ယူကရိန်း၏နေတိုးရည်မှန်းချက်က ရုရှားအတွက်ခြိမ်းခြောက်မှုတစ်ခုအဖြစ်ရှိနေသေး

ယူကရိန်း၏နေတိုးရည်မှန်းချက်က ရုရှားအတွက်ခြိမ်းခြောက်မှုတစ်ခုအဖြစ်ရှိနေသေး

မော်စကို၊စက်တင်ဘာ ၁၄

အနောက်နေတိုးစစ်ဘက်မဟာမိတ်အဖွဲ့တွင် ပါဝင်ရန်ကြိုးပမ်းနေသည့် ယူကရိန်း၏လက်ရှိရည်မှန်းချက်သည် ရုရှားနိုင်ငံ၏ လုံခြုံရေးကိုခြိမ်းခြောက်နေသဖြင့် ရုရှားအတွက်လိုအပ်သောကြောင့် ယူကရိန်းသို့အထူးစစ်ရေးစစ်ဆင်မှုကိုပြုလုပ်ရခြင်းဖြစ်သည်ဟု ခရင်မလင်နန်းတော်က စက်တင်ဘာ ၁၄ ရက် ဗုဒ္ဓဟူးနေ့တွင်ပြောကြားခဲ့သည်။

မော်စကိုသည် သမ္မတဗလာဒီမာဇလန်းစကီး၏ရုံးမှ အင်္ဂါနေ့ကထုတ်ပြန်ခဲ့သော ယူကရိန်း၏ နေတိုးအဖွဲ့သို့ပူးပေါင်းရန်မျှော်မှန်းချက်နှင့် ၎င်း၏အပြန်အလှန်ကာကွယ်ရေးအစီအစဉ်မှအကျိုးအမြတ်များကို ဖော်ပြထားသည့် လုံခြုံရေးအာမခံချက်မူကြမ်းကိုတုံ့ပြန်ခဲ့သည်။

သတင်းထောက်များနှင့်တွေ့ဆုံသည့် ဆွေးနွေးပွဲတွင်ခရင်မလင်ပြောရေးဆိုခွင့်ရှိသူ Dmitry Peskov က ရုရှားအနေဖြင့် အဆိုပါမူကြမ်းကို အပျက်သဘောဖြင့်ရှုမြင်ခဲ့ပြီး ယူကရိန်း၏နေတိုးအဖွဲ့သို့ဝင်ရောက်ရန်စိတ်ကူးသည် ရုရှားအတွက်အဓိကခြိမ်းခြောက်မှုတစ်ခုဖြစ်သည်ဟုပြောကြားခဲ့သည်။

ဖေဖော်ဝါရီလက ရုရှားတပ်ဖွဲ့များယူကရိန်းသို့ မစေလွှတ်မီမော်စကိုသည် ယူကရိန်းအားအမေရိကန်ဦးဆောင်သည့် အတ္တလန္တိတ်ကာကွယ်ရေးမဟာမိတ်အဖွဲ့ထံ မည်သည့်အခါမျှလက်မခံရန်အာမခံချက်ကိုတရားဝင်တောင်းဆိုခဲ့သည်။သို့သော် ကိဗ်နှင့်အနောက်အုပ်စုများကမူ ရုရှားသည်ကြိုတင်စီစဉ်ထားသော စစ်ရေးလှုပ်ရှားမှုကိုလုပ်ဆောင်နိုင်ရန်အတွက် ၎င်းအချက်ကိုအကြောင်းပြချက်အဖြစ်အသုံးပြုခြင်းသာဖြစ်သည်ဟု ဆိုကြသည်။

အင်္ဂါနေ့ကထုတ်ပြန်ခဲ့သည့် စာမျက်နှာကိုးမျက်နှာပါစာတမ်းတွင် ယူကရိန်းအတွက်နိုင်ငံတကာလုံခြုံရေးအာမခံချက်ဆိုင်ရာအကြံပြုချက်အစုံအလင်ကို နေတိုးအတွင်းရေးမှူးချုပ်ဟောင်း Anders Fogh Rasmussen နှင့် ဇလန်းစကီး၏သမ္မတ ရုံးအကြီးအကဲ Andriy Yermak တို့က ပြင်ဆင်ခဲ့ကြသည်။

သမ္မတဇလန်းစကီးကမူ နေတိုးမဟာမိတ်အဖွဲ့သို့မဝင်မီနှစ်များအတွင်း ကိဗ်အတွက်မိမိကိုယ်ကိုခုခံကာကွယ်နိုင်စွမ်းကိုမြှင့်တင်ရန် “နိုင်ငံရေး၊ဘဏ္ဍာရေး၊စစ်ရေးနှင့် သံတမန်ရေးရာအရင်းအမြစ်များ” ကို ပံ့ပိုးပေးရန်တောင်းဆိုခဲ့သည့် အဆိုပါပက်ကေ့ချ်သည် ယူကရိန်းအတွက်လုံခြုံရေးသဘောတူညီချက်အသစ်၏ အခြေခံဖြစ်သင့်သည်ဟု ပြောကြားခဲ့သည်။

ယင်းအဆိုပြုချက်သည် မော်စကိုအတွက်မခံမရပ်နိုင်ဖြစ်စေခဲ့ကာ နေတိုးအဖွဲနှင့်ပူးပေါင်းရန် ကိဗ်၏သန္နိဌာန်စိတ်ကိုအားဖြည့်ပေးသကဲ့သို့ ၎င်း၏နယ်စပ်အနီးတွင် အနောက်နိုင်ငံလက်နက်များ ပိုမိုချထားရေးအတွက် လမ်းခင်းပေးသည့်မဟာဗျူဟာတစ်ရပ်အဖြစ်ရှုမြင်ခဲ့သည်။

မစ္စတာ Peskov သည် ယူကရိန်းအနေဖြင့် လုံခြုံရေးအာမခံချက်အတွက် အနောက်နိုင်ငံများ၏ ပံ့ပိုးကူညီမှုအားအသုံးပြုမှုကိုလည်း ရှုံ့ချခဲ့ပြီး ဇလန်းစကီးအနေဖြင့် ရုရှား၏တောင်းဆိုချက်များအားချက်ချင်းလက်ငင်းလိုက်နာခြင်းဖြင့် ယူကရိန်းလုံခြုံရေးကိုမြှင့်တင်နိုင်ကြောင်းလည်းပြောကြားခဲ့သည်။

“ယူကရိန်းခေါင်းဆောင်တွေအနေနဲ့ ရုရှားနိုင်ငံအပေါ်ခြိမ်းခြောက်မှုပပျောက်စေမယ့် ဆောင်ရွက်မှုတွေကိုလုပ်ဆောင်ရမှာဖြစ်ပြီး ဘာတွေလုပ်ဆောင်ရမယ်ဆိုတာ သူတို့ကောင်းကောင်းသိပါတယ်” ဟု ၎င်းကဆိုခဲ့သော်လည်း အသေးစိတ်ကိုဆက်လက်ပြောကြားခြင်းမရှိခဲ့ပေ။

Source –ရိုက်တာ/ဗွီစီ