ပူတင်နှင့်ရှီတို့ ယူကရိန်းနှင့်ထိုင်ဝမ်အရေးဆွေးနွေးမည်ဟု ခရင်မလင်ထုတ်ပြန်
မော်စကို၊စက်တင်ဘာ ၁၄
ရုရှားသမ္မတဗလာဒီမာပူတင်နှင့်တရုတ်သမ္မတရှီကျင့်ဖျင်တို့သည် စက်တင်ဘာ ၁၅ ရက် ကြာသပတေးနေ့တွင် ဥဇဘက်ကစ္စတန်၌ပြုလုပ်မည့် အစည်းအဝေး၌ ပထဝီနိုင်ငံရေးအခြေအနေအရ အထူးအရေးကြီးသည်ဟုယူဆထားသည့် ယူကရိန်းနှင့်ထိုင်ဝမ်အရေးများကိုဆွေးနွေးမည်ဖြစ်ကြောင်း ခရင်မလင်နန်းတော်၏သတင်းထုတ်ပြန်ချက်အရသိရှိရသည်။
တရုတ်သမ္မတရှီသည် မော်စီတုန်းနောက်ပိုင်း ဩဇာအကြီးဆုံးနိုင်ငံ့ခေါင်းဆောင်အဖြစ် ခန့်အပ်ခြင်းမခံရမီတစ်လအလိုတွင် ပူတင်နှင့်တွေ့ဆုံရန်ရှိသည့် အာရှအလယ်ပိုင်းသို့ခရီးထွက်မည်ဖြစ်ပြီး ကိုဗစ်အလွန်ပထမဆုံးခရီးစဉ်ဖြစ်သည်။
သမ္မတနှစ်ဦးသည် နှစ်နိုင်ငံအစီအစဉ်များနှင့် အဓိကကျ သောဒေသတွင်းနှင့်နိုင်ငံတကာ အကြောင်းအရာများကိုပါဆွေးနွေးသွားမှာဖြစ်ပါတယ်” ဟု ပူတင်၏လက်ထောက် Yuri Ushakov ကမော်စကိုတွင်ပြုလုပ်သည့် သတင်းစာရှင်းလင်းပွဲတွင်ပြောကြားခဲ့သည်။ထို့ပြင် ၎င်းတို့နှစ်ဦးသည် နှစ်နိုင်ငံမဟာဗျူဟာမြောက် မိတ်ဖက်ဆက်ဆံရေးအတွင်း မကြုံစဖူးမြင့်မားသောယုံကြည်မှုအဆင့်နှင့်ပတ်သက်၍ အပြုသဘောဆောင်သောအကဲဖြတ်မှုကိုပြုလုပ်မည်ဖြစ်ကြောင်းလည်း ၎င်းကထပ်လောင်းပြောကြားခဲ့သည်။
အင်အားကြီးမားလာနေသောတရုတ်နှင့်သဘာဝအရင်းအမြစ်ပေါသော ရုရှားတို့အကြားအကန့်အသတ်မရှိသောနက်ရှိုင်းသည့်ဆက်ဆံရေးရှိနေခြင်းသည် အနောက်နိုင်ငံများကသတိထားစောင့်ကြည့်နေရသည့် ပထဝီနိုင်ငံရေးတိုးတက်ဖွံ့ဖြိုးမှုတစ်ခုဖြစ်လာခဲ့သည်။
တရုတ်နိုင်ငံသည် မော်စကို၏နိုင်ငံတော်ဘဏ္ဍာအတွက် အဓိကဝင်ငွေများထဲမှတစ်ခုဖြစ်သည့် ရေနံကိုအများဆုံးဝယ်ယူသူဖြစ်သည်။ယူကရိန်းအရေးနှင့်ပတ်သက်၍ မတည်မငြိမ်ဖြစ်နေစဉ် ဥရောပသို့ဓာတ်ငွေ့ ပေးသွင်းမှု ကို သိသိသာသာလျှော့ချလိုက်သည့် မော်စကိုသည်၎င်း၏ဓာတ်ငွေ့ရောင်းချမှုကိုမြှင့်တင်ရန်နှင့် တရုတ်နိုင်ငံသို့ပိုက်လိုင်းအသစ်များတည်ဆောက်ရန်ပါကြိုးပမ်းလျက်ရှိသည်။
Ushakov ကမူ မော်စကိုအနေဖြင့် ယူကရိန်းအကျပ်အတည်းနှင့်ပတ်သက်၍ တရုတ်၏ရပ်တည်ချက်ကိုတန်ဖိုးထားပြီး ပေကျင်းသည်ပဋိပက္ခကို ဦးတည်သည့်မျှတသောချဉ်းကပ်မှုကိုလုပ်ဆောင်ခဲ့သည်ဟု ဆိုခဲ့သည်။
“တရုတ်အနေနဲ့ရုရှားကအထူးစစ်ဆင်ရေးကို မဖြစ်မနေလုပ်ခဲ့ရတယ် ဆိုတာကိုရှင်းရှင်လင်းလင်းနားလည်ပါတယ်။ဒီကိစ္စနဲ့ပတ်သက်လို့လည်း လာမဲ့တွေ့ဆုံမှုမှာ အကျေအလည်ဆွေးနွေးသွားမှာပါ” ဟု၎င်းကပြောကြားခဲ့သည်။
ဥဇဘက်ကစ္စတန်နိုင်ငံ ရှေးဟောင်းပိုးလမ်းမမြို့ Samarkand ၌ကျင်းပမည့် တရုတ်သမ္မတရှီကျင့်ဖျင်နှင့် ရုရှားသမ္မတဗလာဒီမာပူတင်တို့၏တွေ့ဆုံမှုသည် ရှန်ဟိုင်း၌ကျင်းပသည့် ပူးပေါင်းဆောင်ရွက်ရေးအဖွဲ့ထိပ်သီးအစည်းအဝေးပြင်ပတွေ့ဆုံမှုတစ်ခုဖြစ်သည်။
Ushakov ၏ပြောကြားချက်အရ ယခုဥဇဘက်ကစ္စတန်၌တွေ့ဆုံမှုအတွင်း တရုတ်နှင့်စွမ်းအင်ဆိုင်ရာသဘောတူညီချက်အသစ်များကို လက်မှတ်ရေးထိုးရန်မရှိနိုင်ဟုသိရှိရသည်။
Source –Reuters/fh
