ဘန်ကောက်၊နိုဝင်ဘာ ၁၀
တိုယိုတာကုမ္ပဏီသည် အစိုးရထောက်ပံ့ကြေးများအပေါ်အမှီပြုလျက် ထိုင်းနိုင်ငံလျှပ်စစ်ကားဈေးကွက်သို့ ထိုးဖောက်ဝင်ရောက်ကာ ခြေကုပ်ယူနိုင်ရန်ကြိုးစားနေပြီး ထိုင်းနိုင်ငံ၌လျှပ်စစ်ကားများကိုစတင်ရောင်းချမည်ဖြစ်ကြောင်းသိရှိရသည်။
ထိုင်းနိုင်ငံတွင်စတင်မိတ်ဆက်ရောင်းချမည့် bZ4X အမည်ရှိလျှပ်စစ်ကားသည် တိုယိုတာ၏နာမည်ကြီး Lexus အမှတ်တံဆိပ်ဇိမ်ခံကားပြီးနောက် ပထမဆုံးထုတ်လုပ်သည့်လျှပ်စစ်ကားဖြစ်ကြောင်းလည်းသိရှိရသည်။ဂျပန်၌ထုတ်လုပ်မည့်အဆိုပါလျှပ်စစ်ကားကို ထိုင်းဘတ်ငွေ ၁ ဒသမ ၈၃ သန်း(ဒေါ်လာ ၄၉,၉၀၀) နှှင့်ရောင်းချမည်ဖြစ်ပြီး အရောင်ခြောက်မျိုးဖြင့်ထုတ်လုပ်မည်ဟုသိရှိရသည်။
bZ4X အမျိုးအစားလျှပ်စစ်ကားသည် တစ်ကြိမ်အားသွင်းထားပြီးလျှင် ခန့်မှန်းခြေကီလိုမီတာ ၄၀၀ အထိသွားနိုင်ကြောင်းဖော်ပြထားပြီး ထိုအကွာအဝေးသည်လျှပ်စစ်ကားများထဲတွင် အမြင့်ဆုံးသွားနိုင်သည့်အကွာအဝေးဖြစ်ကြောင်းသိရှိရသည်။
တိုယိုတာသည်ထိုင်းနိုင်ငံ၏ထိပ်တန်းကားကုမ္ပဏီတစ်ခုဖြစ်ပြီး ၂၀၂၁ ခုနှစ်တွင် ကားအစီးရေ ၂၄၀,၀၀၀ အထိရောင်းချနိုင်ခဲ့သည်။ယခုထပ်မံထုတ်လုပ်သည့် bZ4X လျှပ်စစ်ကားများအတွက်လည်း အရောင်းရဆုံးအဆင့်တွင်ဆက်လက်ရပ်တည်ဖို့မျှော်မှန်းထားသည်။သို့သော် ဂျပန်နှင့်ယှဉ်ပါကဈေးပိုသက်သာသည့် တရုတ်နိုင်ငံထုတ် လျှပ်စစ်ကားများနှင့်ယှဉ်ပြိုင်ရောင်းချရဦးမည်ဖြစ်သည်။
ကမ္ဘာ့စတုတ္ထအကြီးဆုံး လျှပ်စစ်ကားကုမ္ပဏီဖြစ်သည့် တရုတ် BYD ကုမ္ပဏီသည် ထိုင်းနိုင်ငံ၌ အသေးစားလျှပ်စစ်ကားအမျိုးအစား SUV ATTO3 အား ဘတ် ၁ ဒသမ ၂ သန်းဖြင့်ရောင်းချပေးနေကြောင်းသိရှိရသည်။
Source :Nikkei Asia
