ပြည်တွင်း ရွှေဈေးနှုန်း မတည်ငြိမ်ခြင်းမှာ နိုင်ငံရေးနှင့် မသက်ဆိုင်ဘဲ ရောင်းလိုအား ဝယ်လိုအားနှင့်သာဆိုင်ကြောင်း ရန်ကုန်ရွှေအသင်း ဥက္ကဋ္ဌပြော
ပြည်တွင်းရွှေဈေးကွက်တွင် ဈေးနှုန်း မတည်မငြိမ်ဖြစ်နေခြင်းမှာ နိုင်ငံရေးနှင့် သက်ဆိုင်ခြင်းမရှိဘဲ ဈေးကွက်အတွင်းဖြစ်ပေါ်နေသည့် ဝယ်လိုအား၊ ရောင်းလိုအား အ ခြေအနေပေါ်မူတည်၍ ဖြစ်ပေါ်နေခြင်းသာဖြစ်ကြောင်း ရန်ကုန်ရွှေအသင်း ဥက္ကဋ္ဌကပြောသည်။
ပြည်တွင်း ရွှေဈေးနှုန်း မတည်မငြိမ် ဖြစ်ပေါ်နေရခြင်းမှာ နိုင်ငံရေးအခြေခံပြီး ဈေးကစားမှုများကြောင့်ဟု သတင်း ထွက်နေသည့်အပေါ် ပေါ်ပြူလာနယူး(စ်) မှ ဆက်သွယ်မေးမြန်းစဉ် ၎င်းက ပြန်လည်ဖြေကြားခဲ့ခြင်း ဖြစ်သည်။
” အဲဒီလိုတော့ မဟုတ်ပါဘူး ။ နိုင်ငံရေးနဲ့ မပတ်သက်ဘူးဗျ” ဟု ရန်ကုန်တိုင်း ရွှေလုပ်ငန်းရှင်အသင်း ဥက္ကဋ္ဌ ဦးမျိုးမြင့်က ပြောသည်။
ထို့အပြင် ဈေးကွက်အတွင်း ဖြစ်ပေါ်နေသည့် ဝယ်လို အားနှင့် ရောင်းလိုအား အပါအဝင် နိုင်ငံခြားငွေ ဈေးနှုန်း အခြေအနေပေါ်မူတည်၍လည်း ဈေးနှုန်း အတက်အကျ ပြောင်းလဲမှုများ ဖြစ်ပေါ်ကြောင်း ၎င်းကဆိုသည်။
လက်ရှိတွင် ပြည်တွင်းရွှေဈေးကွက်အတွင်း ရွှေဈေးအကျဖက်သို့ ဦးတည်နေသည့်အတွက် အဝယ်အေးနေပြီး ရောင်းလိုအားများနေကြောင်းလည်း ရန်ကုန်ရွှေအသင်းမှ သိရသည်။
” အကုန်လုံးအလုပ်မရှိတဲ့အခါကျတော့ အကုန်လုံး ရွှေပဲလူတွေက ဝိုင်းပြီးတော့ ဝယ်နေကြတာ။ အခုဈေးကျသွားပြီဆိုတော့ သူတို့ပဲ ချက်ချင်း လာပြန်ရောင်းကြတာ ။ အခုရောင်းတဲ့သူတွေက အားသာနေတယ်။ အရောင်းများနေတယ် ။ အခုက အဝယ်မရှိဘူး” ဟု ဦးမျိုးမြင့်က ပြောသည်။
ယနေ့ စက်တင်ဘာလ (၁၅) ရက် ပြည်တွင်း ရွှေဈေးကွ က်တွင် အခေါက်ရွှေ (၁) ကျပ်သားလျင် ၅သောင်းဝန်း ကျင် ပြန်လည်မြင့်တက်လာပြီး ၂၉သိန်းခွဲ ဝန်းကျင်ဖြင့် အရောင်းအဝယ် ပြုလုပ်ကြကြောင်း ရန်ကုန်ရွှေဈေး ကွ က်အတွင်းမှ သိရသည်။
ယမန်နေ့ ညနေပိုင်း ဈေးကွက် ပိတ်ချိန်တွင် အခေါက်ရွှေ (၁) ကျပ်သားလျင် (၂၈၇၀၀၀၀) ဝန်းကျင်ဖြင့် ဈေးပိတ်ခဲ့သော်လည်း ယနေ့ နံနက် ဈေးကွက်ဖွင့်ချိန်တွင် (၁)ကျပ်သားလျှင် သိန်း (၃၀) ဖြင့် ဈေးဖွင့်ခဲ့ခြင်း ဖြစ်သည်။
ယနေ့ စက်တင်ဘာ (၁၅) ရက် ရန်ကုန်အထိုင်ဈေးနှုန်းအနေဖြင့် ရန်ကုန်ရွှေအသင်း၏ ရည်ညွှန်းဈေးနှုန်းမှာ ခေါက်ရွှေ (၁) ကျပ်သားလျင် ၁၉၈၂၀၀၀ ကျပ် ဖြစ်ပြီး ကမ္ဘာ့ရွှေ (၁) အောင်ဆလျင် အမေရိကန်ဒေါ်လာ ၁၆၈၈ ဒေါ်လာ ဖြစ်ကြောင်း သိရသည်။
စက်တင်ဘာလ (၁၄) ရက်က နေပြည်တော်တွင် ဗဟိုဘဏ်တွင် ပြုလုပ်သည့် ရွှေဈေးနှင့် ငွေဈေးနှုန်းထိန်းညှိရေး အစည်းအဝေးတွင် ဗဟိုဘဏ် ဥက္ကဋ္ဌ ဒေါ်သန်းသန်းဆွေက ရွှေဈေးနှုန်း တည်ငြိမ်မှုရှိစေရန် ဗဟိုဘဏ်နှင့် အစိုးရက ပံ့ပိုးပေးသွားမည်ဟု ပြောကြားထားသည်။
