ချီလီနိုင်ငံ ပါတာဂိုးနီးယားရှိ တောင်တန်းရေခဲမြစ် အပူချိန်မြင့်တက်မှုကြောင့်ပျော်ကျ
ဆန်တီ ယေဂို၊စက်တင်ဘာ ၁၄
အပူချိန်မြင့်မားမှုနှင့်မိုးရွာသွန်းမှုကြောင့် ရေခဲနံရံများအားပျော့လာကာ ချီလီနိုင်ငံပါတာဂိုးနီးယားဒေသရှိ အမျိုးသားဥယျာဉ်တစ်ခုထဲမှ တွဲလောင်းကျနေသည့်ရေခဲမြစ်တစ်စိတ်တစ်ပိုင်းသည် ပြိုကျကွဲထွက်သွားသည်ကို ကမ္ဘာလှည့်ခရီးသွားများရိုက်ကူးထားသည့် ဗီဒီယိုဖိုင်တစ်ခုတွင်တွေ့ရှိခဲ့ရသည်။
စက်တင်ဘာ ၁၂ ရက် တနင်္လာနေ့တွင်ပျံ့နှံ့သွားခဲ့သော အဆိုပါဗီဒီယိုတွင် ချီလီမြို့တော်၏တောင်ဘက် ကီလိုမီတာ ၁,၂၀၀ အကျော်ရှိ Queulat အမျိုးသားဥယျာဉ်ထဲမှ အမြင့်မီတာ ၂၀၀ ခန့်ရှိတောင်ထိပ်တစ်ခုပေါ်မှရေခဲမြစ်တစ်ခုတုန်ခါကျိုးကျသွားသည်ကို အထင်အရှားမြင်တွေ့ရသည်။
“ဒီလိုဖြစ်ရပ်မျိုးဟာ အပူလှိုင်းကြောင့် ဒါမှမဟုတ် ပြင်းထန်တဲ့မိုးရွာသွန်းမှုဖြစ်စဉ်တွေကြောင့်ဖြစ်လေ့ရှိပြီး ဒီလိုဖြစ်တာချီလီမှာတင်မဟုတ်ဘဲ တစ်ကမ္ဘာလုံးမှာဖြစ်နေတာပါ၊ဒီလိုခဏခဏဖြစ်လာတာဟာကောင်းတဲ့လက္ခဏာတော့မဟုတ်ပါဘူး” ဟု ဆန်တီ ယေဂိုတက္ကသိုလ်မှ ပညာရှင် မစ္စတာ Cordero ကဆိုသည်။
မစ္စတာ Cordero ၏ပြောကြားချက်အရ ယခုကဲ့သို့ရေခဲမြစ်အရည်မပျော်ခင်က ဆန်တီ ယေဂိုဒေသတွင် အလွန်ပြင်းထန်သည့်အပူချိန်ဖြင့် အပူလှိုင်းတစ်ခုဖြတ်သန်းသွားခဲ့သည်ဟု သိရှိရသည်။ “ကမ္ဘာကြီးပူနွေးလာမှုရဲ့ အကျိုးဆက်တွေထဲကတစ်ခုကတော့ အခုလိုရေခဲမြစ်တွေမကြာခဏအရည်ပျော်ကျတာပါပဲ” ဟု၎င်းကပြောကြားခဲ့သည်။ ယခုပါတာဂိုးနီးယားမှာဖြစ်သွားသကဲ့သို့ပင် ယခင်လအနည်းငယ်အတွင်းက ဟိမဝန္တာနှင့်အဲလ်ပ်တောင်တန်းနှစ်ခုလုံးတွင်လည်း ဖြစ်ပွားခဲ့ဖူးသည်ဟုဖော်ပြထားသည်။
ယခုကဲ့သို့ကမ္ဘာကြီးပူနွေးလာမှုသည် လူသားများကြောင့်ဖြစ်ပေါ်လာရသည့် ရာသီဥတုပြောင်းလဲမှုနှင့်ဖန်လုံအိမ်ဓာတ်ငွေ့ထုတ်လွှတ်မှုများနှင့်ဆက်စပ်နေသည်ဟု သိပ္ပံပညာရှင်များကပြောကြားခဲ့သည်။ကမ္ဘာကြီးပူနွေးလာမှုကိုထိန်းချုပ်ရန်နှင့် ရာသီဥတု ပေါ်အကျိုးသက်ရောက်မှုများကို ကန့်သတ်ရန်အစိုးရများနှင့်စက်မှုလုပ်ငန်းများသည် ရုပ်ကြွင်းလောင်စာထုတ်လွှတ်မှုကိုသိသိသာသာလျှော့ချသင့်သည်ဟု ကုလသမဂ္ဂရာသီဥတုသိပ္ပံအဖွဲ့က ယခုနှစ်အစောပိုင်းကပြောကြားခဲ့သည်။
Source –Reuters/ec