ဒေါ်လာ ၁၁ ဘီလီယံတန်ဖိုးရှိ ဖိလစ်ပိုင်လေဆိပ်ပရောဂျက်အား Samsung နောက်ခံပြုအဖွဲ့မှရရှိ
မနီလာ၊စက်တင်ဘာ ၁၅
တရုတ်နိုင်ငံကမျက်စိကျခဲ့ဘူးသော ဒေါ်လာ ၁၁ ဘီလီယံတန်ဖိုးရှိ ဖိလစ်ပိုင်လေဆိပ်စီမံကိန်းကို တောင်ကိုရီးယားနှင့်ဥရောပကုမ္ပဏီများကျောထောက်နောက်ခံပြုထားသည့် လုပ်ငန်းစုတစ်ခုမှရရှိခဲ့ကြောင်း အဆိုပါအဖွဲ့မှကြာသပတေးနေ့ကကြေငြာခဲ့သည်။
မနီလာ၏လူစည်ကားသော Ninoy Aquino အပြည်ပြည်ဆိုင်ရာ လေဆိပ်အပေါ်ဖိအားများ ဖြေလျှော့ရန်ရည်ရွယ်၍ ကြီးမားသောလေဆိပ်ဖြစ်သည့် Sangley Point အပြည်ပြည်ဆိုင်ရာလေဆိပ်ဆောက်လုပ်ရေးကို SPIA ဆောက်လုပ်ရေးလုပ်ငန်းစုသို့ ဗုဒ္ဓဟူးနေ့ကကာဗိတ်ပြည်နယ်အစိုးရကပေးအပ်ခဲ့ခြင်းဖြစ်သည်ဟုဆိုသည်။
ယခုစီမံကိန်းအားဦးဆောင်မည့် လုပ်ငန်းစုတွင်ပြည်တွင်းကုမ္ပဏီများဖြစ်သော Cavitex Holdings and House of Investments နှင့်တောင်ကိုရီးယား Samsung Group ပိုင်အဖွဲ့တစ်ခုဖြစ်သည့် Samsung C&T တို့က ဦးဆောင်ထားကြောင်းပါရှိသည်။အခြားအဖွဲ့ဝင်များအနေဖြင့် စီးပွားရေးလုပ်ငန်းရှင်တစ်ဦးဖြစ်သည့် မစ္စတာ Lucio Tan ပိုင် MacroAsia လုပ်ငန်းစုနှင့် Munich Airport International နှင့် Ove Arup & Partners Hong Kong တို့ဖြစ်ပြီး လုပ်ငန်းစု၏ဖွဲ့စည်းပုံကိုအတိအကျမသိရသေးကြောင်းဖော်ပြထားသည်။
Macro Asia နှင့်ပူးပေါင်း၍ နိုင်ငံပိုင် China Communications Construction သည် Sangley အတွက်ဒေါ်လာ ၁၀ ဘီလီယံတန်သဘောတူညီချက်ကို ယခင်ကရရှိခဲ့ဖူးသော်လည်း အထောက်အထားခိုင်လုံမှုလိုအပ်ချက်ကြောင့် ၂၀၂၁ ခုနှစ် ဇန်နဝါရီလတွင်အဆိုပါပရောဂျက်ကိုလက်လွှတ်ခဲ့ရသည်။ဖိလစ်ပိုင်ရေတပ်ဧရိယာနှင့်နီးသော လေယာဥ်ကွင်း၏ မဟာဗျူဟာမြောက်တည်နေရာကြောင့် ဖိလစ်ပိုင်ကာကွယ်ရေးတည်ေဆာက်မှုမူကြောင့် တရုတ်နိုင်ငံ၏အကျိုးစီးပွားကြီးမားသည်။နှစ်နိုင်ငံကြားဆက်ဆံရေးပိုမိုကောင်းမွန်လာသော်လည်း မနီလာနှင့်ပေကျင်းတို့သည် တောင်တရုတ်ပင်လယ်အတွင်း ပိုင်နက်အငြင်းပွားမှုများရှိနေဆဲဖြစ်သည်။
မနီလာမြို့တောင်ဘက်တွင်တည်ရှိသော Sangley လေဆိပ်အား ပြေးလမ်းနှစ်ခုဖြင့် နှစ်စဉ်ခရီးသည်ပေါင်း ၇၅ သန်းဆံ့နိုင်သည့်လေဆိပ်တစ်ခုအဖြစ် မျှော်လင့်ထားပြီး နောက်ပိုင်းတွင်ပြေးလမ်းလေးခုဖြင့် နှစ်စဉ်ခရီးသည်ပေါင်း သန်း ၁၃၀ အထိတိုးချဲ့နိုင်ရန်ချဲ့ထွင်သွားမည်ဖြစ်သည်။
အဆိုပါပရောဂျက်တွင် ၄ ကီလိုမီတာ အကွာအဝေးရှိချိတ်ဆက်လမ်းဖောက်လုပ်ခြင်းအပြင် ပေါင်းစပ်ထောက်ပံ့ပို့ဆောင်ရေးနှင့်လေကြောင်းဆိုင်ရာအထောက်အကူပြုအဆောက်အအုံများပါဝင်သည်။ ယခုပရောဂျက်မှတစ်ဆင့် အလုပ်အကိုင်ပေါင်း ၅၀,၀၀၀ ကိုဖန်တီးပေးနိုင်မည်ဟုမျှော်မှန်းထားကြောင်း အဆိုပါလုပ်ငန်းစုကပြောကြားခဲ့သည်။
အဆိုပါလုပ်ငန်းစုမှစီမံကိန်းစတင်လုပ်ဆောင်ရခြင်းအတွက်စိတ်လှုပ်ရှားမိကြောင်းပြောကြားခဲ့သော်လည်း ပရောဂျက်စတင်ဆောက်လုပ်မည့်အချိန်ကို တိတိကျကျမပြောနိုင်သေးကြောင်းပြောကြားခဲ့သည်။ယခုစီမံကိန်းပြီးသည်နှင့်တစ်ပြိုင်နက် Sangley လေဆိပ်သည် မနီလာမြို့အနောက်မြောက်ဘက်ရှိ Bulacan တွင် San Miguel ကုမ္ပဏီက တာဝန်ယူဆောက်လုပ်နေသည့် ပီဆို ၇၄၀ ဘီလီယံ(ဒေါ်လာ ၁၂ ဒသမ ၉၇ ဘီလီယံ) တန်ကြေးရှိသည့်လေဆိပ်နှင့်အပြိုင်ဖြစ်လာမည်ဖြစ်သည်။
Source –Nikkei Asia
