ကျိုက်ဝိုင်းဘုရားကားမှတ်တိုင်တွင် အိမ်ယာမဲ့တစ်ဦး သွေးအန်သေဆုံး
ရန်ကုန်တိုင်းဒေသကြီး၊ မရမ်းကုန်းမြို့နယ်ရှိ ကျိုက်ဝိုင်းဘုရားကားမှတ်တိုင်တွင် အိမ်ယာမဲ့အမျိုးသားတစ်ဦး ယနေ့ စက်တင်ဘာ ၂၇ ရက် နံနက်ပိုင်းက သွေးအန်သေဆုံးသွားကြောင်း ရွှေရောင်သမိုင်း လူမှုကူညီရေးအသင်းထံမှ သိရသည်။
မရမ်းကုန်းမြို့နယ်၊ အမှတ်(၃)ရပ်ကွက်၊ ကျိုက်ဝိုင်းဘုရားလမ်းမပေါ် ရှိ ကားမှတ်တိုင်တွင် ယနေ့ စက်တင်ဘာလ ၂၇ ရက် နံနက် ၉ နာရီ ၅ မိနစ်အချိန်ခန့်တွင် အမျိုးသားတစ်ဦး သွေးအန်၍ လဲကျနေကြောင်း လမ်းသွားလမ်းလာတစ်ဦးက “ရွှေရောင်သမိုင်း”အသင်းရုံးသို့ ဖုန်းဖြင့်ဆက်သွယ်အကြောင်းကြားလာသည့်အတွက် “ရွှေရောင်သမိုင်း” အရေးပေါ်ကယ်ဆယ်ရေးနှင့် လူမှုအထောက်အကူပြုဖွံ့ဖြိုးရေးအသင်း လူနာတင်ယာဉ်ဖြင့် အသင်းဝင်များက ကူညီနိုင်ရန် အချိန်နှင့်တစ်ပြေးညီသွားရောက်ခဲ့သော်လည်း ဖြစ်စဉ်နေရာသို့ရောက်ရှိသည့်အခါ အဆိုပါအမျိုးသားမှာ သေဆုံးနေကြောင်းတွေ့ရှိရသဖြင့် သက်ဆိုင်ရာအဖွဲ့အစည်းများနှင့် ချိတ်ဆတ်ဆောင်ရွက်ပေးခဲ့ကြောင်း သိရသည်။
သေဆုံးသူအမျိုးသားသည် အိမ်ယာမဲ့တစ်ဦးဖြစ်ပြီး အသက် ၅၀ အရွယ်ခန့်ရှိကာ ပြင်ပဒဏ်ရာ တစ်စုံတရာ မရှိဘဲ သေဆုံးသွားသည်ကိုတွေ့ရသည့်အတွက် ဆေးရုံသို့ ပို့ဆောင်ပေးခဲ့သည်ဟု “ရွှေရောင်သမိုင်း” အရေးပေါ်ကယ်ဆယ်ရေးနှင့် လူမှုအထောက်အကူပြုဖွံ့ဖြိုးရေးအသင်းထံမှ သိရသည်။
