အမိမြေကိုကာကွယ်ရန် တိုက်ပွဲဝင်ရမည်ဟုထိုင်ဝမ်သမ္မတဆို
ထိုင်ဝမ်သမ္မတ ဆိုင်အင်ဝမ်သည် ထိုင်ဝမ်အနေဖြင့် လွန်ခဲ့သောနှစ်ပေါင်း ၆၀ ခန့်ကလည်း တရုတ်စစ်တပ်ကိုခုခံတွန်းလှန်ခဲ့ဖူးသကဲ့သို့ယခုတစ်ကြိမ်တွင်လည်း အမိမြေကို ကာကွယ်ရန် အသင့်ရှိနေကြောင်း ပြောကြားပြီးတရုတ်ကိုသတိပေးခဲ့သည်။
စတန်းဖို့ဒ်တက္ကသိုလ်မှ အမေရိကန် ပညာရှင်အဖွဲ့နှင့်တွေ့ဆုံစဉ် သမ္မတဆိုင်သည် ထိုင်ဝမ်နှင့်တရုတ်နိုင်ငံတို့၏ သမိုင်းကြောင်းကိုပြောကြားခဲ့ပြီး ၁၉၅၈ ခုနှစ် သြဂုတ်လက တရုတ်တို့၏ တိုက်ခိုက်မှုအကြောင်းများကိုလည်း ထုတ်ဖော်ပြောကြားခဲ့သည်။
“လွန်ခဲ့တဲ့ ခြောက်ဆယ့်လေးနှစ်၊သြဂုတ်လ ၂၃ ရက်တုန်းကတိုက်ပွဲမှာ ဒီနေ့မြင်နေရတဲ့ဒီမိုကရက်တစ် ထိုင်ဝမ်ကို ပိုင်ဆိုင်နိုင်စေဖို့ ကျွန်မတို့ ထိုင်ဝမ်စစ်သားတွေနဲ့ အရပ်သားပြည်သူတွေဟာ စည်းလုံးညီညွတ်စွာနဲ့ ထိုင်ဝမ်ကို ကာကွယ်စောင့်ရှောက်ပေးခဲ့တာပါ” ဟု သူကပြောကြားခဲ့သည်။
“အမိနိုင်ငံကိုကာကွယ်ဖို့ တိုက်ခိုက်ခဲ့တဲ့အဲ့ဒီစစ်ပွဲကနေ ထိုင်ဝမ်နိုင်ငံသူ/သားတွေရဲ့ တိုင်းပြည်ကာကွယ်ချင်စိတ်ကို ဘယ်လိုသောခြိမ်းခြောက်မှုမျိုးကမှ မတားဆီးနိုင်ဖူးဆိုတာ ကမ္ဘာသိအောင်ချပြနိုင်ခဲ့ပါတယ်။ပြီးတော့ ထိုင်ဝမ်ပြည်သူတွေရဲ့ အဲ့ဒီလိုတိုင်းပြည်ချစ်စိတ်ဟာ ဟိုအရင်အချိန်ကတင်ရှိခဲ့တာမဟုတ်ပဲ အခုရော၊နောင်ရောအထိဆက်လက်ရှင်သန်နေဦးမှာဆိုတာ ကျွန်မယုံကြည်ပါတယ်” ဟုဆိုခဲ့သည်။
“ထိုင်ဝမ်ပြည်သူတွေဟာ ကိုယ့်တိုင်းပြည်အတွက် ငြိမ်းချမ်းရေး၊ လုံခြုံရေး၊ လွတ်လပ်မှုနဲ့ သာယာဝပြောရေးကို ကာကွယ်ဖို့ သန္နိဋ္ဌာန်နဲ့ယုံကြည်မှု နှစ်ခုလုံးရှိတယ်ဆိုတာကို ကမ္ဘာကိုပြသသွားမှာပါ” ဟု သမ္မတက ရိုက်တာသတင်းတွင်ဖော်ပြခဲ့သည်။
၁၉၅၈ ခုနှစ်ကတရုတ်စစ်တပ်သည် ထိုင်ဝမ်ထိန်းချုပ်ထားသော Kinmen နှင့် Matsu ကျွန်းများကို တိုက်ခိုက်ခဲ့သော်လည်း ထိုအချိန်တွင် ထိုင်ဝမ်သည် ၎င်းတို့အား လက်နက်များကူညီပေးအပ်ခဲ့သည့် အမေရိကန်၏အကူအညီဖြင့် ပြန်လည်တိုက်ခိုက်နိုင်ခဲ့သည်။
“ထိုင်ဝမ်အနေနဲ့ ကိုယ်ပိုင်အုပ်ချုပ်ခွင့်ကိုသာ ခိုင်ခိုင်မာမာဆက်လက်အကောင်အထည်ဖော်သွားမှာဖြစ်ပြီး အဲ့လိုအကောင်အထည်ဖော်နိုင်ဖို့ အမေရိကနဲ့ဆက်လက်လက်တွဲဆောင်ရွက်သွားပါမယ်၊အာဏာရှင်ရဲ့နယ်မြေချဲ့ထွင်မှုကို လက်မခံပါဘူး” ဟု ဆိုင်ကဆိုသည်။
ယခုလအစောပိုင်းကလည်း ထိုင်ဝမ်သည် တရုတ်နိုင်ငံအား မခံချိမခံသာဖြစ်စေခဲ့သော ကန်နိုင်ငံအောက်လွှတ်တော်ဥက္ကဌ နန်စီပေလိုစီ၏ ခရီးစဉ်အပါအဝင် ကန်နိုင်ငံရေးသမားအများအပြားအား လက်ခံတွေ့ဆုံဆွေးနွေးခဲ့သည်။
ထိုအချက်ကိုအကြောင်းပြကာ တရုတ်စစ်တပ်ကလည်း ထိုင်ဝမ်ရေလက်ကြားနယ်စပ်တွင် နေရာယူထားသော လေယာဉ်များနှင့်သင်္ဘောများဖြင့် စစ်ရေးလေ့ကျင့်မှုများစွာကိုပြုလုပ်ခဲ့သည်။
Source – Wio News
