ရန်ကုန်တိရစ္ဆာန်ဥယျာဥ်၏ အထိမ်းအမှတ်တစ်ခုဖြစ်သည့် ဆင်မကြီးမိုမို၏ ၆၉ နှစ်ပြည့်မွေးနေ့အား အောက်တိုဘာ ၂၈ ရက်မှ ၃၀ ရက်အထိ ၃ ရက်တိုင် ကျင်းပသွားမည်ဖြစ်ကြောင်း သိရသည်။
Mo Mo ‘s Birthday Weekend အနေဖြင့် ရန်ကုန်တိရစ္ဆာန်ဥယျာဉ်အတွင်း၌ ပျော်ရွှင်ဖွယ်အစီစဉ်များအပြင် ဆင်မကြီးမိုမိုအတွက် မွေးနေ့ကိတ်ခွဲခြင်း၊မိုမို၏ ဓာတ်ပုံများအား ဓာတ်ပုံပြပွဲအနေဖြင့်ပြသခြင်း၊တေးဂီတဖျော်ဖြေပွဲများ၊မျက်လှည့်ပြပွဲများ၊တိရစ္ဆာန်လေးများ၏ ဖျော်ဖြေမှုများ၊အမှတ်တရဓာတ်ပုံရိုက်ကူးခြင်းများ၊ဂိမ်းအစီအစဥ်များဖြင့် ကျင်းပသွားမည်ဖြစ်ကြောင်း သိရသည်။
မြန်မာဝီကီပီးဒီးယားက မိုမိုသည် ရန်ကုန်မြို တိရစ္ဆာန်ဥယျာဉ်မှ ဆင်မတစ်ကောင်ဖြစ်ကာ သူမ၏ ထူးခြားလှသော အသိဉာဏ်စွမ်းရည်ကြောင့် ပြည်သူများအကြားတွင် ဆင်ဟုပြောလျှင်ပင် မိုမိုနှင့်တွဲမြင်သည်အထိ ကျော်ကြားသည်။ သူသည် ရန်ကုန်တိရစ္ဆာန်ဥယျာဉ်သို လာရောက်လည်ပတ်သော ကြည့်ရှုလေ့လာသူများအား နှစ်ပေါင်းများစွာတိုင်အောင် ဖျော်ဖြေပေးခဲ့သည်။ နှစ်ပေါင်း ၅၀ကျော်ကြာ ဖျော်ဖြေပေးခဲ့ပြီး ၂၀၁၆ခုနှစ် အောက်တိုဘာလတွင် အနားယူခဲ့သည်ဟု ဖော်ပြထားသည်။
မိုမိုသည် နားလည်မှုစွမ်းရည်မြင့်မားခြင်း၊ မိုမိုဟုခေါ်လိုက်လျှင် ပြန်ထူးလိုက်သောအသံ စတာတွေကြောင့် လူအများချစ်ခင်ကြပြီး ကျော်ကြားခဲ့ခြင်းဖြစ်ပါသည်။
ဆင်မကြီးမိုမိုအား ၁၉၅၃ခုနှစ်တွင် ဖွားမြင်ခဲ့၍ လက်ရှိတွင် အသက် ၆၉နှစ်ပြည့်သွားပြီဖြစ်သည်။
မိုမို၏ အသက်၆၀ပြည့်မွေးနေ့မှစ၍ နှစ်စဉ်အောက်တိုဘာလတွင် သူ၏မွေးနေ့ပွဲကို ရန်ကုန်တိရစ္ဆာန်ဥယျာဉ်တွင် ကျင်းပလေ့ရှိသည်။ ထိုနေ့တွင် ကြံ၊ငှက်ပျောသီး၊သစ်သီးဝလံများဖြင့် မွေးနေ့ကိတ်ပုံစံ ပြုလုပ်ပေးခြင်း၊မိုမိုကိုယ်တိုင် သက်စေ့ငှက်လွှတ်ခြင်းများ ပြုလုပ်လေ့ရှိသည်ဟု သိရသည်။
ဆင်မကြီးမိုမို၏မွေးနေ့ အထိမ်းအမှတ်ပွဲတော်၌ ပါဝင်ရောင်းချလိုသည့် ဆိုင်ခန်းများအနေဖြင့် ရန်ကုန်တိရစ္ဆာန်ဥယျာဉ် ဖုန်း ၀၉ ၂၆၂၄၉၉၃၂၄ နှင့်ရန်ကုန်တိရစ္ဆာန်ဥယျာဥ်၏ လူမှုကွန်ယက်စာ မျက်နှာတို့မှတဆင့် ဆက်သွယ်စုံစမ်းနိုင်ကြောင်း သိရသည်။
ပုံစာ -ဆင်မကြီးမိုမို၏ ပြီးခဲ့သော မွေးနေ့ပွဲ တစ်ခု၏အမှတ်တရ ပုံရိပ်ဖြစ်ပါသည်။
