ရှမ်းပြည်နယ်၊ကျိုင်းတုံမြို့နယ်၊ကျိုင်းတုံ-တောင်ကြီး-မိုင်းပျဥ်းသွားကားလမ်းတွင် အောက်တိုဘာ ၄ ရက်နေ့လည်ပိုင်းက ခရီးသည်တင်ကား ဘရိတ်ပေါက်၍ တောင်ကမ်းပါးရံအား ဝင်တိုက်မိခဲ့သည်ဟု မြန်မာနိုင်ငံမီးသတ်တပ်ဖွဲ့ဌာနချုပ်နှင့်တိုင်းနေနာရေးကူညီမှုအသင်းတို့မှ သိရသည်။
ယင်းနေ့နေ့လည် ၃ နာရီခွဲကျော်ခန့်က ကျိုင်းတုံမြို့နယ်၊ကျိုင်းတုံ-တောင်ကြီး-မိုင်းပျဉ်းသွားကားလမ်း၏ မိုင်တိုင်အမှတ် ၃၆၅ နှင့် ၃၆၆ ကြားတွင် ယာဥ်မတော်တဆမှုဖြစ်ပွားကြောင်း သတင်းအရ ကျိုင်းတုံခရိုင်၊မြို့နယ်မီးသတ်စခန်းတို့မှတပ်ဖွဲ့ဝင်များနှင့်လူမှုကူညီရေးအသင်းများက ကူညီကယ်ဆယ်ရေးလုပ်ငန်းများပြုလုပ်ခဲ့ကြသည်။
ဖြစ်စဥ်ကြောင့် ခရီးသည်တင်ကားမောင်း ဦးဌေး(အသက်-စီစစ်ဆဲ)သည် ထိခိုက်ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့ပြီး ကားပေါ်တွင်လိုက်ပါလာသူများအနက် ၇ ဦးတွင် ထိ ခိုက်ဒဏ်ရာများရရှိခဲ့ကြောင်း သိရသည်။
“ဘရိတ်ပေါက်ပြီး အရှိန်မထိန်းနိုင်တော့ဘဲ ဝင်တိုက်သွားတာ သေသွားတဲ့ ကားမောင်းတဲ့လူကိုအတော်ကြာအောင် ထုတ်ခဲ့ရတယ် ဖုန်းသတင်းရတာနဲ့ချက်ခြင်းသွားပြီးကူညီပေးခဲ့တာပါ ကားက တော့ အတော်ကြီးအခြေအနေဆိုးတယ်”ဟု လူမှုကူညီရေးအသင်းဝင်တစ်ဦးကပြောသည်။
ထိခိုက်ဒဏ်ရာရရှိသူ ၇ ဦးအား လူမှုကူညီရေးအ သင်းကားများဖြင့် ကျိုင်းတုံမြို့ပြည်သူ့ဆေးရုံသို့ပို့ဆောင်ခဲ့ကြပြီး ကားမောင်းသူ၏ ရုပ်အလောင်းအား ကျိုင်းတုံဆေးရုံရှိ ရင်ခွဲရုံသို့ပို့ဆောင်ပေးခဲ့ကြကြောင်း သိရသည်။
