ဘုရင်မကြီးဈာပနကြောင့် ပရီးမီးယားလိဂ် သုံးပွဲရွှေ့ဆိုင်း
အင်္ဂလန်၊စက်တင်ဘာ ၁၂
ဘုရင်မကြီး၏ ဈာပနအခမ်းအနားမတိုင်မီ၌ ရဲတပ်ဖွဲ့ဝင်များအ လုပ်များခြင်းကြောင့် လီဗာပူးလ်အသင်းနှင့် ချယ်လ်ဆီးအသင်း၊မန်ချက်စတာယူနိုက်တက်အသင်းနှင့် လိဒ်အသင်းတို့ယှဉ်ပြိုင်ရမည့် ပွဲစဉ်များကိုရွှေ့ဆိုင်းလိုက်ကြောင်း ပရီးမီးယားလိဂ်က တနင်္လာနေ့တွင်ထုတ်ပြန်ကြေညာခဲ့သည်။
ပရီးမီးယားလိဂ်ပွဲစဉ် (၇)ပွဲကို ယခုအပတ်အတွင်း ယှဉ်ပြိုင်ကစားသွားမည်ဖြစ်ကာ ဘရိုက်တန်အသင်းနှင့် ခရစ္စတယ်ပဲလေ့စ်တို့ ယှဉ်ပြိုင်ကစားရန် စီစဉ်ထားသည့်ပွဲစဉ်ကိုမူ ရထားလုပ်သားသပိတ်ကြောင့် ရွှေ့ဆိုင်းခဲ့ရသေးသည်ဟုဖော်ပြထားသည်။
တနင်္ဂနွေနေ့၌ယှဉ်ပြိုင်မည့် ဘရန့်ထ်ဖို့ဒ်နှင့် အာဆင်နယ်အသင်း၏ပွဲစဉ်ကိုလည်း နေ့ခင်း ၂ နာရီသတ်မှတ်ထားရာမှ နေ့လည် ၁၂ နာရီသို့ ပြောင်းလဲစတင်မည်ဟုသိရှိရသည်။
ဘောလုံးအသင်းများ၊ ရဲတပ်ဖွဲ့ဝင်များ၊ ဒေသတွင်းဘေးကင်းရေးအကြံပေးအဖွဲ့များအပါအဝင် အခြားသက်ဆိုင်ရာအာဏာပိုင်များနှင့်ပါ ကျယ်ကျယ်ပြန့်ပြန့် ဆွေးနွေးတိုင်ပင်ပြီးသော်လည်း ပွဲစဉ်သုံးပွဲကို ရွှေ့ဆိုင်းရန်မှတပါး အခြားရွေးချယ်စရာမရှိတော့ကြောင်း ပရီးမီးယားလိဂ်၏ ထုတ်ပြန်ချက်တွင် ဖော်ပြထားသည်။
“ပရီးမီးယားလိဂ်သည် ယူကေဘောလုံးအားကစားထိန်းသိမ်းကြပ်မတ်ရေးအဖွဲ့နှင့် နိုင်ငံတစ်ဝန်းရှိ အခြားသောရဲတပ်ဖွဲ့များ၊ ဤလုပ်ငန်းစဉ်ကာလအတွင်း ပံ့ပိုးပေးခဲ့ကြသော ကျွန်ုပ်တို့၏ထုတ်လွှင့်ရေးလုပ်ဖော်ကိုင်ဖက်များ နှင့် ဆက်လက် ချိတ်ဆက်ဆောင်ရွက်သွားမည် ဖြစ်ကြောင်းပြောကြားခဲ့ပြီး ၎င်းတို့အားပရီးမီးယားလိဂ်အဖွဲ့ချုပ်ကကျေးဇူးတင်ရှိပါသည်” ဟုလည်းပြောကြားခဲ့သည်။
“နိုင်ငံတော်ရဲ့ဝမ်းနည်းရတဲ့ ကာလအတွင်းမှာ ကစားမယ့်ပွဲစဉ်တွေအတွက် ပရီးမီးယားလိဂ် အားကစားကွင်းတွေမှာ ဘုရင်မကြီးကို ဂုဏ်ပြုတဲ့အနေနဲ့ မကစားခင်ဂါရဝပြုသွားမှာ ဖြစ်ပါတယ်” ဟုလည်းဆိုသည်။
အင်္ဂလန်၊ စကော့တလန်၊ မြောက်အိုင်ယာလန်နှင့် ဝေးလ်ရှိ ပွဲစဉ်များအားလုံးကိုလည်း လေးစားမှုအထိမ်းအမှတ်အဖြစ် ပြီးခဲ့သည့်အပတ်က ရွှေ့ဆိုင်းခဲ့ကြသည်။
အာဆင်နယ်အသင်း၏ ယူရိုပါလိဂ်ပွဲစဉ်ဖြစ်သည့် PSV Eindhoven နှင့် ကြာသပတေးနေ့တွင် ယှဉ်ပြိုင်ကစားရမည့် ယူရိုပါလိဂ်ပွဲစဉ်ကိုလည်း စက်တင်ဘာ ၁၉ တွင်ပြုလုပ်မည့် ဘုရင်မကြီးဈာပနအတွက် လန်ဒန်၌ ရဲတပ်ဖွဲ့ကလုံခြုံရေးကိုတင်းကြပ်စွာလုပ်ဆောင်ရန် လိုအပ်သောကြောင့် ရပ်နားထားကြောင်းသိရှိရသည်။
Source -AFP/zl