မင်္ဂလာတောင်ညွန့်မြို့နယ်၊ ကန်မြောက်ရပ်ကွက် ၊ မန္တ လေး လမ်းတွင်ဖြစ်ပွားခဲ့သည့် လူသတ်အနုကြမ်းစီးမှုတွ င် ပြစ်မှုကျူးလွန်ခဲ့သူများမှာ နေအိမ်သို့ ရေသန့် ပုံမှန်လာပို့နေသည့်သူများဖြစ်ပြီး ၎င်းတို့ကို ပဲခူးတိုင်းဒေသကြီး အုတ်ဖိုမြို့တွင် ဖမ်းဆီးနိုင်ခဲ့ကြောင်း သိရသည်။
ရူပဗေဒဆိုင်ရာ စာရေးဆရာလည်းဖြစ် ရန်ကုန်တက္ကသိုလ် ရူပဗေဒဌာန၏ အငြိမ်းစား ကထိကတစ်ဦးလည်း ဖြစ်သည့် ဦးမြင့်ဝေ(ခ) တက္ကသိုလ်ကြယ်ပွင့် နှင့် ဇနီးဖြစ်သူ အငြိမ်းစား ဆရာမ ဒေါ်ခင်ခင်စန်းတို့မှာ ၎င်းတို့၏ နေအိမ်တိုက်ခန်းအတွင်း ဓါးဒဏ်ရာများဖြင့် သေဆုံးနေသည်ကို ပြီးခဲ့သည့် အောက်တိုဘာ (၃၀) ရက်ညပိုင်းက တွေ့ရှိခဲ့ခြင်း ဖြစ်သည်။
အဆိုပါ သေဆုံးမှုမှာ လူသတ်အနုကြမ်းစီးမှုဖြစ်ကြောင်း သက်ဆိုင်ရာက စစ်ဆေးအတည်ပြုပြီးနောက် ကျူးလွန်သူများအား ဖမ်းဆီးရမိရေး လုပ်ဆောင်ခဲ့ရာမှ ပဲခူးတိုင်း အုပ်ဖိုမြို့တွင် ဖမ်းဆီးရမိခဲ့ခြင်းဖြစ်ကြောင်း ပဲခူးတိုင်း ရဲ တပ်ဖွဲ့နှင့် နီးစပ်သူ သတင်းရင်းမြစ်က ပေါ်ပြူလာနယူး (စ်) သို့ပြောသည်။
” မိတာတော့ (၃) ရက်လောက်ရှိပြီထင်တယ်။ အုတ်ဖိုမှာမိတာပေါ့။ (၃) ယောက်ပါ ။ အဲဒီထဲမှာ ဆရာကြီးတို့အိမ်ကို ပုံမှန် ရေသန့် ပို့နေတဲ့သူ ပါပါတယ်။ အခုတော့ တိုင်းရဲ တပ်ဖွဲ့က ဆက်ပြီးကိုင်နေတယ်လို့တော့ ကြားတယ် ” ဟု အ ဆိုပါ သတင်းရင်းမြစ်က ဆိုသည်။
အဆိုပါ ပြစ်မှုကျူးလွန်သူများသည် ပဲခူးတိုင်း အုတ်ဖိုဇာ တိဖြစ်ပြီး အခင်းမဖြစ်မီက ရန်ကုန်တိုင်း တောင်ဒဂုံမြို့ နယ်တွင် နေထိုင်ကာ ရန်ကုန်မြို့အတွင်း ရေသန့်ပို့သည့် လုပ်ငန်းလုပ်ကိုင်သူများဖြစ်ကြောင်း အဆိုပါ သတင်း ရင်းမြစ်ထံက စုံစမ်းသိရသည်။
” ရေသန့်ပို့တဲ့ သူတွေပေါ့နော်။ နေတာက တောင်ဒဂုံမှာနေတာ ။ ဘယ်ရေသန့်လည်းကတော့ ကျွန်တော်လည်း မသိဘူး။ ဆုံးသွားတဲ့ ဆရာတွေအိမ်ကို ပုံမှန် ပို့နေကျလို့ ထွက်ဆိုတယ်လို့တော့ ကြားတယ်” ဟု ၎င်းက ဆိုသည်။
ပြစ်မှုကျူးလွန်သူများသည် ဆရာဉီးမြင့်ဝေနှင့် ဇနီးဖြစ်သူတို့အား ဓါးဖြင့်ထိုးကာ သတ်ဖြတ်ခဲ့ပြီး ငွေနှင့် ပစ္စည်းများ ယူဆောင်သွားခြင်းဖြစ်ကြောင်း သေဆုံးသူများနှင့် နီးစပ်သူ ရပ်ကွက်နေ ပြည်သူများထံက သိရသည်။
လက်ရှိတွင် ငွေကြေးနှင့် ပစ္စည်းများ၏ ကာလတန်ဖိုးမည်မျှရှိသည်ကို မသိရှိရသေးဘဲ ရဲတပ်ဖွဲ့ဘက်မှလည်း သတင်းထုတ်ပြန်ခြင်းမျိုးမရှိသေးပေ။
ဆရာဦးမြင့်ဝေ (ခ) တက္ကသိုလ် ကြယ်ပွင့်သည် ရူပဗေဒဆိုင်ရာ စာပေများစွာရေးသားခဲ့သည့် နာမည်ကျော် စာ ရေးဆရာတစ်ဦးဖြစ်ပြီး အမျိုးသားစာပေဆုနှင့် စာပေဗိမ္မာန်စာမူဆုများ ရရှိထားသူဖြစ်သည်။
သေဆုံးချိန်တွင် အသက် (၇၈) နှစ်ရှိဖြစ်ပြီး ဇနီးဖြစ်သူ အငြိမ်းစား ဆရာမ ဒေါ်ခင်ခင်စန်းသည်လည်း အသက် (၇၀) ကျော်ပြီဖြစ်ကာ မင်္ဂလာတောင်ညွန့်မြို့နယ်ရှိနေ အိမ်တွင် (၂) ဦးတည်း နေထိုင်ကြသူများဖြစ်ကြောင်း သိရသည်။
