ရွေးကောက်ပွဲ တရားမဲ့ပြုကျင့်မှု ၊ နိုင်ငံတော် သစ္စာဖောက်ဖျက်မှုအပါအဝင် ပုဒ်မပေါင်းများစွာနှင့် တရားရင်ဆိုင်နေရပြီး ဖမ်းဆီးထိန်းသိမ်းခံထားရသည့် NLD ပါတီခေါင်းဆောင် ဒေါ်အောင်ဆန်းစုကြည်နှင့် ပါတီဝင်အချို့ကို တွေ့ဆုံခွင့် ပေးခဲ့သည်ဆိုသည့် သတင်းမဟုတ်မှန်ကြောင်း သိရသည်။
လတ်တလော ထွက်ပေါ်နေသည့် အဆိုပါ သတင်းနှင့် ပတ်သက်၍ တွေ့ဆုံရန် သွားရောက်သည့်အထဲတွင် ပါဝင်သည်ဟု သတင်းထွက်နေသည့် NLD ပါတီဝင် တစ်ဦးထံ ဆက်သွယ်မေးမြန်းကြည့်စဉ် ၎င်းက ပြန်လည် ငြင်းဆိုခဲ့ခြင်း ဖြစ်သည်။
” မဟုတ်ပါဘူး။ အဲဒီသတင်းက မှားပါတယ်။ ဘယ်သူမှ တွေ့ခွင့်မရှိပါဘူး” ဟု ၎င်းက ဆိုသည်။
NLD ပါတီရုံးချုပ် ပြန်လည်ဖွင့်လှစ်ရန်ကိစ္စ၊ ၂၀၂၃ ခုနှစ် အထွေထွေရွေးကောက်ပွဲကိစ္စများအတွက် ပါတီဝင်အချို့နှင့် ဒေါ်အောင်ဆန်းစုကြည်အား တွေ့ဆုံနိုင်ရန် နစကက စီစဉ်ပေးခဲ့သည်ဟု သတင်းများထွက်ပေါ်နေခြင်းဖြစ်ပြီး ယင်းကိစ္စအပေါ် ဝေဖန်မှု မြင့်တက်နေခြင်း ဖြစ်သည်။
ယင်းသို့ သွားရောက်တွေ့ဆုံရာတွင် ယခင်လွှတ်တော်သက်တမ်းက ရန်ကုန်တိုင်း လွှတ်တော် ကိုယ်စားလှယ်တစ်ဦးဖြစ်သည့် ဒေါ်စန္ဒာမင်းပါ ပါဝင်နေသည်ဟု သတင်းပျံ့နှံ့နေပြီး ပေါ်ပြူလာနယူး(စ်)အနေဖြင့် ဆက်သွယ်မေးမြန်းစဉ် ၎င်းက ပြန်လည်ငြင်းဆိုခဲ့ခြင်းဖြစ်သည်။
ယမန်နေ့က ထွက်ပေါ်ခဲ့သည့် ကောလာဟလသတင်း တရပ်တွင် ဒေါ်အောင်ဆန်းစုကြည်အနေဖြင့် NLD ပါတီဝင်အချို့၏ တင်ပြသည့်အချက်များကို လက်ခံရန် ငြင်းဆိုခဲ့ကြောင်း ဖော်ပြခဲ့သော်လည်း ပေါ်ပြူလာနယူး(စ်) အနေဖြင့် သီးခြားအတည်ပြုနိုင်ခြင်း မရှိသေးပေ။
လက်ရှိထွက်ပေါ်နေသည့် သတင်းများနှင့် ပတ်သက်၍ နစက သတင်းမှန်ပြန်ကြားရေးအဖွဲ့ ပြောရေးဆိုခွင့်ရှိသူထံ ပေါ်ပြူလာနယူး(စ်) အနေဖြင့်ဆက်သွယ်မေးမြန်းရန် ကြိုးစားနေဆဲဖြစ်သည်။
ဒေါ်အောင်ဆန်းစုကြည်သည် ၂၀၂၁ ခုနှစ် ဖေဖေါ်ဝါရီ (၁) ရက် နံနက်အစောပိုင်းက နေပြည်တော်တွင် ဖမ်းဆီးထိန်းသိမ်းခြင်း ခံရကာ နိုင်ငံတော် သစ္စာဖောက်ဖျက်မှု၊ ရွေးကောက်ပွဲ တရားမဲ့ပြုကျင့်မှု၊ အဂတိလိုက်စားမှု၊ နိုင်ငံတော်လျှို့ဝှက်အက်ဥပဒေချိုးဖောက်မှုများအပါအဝင် အမှု (၁၉)မှုဖြင့် တရားရင်ဆိုင်နေရခြင်း ဖြစ်သည်။
လက်ရှိတွင် ဒေါ်အောင်ဆန်းစုကြည်အား နေပြည်တော် ထောင်တွင်းတရားရုံးမှ အမှု (၁၁) မှုအတွက် ထောင်ဒဏ် (၂၀) နှစ် ချမှတ်ထားပြီး အမှု (၈) မှုကို ဆက်လက်ရင်ဆိုင်နေရဆဲ ဖြစ်သည်။
၂၀၂၃ ရွေးကောက်ပွဲ ရှေ့ပြေးလုပ်ငန်းစဉ်တရပ်အနေဖြင့် နိုင်ငံရေးပါတီများကို UEC က စစ်ဆေးခြင်းများ လုပ်ဆောင်နေပြီး NLD ပါတီမှာ စစ်ဆေးရန် ကျန်ရှိနေသည့် ပါတီစာရင်းတွင် ပါဝင်နေခြင်း ဖြစ်သည်။
