တိုယိုတာမှ အမေရိကနှင့်ဂျပန်တို့တွင် EV ဘက္ထရီများထုတ်လုပ်ရန် ဒေါ်လာ ၅ ဒသမ ၃ ဘီလီယံရင်းနှီးမြှုပ်နှံမည်
တိုကျို၊ဩဂုတ် ၃၁
တိုယိုတာကုမ္ပဏီသည် ဂျပန်နှင့်အမေရိကတို့တွင် လျှပ်စစ်ကားများအတွက် ဘက္ထရီများတိုးချဲ့ထုတ်လုပ်ရန် ယန်း ၇၃၀ ဘီလီယံ (ဒေါ်လာ ၅ ဒသမ ၃ ဘီလီယံ) အထိ ရင်းနှီးမြှုပ်နှံမည်ဖြစ်ကြောင်း ဗုဒ္ဓဟူးနေ့ကပြောကြားခဲ့သည်။
ကားကုမ္ပဏီကြီးသည် Panasonic Holdings နှင့် ဖက်စပ်လုပ်ကိုင်သည့် Prime Planet Energy & Solutions စက်ရုံနှင့်ဂျပန်နိုင်ငံရှိ Toyota ၏ကိုယ်ပိုင်စက်ရုံများတွင်ပါ ပြည်တွင်းရင်းနှီးမြှုပ်နှံမှုအနေဖြင့် ယန်း ၄၀၀ ဘီလီယံကို ရင်းနှီးမြှုပ်နှံမည်ဖြစ်ကြောင်းသိရှိရသည်။မြောက်ကာရိုလိုင်းနားပြည်နယ်တွင် တည်ဆောက်မည့် ဘက္ထရီစက်ရုံအတွက်လည်း ယန်း ၃၂၅ ဘီလီယံသုံးစွဲမည်ဖြစ်သည်ဟုဆိုသည်။
၂၀၂၄ မှ ၂၀၂၆ ခုနှစ်အတွင်း ထုတ်လုပ်မှုစတင်ရန်ရည်ရွယ်ထားပြီး နှစ်နိုင်ငံပေါင်းလျှင်ဘက္ထရီထုတ်လုပ်မှုပမာဏသည် ၄၀ GWh အထိတိုးလာမည်ဖြစ်သည်ဟုဆိုသည်။
တိုယိုတာသည် EV ဘက္ထရီထုတ်လုပ်မှု သုတေသနနှင့်ဖွံ့ဖြိုးတိုးတက်မှုကြောင့် ၂၀၃၀ ပြည့်နှစ်တွင် ရင်းနှီးမြှုပ်နှံမှုအနေဖြင့် ယန်းငွေ ၂ ထရီလီယံ မြှုပ်နှံရန်ရည်ရွယ်ထားကြောင်းကြေငြာထားပြီးဖြစ်သည်။ယခုအမေရိကနှင့်ဂျပန်တို့တွင် ရင်းနှီးမြှုပ်နှံမည့် ယန်း ၇၃၀ ဘီလီယံသည် အဆိုပါ ၂ ထရီလီယံရင်းနှီးမြှုပ်နှံမှု၏ တစ်စိတ်တစ်ပိုင်းဖြစ်သော်လည်း မြေယာနှင့်အဆောက်အအုံတော့မပါဝင်ဟုဆိုသည်။သို့သော် အသေးစိတ်အချက်အလက်များကို တိုယိုတာကထုတ်ဖော်ပြောကြားခြင်းမရှိပေ။
ရင်းနှီးမြှုပ်နှံမှုနှင့်ပတ်သက်၍ ကုမ္ပဏီက ပြောကြားရာတွင် “ကျွန်တော်တို့သည် နိုင်ငံနှင့်ဒေသအားလုံးရှိဖောက်သည်များ၏လိုအပ်ချက်ကို စွမ်းအားပြည့်ဝစွာဖြည့်ဆည်းပေးပြီး တတ်နိုင်သမျှရွေးချယ်ခွင့်များ ပေးဆောင်မည်ဖြစ်ကာ ဒေသတစ်ခုစီ၌ EVs လိုအပ်ချက်ကိုဖြည့်ဆည်းရန် ထောက်ပံ့ရေးဖွဲ့စည်းပုံတည်ဆောက်မှုများကို ဆက်လက်ကြိုးပမ်းသွားမည်ဖြစ်သည်” ဟုဆိုသည်။
EV များဆီသို့ကူးပြောင်းမှုများ အနည်းငယ်တိုးလာပြီး အမေရိကန်ပြည်ထောင်စု ကလီဖိုးနီးယားတွင်ပြီးခဲ့သည့်သီတင်းပတ်က ဓာတ်ငွေ့လောင်စာသုံးယာဉ်ရောင်းချမှုအားလုံးကိုရပ်တန့်ရန်စည်းမျဉ်းများကိုလည်း ပြီးခဲ့သည့်သီတင်းပတ်ကအတည်ပြုခဲ့သည်။
Honda Motor သည်လည်း တောင်ကိုရီးယားမှဘက္ထရီထုတ်လုပ်သည့် LG Energy Solution နှင့် အမေရိကတွင် လျှပ်စစ်ကားများအတွက် ဘက္ထရီစက်ရုံကို ကန်ဒေါ်လာ ၄ ဒသမ ၄ ဘီလီယံဖြင့်တည်ဆောက်မည်ဟု တနင်္လာနေ့ကကြေညာခဲ့သေးသည်။
Tokai Tokyo Research Institute မှ ဆန်းစစ်လေ့လာသူ Seiji Sugiura ကမူ EV များထုတ်လုပ်ရန်စိတ်မပါဘဲ တုံ့နှေးနေသည့် ဂျပန်ကားထုတ်လုပ်သူများပင်လျှင် ၎င်းတို့၏ဘက္ထရီရင်းနှီးမြှုပ်နှံမှုများကို ပိုမိုရှင်းလင်းစွာအဓိပ္ပာယ်ဖွင့်ဆိုနေကြကြောင်းဆိုကာ Toyota ၏ကြေငြာချက်နှင့်ပတ်သက်၍မူ Honda ရဲ့ထုတ်ပြန်ချက်အပြီးမှာ Toyota ကဘာလုပ်မလဲဆိုတာ သိချင်နေတဲ့ရှယ်ယာရှင်တွေကို တုံ့ပြန်ဖို့ရည်ရွယ်တာဖြစ်နိုင်ပါတယ်” ဟုဆိုခဲ့သည်။
Source –နစ်ကေးအေးရှ
