မန္တလေးမြို့၊မဟာအောင်မြေမြို့နယ်၊ ၃၅ လမ်း၊ ၈၅ လမ်းနှင့် ၈၆ လမ်းကြားရှိ ကော်ဖီဆိုင်တစ်ဆိုင်အနီး၌ နိုဝင်ဘာ ၁၈ ရက်(ယနေ့)နံနက်ပိုင်းက ဗုံးပေါက်ကွဲမှုဖြစ်ပွားခဲ့ကြောင်း သိရသည်။
ယနေ့နံနက် ၁၁ နာရီခန့်က ၃၅ လမ်း၊ ၈၅ လမ်းနှင့် ၈၆ လမ်းကြားရှိ ကော်ဖီဆိုင်တစ်ဆိုင်အနီးတွင် ဗုံးပေါက်ကွဲမှုဖြစ်ပွားခဲ့သဖြင့် ဆိုင်ရှေ့၌ကော်ဖီထိုင်သောက်နေသည့် အသက်(၆၀)နှစ်အရွယ်ခန့်ရှိ အမျိုးသား ၁ ဦး၏ ဘယ်ဘက်နားထင်၌ မိုင်းစထိမှန်ဒဏ်ရာရရှိခဲ့သည်။
ထို့ကြောင့် ထိခိုက်ဒဏ်ရာရရှိသူအား မန္တလေးပြည်သူ့ဆေးရုံကြီးသို့ ဆေးကုသမှုခံယူရန်ပို့ ဆောင်စဥ် သေဆုံးသွားခဲ့သည်ဟု သိရသည်။
“သူက ကော်ဖီသောက်နေတုန်း ဗုံးပေါက်သွားတာ ချက်ခြင်းဆေးရုံပို့ပေးပေမယ့် နားထင်ကိုထိသွားတာဆိုတော့ ဆေးရုံပို့နေတုန်းပဲလမ်းမှာဆုံးသွားတာ ပေါက်ကွဲသံကအတော်ကျယ်တယ် စစ်ဆေးရေးတွေလုပ်နေကြတယ်”ဟု လုံခြုံရေးအဖွဲ့နှင့်နီးစပ်သူတစ်ဦးကပြောသည်။
ဗုံးပေါက်ကွဲမှုကြောင့် အခင်းဖြစ်နေရာအနီး၌ရပ်ထားသည့် Mazda Demio(အဖြူရောင်)ကား၏ ရှေ့ဘန်ဘာ၊ရှေ့မီး(၂)လုံး၊ဝဲယာဘက်မှန်(၁)စုံတို့ ပျက်စီးသွားခဲ့ကြောင်း သိရသည်။
ပြစ်မှုကျူးလွန်သူများအား ဖမ်းဆီးရမိရေးအတွက် အခင်းဖြစ်ပွားခဲ့သည့်နေရာနှင့်လမ်းများအား လုံခြုံရေးအဖွဲ့ဝင်များက ယာယီပိတ်ဆို့၍ စစ်ဆေးမှုများပြုလုပ်လျက်ရှိကြောင်း သိရသည်။
