နေပြည်တော်ရှိပို့ဆက် ဝန်ထမ်းများ ကိုဗစ်ကြောင့် (၂) ပတ်ရုံးတက်၍ (၂) ပတ် နေအိမ်မှရုံးလုပ်ငန်း လုပ်ဆောင်ရန် ပို့ဆောင်ရေးနှင့် ဆက်သွယ်ရေးဝန်ကြီးဌာန ညွှန်ကြား
နေပြည်တော်၌ တာဝန်ထမ်းဆောင်နေသည့် ဝန်ထမ်းများအား ကိုဗစ်(၁၉)ရောဂါကူးစက်မှုနှင့်ဖြစ်ပွားမှုနှုန်းများလာသဖြင့် စက်တင်ဘာ ၁၂ ရက်မှစတင်ကာ အလှည့်ကျစနစ်ဖြင့် တစ်လလျင် ၂ ပတ်ရုံးတက်၍ ၂ ပတ်အားနေအိမ်တွင်နေ ထိုင်ကာ ရုံးလုပ်ငန်းများဆောင်ရွက်ရန် ပို့ဆောင်ရေးနှင့် ဆက်သွယ်ရေးဝန်ကြီးဌာနမှ အသိပေးထုတ်ပြန်ခဲ့သည်။
နေပြည်တော်၌ ဩဂုတ်လကုန်မှစ၍ ကိုဗစ်(၁၉) ရောဂါကူးစက်ဖြစ်ပွားမှုနှုန်းများလာကာ ပို့ဆောင်ဆက်သွယ်ရေးဝန်ကြီးဌာနမှဝန်ထမ်း ၄၈ ဦးတွင် ရောဂါပိုးတွေ့ရှိရသဖြင့် ကျန်းမာရေးဝန်ကြီးဌာနမှ သတ်မှတ်ထားသည့် ပုဗ္ဗသီရိမြို့နယ်ဆေးရုံကုတင်-၃၀၀ ၌ဆေးကုသမှုခံယူနေရသည်။
ထို့ကြောင့် ရောဂါဖြစ်ပွားမှုနှုန်းလျော့နည်းစေရန်နှင့်ဌာနအလိုက်လုပ်ငန်းတာဝန်များအား ထိရောက်စွာဆောင်ရွက်နိုင်ရန်အတွက် အသိပေးထုတ်ပြန်ခဲ့ခြင်းဖြစ်သည်။
ထိုသို့ ပို့ဆောင်ရေးနှင့် ဆက်သွယ်ရေးဝန်ကြီးဌာနမှ ဝန်ထမ်းများ ၂ ပတ်ရုံးတက်၍ ၂ ပတ်နေအိမ်၌ ရုံးလုပ်ငန်းများဆောင်ရွက်ရန် အသိပေးထုတ်ပြန်ခဲ့သော်လည်း ဌာန၊အဖွဲ့အစည်းများ၌ ဒု-ညွှန်ကြားရေးမှူးနှင့်အထက်အဆင့်ဝန်ထမ်းများမှာမူ နေ့စဉ်ရုံးတက်ရမည်ဖြစ်ကြောင်း သိရသည်။
လက်ထောက်ညွှန်ကြားရေးမှူးနှင့်အောက်ဝန်ထမ်းအားလုံး၏တစ်ဝက်သည် ၂ ပတ်ရုံးတက်၍ ကျန်တစ်ဝက်သည် ၂ ပတ်အိမ်မှနေ၍ ရုံးလုပ်ငန်းဆောင်ရွက်ခြင်းများကို အလှည့်ကျဆောင်ရွက်ရမည်ဖြစ်သည်။
၂ ပတ်နေအိမ်၌ အလုပ်လုပ်ကိုင်ရန်အလှည့်ကျသည့် ဝန်ထမ်းများသည် နေထိုင်ရာ အဝန်းအ ဝိုင်း(အိမ်၊အဆောင်၊ရိပ်သာ၊အိမ်ရာ)အတွင်း၌ သာနေထိုင်ဆောင်ရွက်ရမည်ဖြစ်ပြီး ကျန်းမာရေးနှင့်ဈေးဝယ်ထွက်ခြင်းတို့မှလွဲ၍ ပြင်ပသို့ လုံးဝ (လုံးဝ)သွားလာခြင်းမပြုရဘဲ အကြောင်းအမျိုးမျိုးကြောင့် မဖြစ်မနေခရီးသွားရန်ရှိပါက တာဝန် ရှိသူအဆင့်ဆင့်၏ ခွင့်ပြုချက်ဖြင့်သာသွားလာရမည်ဖြစ်ကြောင်း သိရသည်။
အသိပေးထုတ်ပြန်ချက်အား လိုက်နာခြင်းမရှိဘဲ မိမိတို့နေထိုင်သည့် အဝန်းအဝိုင်းနှင့်တိုင်း/ပြည်နယ်များသို့ ကျော်လွန်သွားလာကြောင်း တွေ့ရှိပါက သွားသည့်ဝန်ထမ်း၊ခရီးသွားလာကြောင်းသိလျက်နှင့်ဖုံးကွယ်ပေးသူနှင့်အကာအကွယ် ပေးသူတို့အား နိုင်ငံ့ဝန်ထမ်းဥပဒေနှင့်အညီ ပြစ်မှုအပေါ် မူတည်၍ ထိရောက်စွာအရေးယူသွားမည်ဟု ပို့ဆောင်ရေးနှင့် ဆက်သွယ်ရေးဝန်ကြီးဌာနမှ အသိပေးထုတ်ပြန်ခဲ့သည်။
