တိုက်ပွဲအခြေအနေပိုပြင်းထန်လာနိုင်ဟု ယူကရိန်းအားပူတင်သတိပေး
ဆမာကမ်ထ်၊စက်တင်ဘာ ၁၇
ရုရှားသမ္မတဗလာဒီမာပူတင်သည် ယူကရိန်း၏တန်ပြန်တိုက်ခိုက်မှုအပေါ် အပြုံးဖြင့်သာတုံ့ပြန်ခဲ့သော်လည်း ၎င်း၏တပ်များကိုထပ်မံဖိအားပေးပါက ရုရှားအနေဖြင့် ပိုမိုပြင်းထန်စွာတုံ့ပြန်သွားမည်ဟု စက်တင်ဘာ ၁၆ ရက်သောကြာနေ့ကသတိပေးခဲ့သည်။
ဥဇဘက်ကစ္စတန်နိုင်ငံ ဆမာကမ်ထ်မြို့၌ကျင်းပသည့် ရှန်ဟိုင်းပူးပေါင်းဆောင်ရွက်ရေးအဖွဲ့၏ ထပ်သီးဆွေးနွေးပွဲအပြီး၌ ပူတင်က ၎င်းတို့အနေဖြင့်ယူကရိန်းကိုကျူးကျော်ခြင်းသည် ရုရှားကိုခွဲထုတ်ရန်အနောက်တိုင်းကကြံစည်သည့်အတွက် လိုအပ်သဖြင့်လုပ်ရခြင်းဖြစ်သည်ဟုဆိုခဲ့သည်။
မော်စကိုအနေဖြင့် ယူကရိန်းအရေးမှာ အလျင်စလို မဖြစ်ခဲ့ဘူးသလို သူ့ရဲ့ ရည်မှန်းချက်တွေက လဲမပြောင်းလဲပါဘူးဟု၎င်းကဆိုခဲ့သည်။
ကိဗ်အနေဖြင့်လည်း ၎င်းတို့အနေဖြင့် တန်ပြန်စစ်ဆင်ရေးကိုစတင်အရှိန်မြှင့်ပြီဖြစ်ကြောင်းတာဝန်ရှိသူများက ပြောကြားခဲ့သည့်အပေါ်ပူတင်က “တန်ပြန်စစ်စတာတော့ဟုတ်ပါပြီ၊ဘယ်လိုအဆုံးသတ်မလဲကြည့်ကြတာပေါ့” ဟုတုံ့ပြန်ပြောဆိုခဲ့သည်။
ပူတင်၏ယခုမှတ်ချက်သည် လွန်ခဲ့သည့် တစ်ပတ်က ယူကရိန်းအရှေ့မြောက်ပိုင်း ခါကိဗ်ဒေသမှရုရှားတပ်ဖွဲ့ဝင်များ ဆုတ်ခွာသွားရခြင်းနှင့်ပတ်သက်၍ ပြင်းထန်သောလူထုဝေဖန်မှုကို ဖြစ်ပေါ်စေခဲ့သည့်နောက်ပိုင်း ၎င်း၏ပထမဆုံးသော မှတ်ချက်ပေးခြင်းလည်း ဖြစ်သည်။
ရေလှောင်တမံနှင့် လျှပ်စစ်ဓာတ်အား ထောက်ပံ့မှုအပါအဝင် ယူကရိန်း၏အခြေခံအဆောက်အဦများကို ရုရှားကတိုက်ခိုက်ခဲ့ပြီး ထိုတိုက်ခိုက်မှုများသည် ပိုမိုဆိုးရွားလာနိုင်ကြောင်း ပူတင်ကပြောကြားခဲ့သည်။
“မကြာသေးခင်က ရုရှားလက်နက်ကိုင် တပ်ဖွဲ့တွေဟာ ထိရှလွယ်တဲ့တိုက်ခိုက်မှု အချို့ပြုလုပ်ခံခဲ့ပြီး အဲ့ဒါတွေကို သတိပေးချက် တစ်ခုလို့ပဲယူဆလိုက်ပါမယ်၊ အခြေအနေတွေက ဒီထက်ဆက်ပြီးတိုးလာခဲ့ရင်တော့ တုံ့ပြန်မှုပိုပြင်းထန်လာပါလိမ့်မယ်” ဟု၎င်းကဆိုခဲ့သည်။
ရုရှားသည် ယူကရိန်း၏ နယ်မြေသစ်များကိုလည်းတဖြည်းဖြည်း သိမ်းပိုက်နေပြီဟု ပူတင်ကပြောကြားခဲ့သည်။၎င်းက အထူးစစ်ရေးဟုခေါ်သော ယခုစစ်ဆင်ရေးအား ပြင်ဆင်ရန်လိုအပ်ပါသလားဟုမေးသောအခါ ယခုအစီအစဉ်ကချိန်ညှိစရာအကြောင်းမရှိဟုဆိုပြီး အရေးကြီးဆုံးမှာ Donbas ဒေသတစ်ခုလုံးလွတ်မြောက်ရေးဖြစ်သည်ဟုဆိုခဲ့သည်။
Donbas တွင် ယူကရိန်းအရှေ့ပိုင်းမှရုရှစကားပြောသော ပြည်နယ်နှစ်ခုပါ၀င်ပြီး ယခုအခါ ရုရှားနှင့်ရုရှား ကျောထောက်နောက်ခံပြု ခွဲထွက်ရေး တပ်ဖွဲ့များ၏ ထိန်းချုပ်မှုအောက်သို့ အပြည့်အဝရောက်ရှိသည်။ထို့ပြင် ၎င်းတို့ တစ်စိတ်တစ်ပိုင်း ထိန်းချုပ်ထားသည့် Donetsk ဒေသတို့ဖြစ်သည်။
သို့သော်လည်း ယခုအခါရုရှားသည် ယူကရိန်းပိုင်နက်၏ငါးပုံတစ်ပုံခန့်ကိုသိမ်းထားနိုင်ပြီး ယင်းတို့အနက် တောင်ဘက်ပိုင်းမှ ဇာပိုရီရှီအာ၊Kherson ဒေသများနှင့် ၂၀၁၄ ခုနှစ်ကတည်းကသိမ်းယူထားပြီး ရုရှားပိုင်နက်အဖြစ်ယူဆထားသည့် ခရိုင်းမီးယားလည်းအပါအဝင်ဖြစ်သည်။
Source -Reuters/nh
