်မြောက် နှစ်ပတ်လည်နေ့ အထိမ်းအမှတ်လှုပ်ရှားမှုများနှင့်ပတ်သက်၍လည်း ခေါင်းဆောင်များကဆွေးနွေးခဲ့ကြသည်။
ထို့ပြင် ဒေသတွင်းနှင့်နိုင်ငံတကာဖိုရမ်များတွင် အပြန်အလှန်ဆက်လက်ပံ့ပိုးကူညီရန် ဆုံးဖြတ်
ခဲ့ကြပြီး စိန်ခေါ်မှုများကိုကိုင်တွယ်ဖြေရှင်းရန်နှင့် ဒေသတွင်းငြိမ်းချမ်းရေး၊တည်ငြိမ်ရေးနှင့် ရေရှည်တည်တံ့ခိုင်မြဲသော ဖွံ့ဖြိုးတိုးတက်ရေးကို မြှင့်တင်ရန်လည်းကတိပြုခဲ့ကြသည်။
Source – Khmer Times
