လေအေးတိုက်ခတ်မှုကြောင့် ကယ်ဆယ်ရေးလုပ်ငန်းများနှောင့်နှေး၊ ရုရှားမီးတောင်ပေါ်တက်သူ ၆ ဦးသေဆုံး
ကန်ချက်စကီ၊စက်တင်ဘာ ၄
ရုရှားနိုင်ငံအရှေ့ဘက်စွန်းရှိ ကလာယုချက်စကီရာဆော့ပ်ကာ မီးတောင်ပေါ်၌ လူခြောက်ဦးသေဆုံးခဲ့ပြီး နောက်ထပ် ခြောက်ဦးအား ကယ်ဆယ်ရန်ကြိုးပမ်းနေစဉ် စက်တင်ဘာ ၄ ရက် တနင်္ဂနွေနေ့တွင် အေးခဲနေသောလေပြင်းများတိုက်ခတ်မှုကြောင့် ကယ်ဆယ်ရေးကြိုးပမ်းမှုများ ရပ်တန့်သွားခဲ့ကြောင်းသိရသည်။
လမ်းပြနှစ်ဦးပါ၀င်သည့် ၁၂ ယောက်အဖွဲ့သည်အင်္ဂါနေ့က ၄,၇၅၄ မီတာရှိသောမီးတောင်ပေါ်သို့တက်ရန်ထွက်ခွာခဲ့သော်လည်းစနေနေ့တွင် အဖွဲ့ထဲမှအချို့သည်မီတာ ၄,၂၀၀ နီးပါးတွင် ပြုတ်ကျသေဆုံးသွားသောအခါတွင် ပြဿနာတက်ခဲ့သည်ဟုအာဏာပိုင်များကပြောကြားခဲ့သည်။သူတို့ထဲက လူတစ်ယောက်ကတော့ ခြေထောက်ကျိုးသွားတယ်လို့ယူဆရပါတယ် ဟုဆိုကြသည်။
ကယ်ဆယ်ရေးသမားများက တနင်္ဂနွေနေ့၌ ၎င်းတို့ထံရောက်ရှိရန် ကြိုးပမ်းခဲ့သော်လည်း လေပြင်းများကရဟတ်ယာဉ် မဆင်းနိုင်အောင် တားဆီးထားသဖြင့် နောက်ပြန်လှည့်ခဲ့ရသည်ဟုဆိုသည်။
“၎င်းတို့သည်အမြင့် ၃၃၀၀ မီတာတွင် ဆင်းသက်ရန်စီစဉ်ထားကာ တစ်စက္ကန့်လျှင် မီတာ ၃၀ နှုန်းနှင့် လေပြင်းတိုက်ခတ်မှုကြောင့် နာရီအနည်းငယ်ခြားကာ နှစ်ကြိမ် ကြိုးစားခဲ့သော်လည်း မအောင်မြင်ခဲ့ကြောင်း” ကယ်ဆယ်ရေးသမားများကပြောကြားခဲ့သည်။တောင်ပေါ်ရှိ အပူချိန်သည် ညတွင်းချင်း အနှုတ် ၁၄ ဒီဂရီစင်တီဂရိတ်အထိ နိမ့်နိုင်သည်ဟုလည်းဆိုကြသည်။
ဒေသန္တရအရပ်ဘက်ကာကွယ်ရေးအာဏာပိုင်အဖွဲ့မှကိုယ်စားလှယ် Tatyana Yukhmanova က ကယ်ဆယ်ရေးသမားများသည် ရာသီဥတုအခြေအနေအရ ခွင့်ပြုပါက မနက်ဖြန်တွင် ပိတ်မိနေသည့်အဖွဲ့ထံ ထပ်မံရောက်ရှိရန် ကြိုးစားမည်ဖြစ်ကြောင်းပြောကြားခဲ့သည်။
ကလာယုချက်စကီရာဆော့ပ်ကာသည် ရုရှားနိုင်ငံ ကမ်ချက်ကာကျွန်းဆွယ်တွင် နှင်းများထူထပ်သည့် တောင်တစ်လုံးဖြစ်ပြီး မီးတောင်ပေါင်း ၁၆၀ ကျော်တွင် အမြင့်ဆုံးဖြစ်သည်။၎င်း၏ထူးခြားသော သဘာဝအလှေကြာင့်ယူနက်စကို၏ ကမ္ဘာ့အမွေအနှစ်စာရင်းဝင်ဖြစ် လာသည်။
နှင်းများနှင့်ရေခဲများ ရောနှောကာ မီးတောင်ကျောက်ဆောင်များဖြင့် ဖွဲ့စည်းထားသည့်တောင်ကို ကယ်ဆယ်ရေးသမားများက ၎င်း၏အမြင့်နှင့်မီးတောင် ၏ပေါက်ကွဲနိုင်သည့် အန္တရာယ်ကြောင့် တောင်တက်သမားများအတွက် အထူး အန္တရာယ်ဟုယူဆကြောင်း ကယ်ဆယ်ရေး သမားများကသတိပေးထားသည်။
Source – Reuters/gr
