ဘာလင်၊နိုဝင်ဘာ ၃
G–7 နိုင်ငံများ၏နိုင်ငံခြားရေးဝန်ကြီးများသည် ကြာသပတေးနေ့၌ဂျာမနီတွင် နှစ်ရက်ကြာတွေ့ဆုံဆွေးနွေးမှုစတင်ရန်ရည်ရွယ်ထားပြီး ရုရှားအားခုခံတွန်းလှန်နေသည့် ယူကရိန်းကိုဆက်လက်ထောက်ပံ့မည့် ကတိကဝတ်ကိုအတည်ပြုလိမ့်မည်ဖြစ်ကြောင်းဖော်ပြထားသည်။
ဂျာမနီနိုင်ငံအနောက်ပိုင်း Munster မြို့၌တွေ့ဆုံရာတွင် ထိပ်သီး G-7 သံတမန်များသည်အရှေ့နှင့်တောင်တရုတ်ပင်လယ်တို့တွင် စစ်ရေးလှုပ်ရှားမှုများတိုးချဲ့လုပ်ဆောင်နေသည့် တရုတ်နိုင်ငံနှင့်ပတ်သက်၍လည်း ယခုအစည်းအဝေး၌ အမြင်ချင်းဖလှယ်သွားနိုင်ကြောင်း ခန့်မှန်းထားသည်ဟုဂျပန်အရာရှိတစ်ဦးကပြောကြားခဲ့သည်။
ယခုတွေ့ဆုံမှုနှင့်ပတ်သက်၍ အစည်းအဝေးမပြီးခင်သောကြာနေ့၌ပင် ပူးတွဲကြေငြာချက်ထုတ်ပြန်ရန် စီစဉ်ထားကြောင်း တာဝန်ရှိသူတစ်ဦးကပြောကြားခဲ့သည်။ပြီးခဲ့သည့်အပတ်က မော်စကိုဘက်မှ ပင်လယ်နက်လမ်းကြောင်းဂျုံတင်ပို့ရန် ကိဗ်နှင့်သဘောတူညီချက်အားရပ်ဆိုင်းကြောင်းကြေငြာလိုက်ပြီးနောက် ကမ္ဘာ့စားနပ်ရိက္ခာဖူလုံရေးအတွက် စိုးရိမ်မှုများတိုးပွားလာစဉ်ယခုတွေ့ဆုံမှုဖြစ်ပေါ်လာခြင်းဖြစ်သည်။သို့သော် မော်စကိုသည်ဗုဒ္ဓဟူးနေ့က သဘောတူညီချက်တွင်ဆက်လက်ပါဝင်မည်ဖြစ်ကြောင်းပြန်လည်ကြေငြာခဲ့သည်။
ထို့ပြင် ဒေသတွင်း၌တရုတ်နိုင်ငံ၏ ပင်လယ်ရေကြောင်းဆိုင်ရာအားကောင်းလာမှုကိုတုန့်ပြန်ရန်အတွက် တိုကျိုနှင့်ဝါရှင်တန်တို့ကထောက်ခံအားပေးသည့် လွတ်လပ်ပွင့်လင်းသောအင်ဒိုပစိဖိတ်ဒေသကို အကောင်အထည်ဖော်ခြင်းနှင့်ပတ်သက်၍လည်း ယခုတွေ့ဆုံမှုတွင်ထည့်သွင်းဆွေးနွေးနိုင်ကြောင်း အဆိုပါတာဝန်ရှိသူကပြောကြားခဲ့သည်။မြောက်ကိုရီးယား၏ ဒုံးကျည်ပစ်လွှတ်မှုနှင့်နျူလုပ်ဆောင်ချက်များကိုလည်း ထည့်သွင်းဆွေးနွေးနိုင်ကြောင်းမျှော်မှန်းထားသည်။
ယခုနှစ်အတွင်း G–7 နိုင်ငံများ၏နိုင်ငံခြားရေးဝန်ကြီးများသည် အွန်လိုင်းဆွေးနွေးပွဲများအပါအဝင် ဆွေးနွေးပွဲဆယ်ကြိမ်ပြုလုပ်ခဲ့သည်။စက်တင်ဘာလကကုလသမဂ္ဂနှစ်ပတ်လည် အစည်းအဝေးတွင်နောက်ဆုံးတွေ့ဆုံခဲ့ကြကာ လာမည့်နှစ်အတွက် G– 7 ထိပ်သီးအစည်းအဝေးဥက္ကဌနေရာကို ဂျာမနီထံမှ ဂျပန်ကလွှဲပြောင်းရယူမည်ဖြစ်ကြောင်းသိရှိရသည်။
Source : Kyodo
