နစကနှင့် (၂) ကြိမ်တိုင်တိုင် တွေ့ဆုံထားသည့် အပစ်ရပ်အဖွဲ့ (၇) ဖွဲ့အား၂၀၀၈ ဖွဲ့စည်းပုံ ပြင်ဆင်ရေး အပါအဝင် ငြိမ်းချမ်းရေး ကိစ္စရပ်များ ဆွေးနွေးရန် ဖိတ်ကြားမှုကို လက်ခံတွေ့ဆုံရန် အဆင်သင့်မဖြစ်သေးကြောင်း အကြောင်းပြန်ကြားခဲ့သည်ဟု ဖိတ်ကြားခံရသည့် အဖွဲ့များထံမှ သိရသ ည်။
ဗိုလ်ချုပ်ကြီးရာပြည့်ဦးဆောင်သည့် အမျိုးသားစည်းလုံး ညီညွှတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီက EAOs (၇) ဖွဲ့၏ ဥက္ကဋ္ဌများထံ လိပ်မူကာ ဖိတ်ကြားစာကို ပြီးခဲ့သည့် ဒီဇင်ဘာ (၁၉) ရက်က ပေးပို့ခဲ့ခြင်း ဖြစ်ကြောင်း သိရသည်။
အဆိုပါ တွေ့ဆုံဆွေးနွေးရန် ကမ်းလှမ်းမှုအား PPST အဖွဲ့ဝင်များဖြစ်သည့် တိုင်းရင်းသား လက်နက်ကိုင်အဖွဲ့ (၇) ဖွဲ့၏ ထိပ်ပိုင်းခေါင်းဆောင်များအကြား ဆွေးနွေးကာ ယခုလို အကြောင်းပြန်ခဲ့ခြင်းဖြစ်ကြောင်း PPST ၏ ပြော ရေးဆိုခွင့်ရှိသူ ဗိုလ်မှူးကြီး စောကျော်ညွန့်ထံ ပေါ်ပြူလာနယူး(စ်)က ဆက်သွယ်မေးမြန်းစဉ် ပြောကြားခဲ့ခြင်း ဖြစ် သည်။
” ကျွန်တော်တို့ မနေ့တုန်းကပဲ EAOs (၇) ဖွဲ့က ခေါင်းဆောင်တွေ တိုင်ပင်ညှိနှိုင်းမှုလုပ်တယ်။ တိုင်ပင် ညှိနှိုင်းမှုတွေ လုပ်တဲ့အခါကျတော့ တချို့အဖွဲ့အစည်းတွေရဲ့ ခေါင်းဆောင်တွေကလည်း လက်ရှိမှာ ကျန်းမာရေးအခြေအနေအရ သွားဖို့လာဖို့အဆင်မပြေတာ ရှိသလို အချိန်အခါအရကလည်း အဖွဲ့အတွင်းမှာ အချိတ်အဆက် လုပ်ဖို့ကလ ည်း နည်းနည်း အကြပ်အတည်းဖြစ်တဲ့အတွက် (၇) ဖွဲ့ကို ဖိတ်ကြားလာတဲ့အပေါ်မှာ တက်ရောက်ဖို့ အခက်အခဲရှိတယ်။ မတက်ရောက်နိုင် သေးဘူး ” ဟု ဗိုလ်မှူးကြီး စောကျော်ညွန့်က ပေါ်ပြူလာနယူး (စ်) သို့ ပြောသည်။
ဗိုလ်ချုပ်ကြီးရာပြည့် ဦးဆောင်သည့် အမျိုးသားစည်း လုံး ညီညွှတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ၏ ဖိတ်ကြားစာတွင် လာမည့် ဒီဇင်ဘာ (၂၇/၂၈/၂၉/၃၀) ရက်များတွင် ဖွဲ့စည်းပုံ ပြင်ဆင်ရေး အပါအဝင် ငြိမ်းချမ်းရေး ကိစ္စရပ်များ ဆွေးနွေးရန် ပါဝင်ကြောင်း သိရသည်။
လက်ရှိဖိတ်ကြားခံရသည့် EAOs အဖွဲ့ (၇) ဖွဲ့သည် NCA လက်မှတ်ရေးထိုးထားပြီး ဗိုလ်ချုပ်မှူးကြီး မင်းအောင် လှိုင်၏ ငြိမ်းချမ်းရေး ဖိတ်ခေါ်မှုအရ (၂) ကြိမ်တိုင် တွေ့ ဆုံဆွေးနွေးထားသည့် အဖွဲ့များလည်း ဖြစ်သည်။
ယင်းသို့ တွေ့ဆုံဆွေးနွေးရာတွင် တစ်ဖွဲ့ချင်း လက်ခံတွေ့ ဆုံရခြင်းဖြစ်ပြီး နစကဖက်မှ ပေးထားသည့် အစီအစဉ်အတိုင်းသာ ဆွေးနွေးရသည့်အပေါ် အခက်အခဲများ ရှိသ ည့်အတွက် အလွတ်သဘော ကြိုတင်တွေ့ဆုံဆွေးနွေးရန် EAOs အဖွဲ့ (၇)ဖွဲ့က ဗိုလ်ချုပ်ကြီး ရာပြည့်ဦးဆောင်သည့် ကော်မတီထံ ပြီးခဲ့သည့် နိုဝင်ဘာ(၂၈) ရက်ကအကြောင်း ကြားစာပေးပို့ ခဲ့ကြောင်း သိရသည်။
” ကျွန်တော်တို့ အလွတ်သဘော တွေ့ကြရအောင် ။ လွတ်လွတ်လပ်လပ် ပွင့်ပွင့်လင်းလင်း တွေ့ဆုံညှိနှိုင်းပြီးတော့ နှစ်ဖက်စလုံးအတွက် အဆင်ပြေမယ့် နေရာ ၊ နှစ်ဖက်စလုံးအတွက် အဆင်ပြေမယ့်အချိန်၊ နှစ်ဖက်စလုံးအတွက် အဆင်ပြေမယ့် အစီအစဉ်တွေ အတွက် အလွတ်သဘောကြိုတင်ဆွေးနွေးပြီးမှ ခုဏက ပြောတဲ့ ငြိမ်းချမ်းရေး ဆွေးနွေးပွဲတို့ ၊ နိုင်ငံရေးဆွေးနွေးပွဲတို့ လုပ်ရင် နှစ်ဖက်စလုံးအတွက် Win – Win ဖြစ်တာပေါ့ဗျာ ” ဟု ဗိုလ်မှူကြီး စောကျော်ညွန့်က ပြောသည်။
ယင်းသို့ ကမ်းလှမ်းခဲ့စဉ်ကလည်း ဗိုလ်ချုပ်ကြီးရာပြည့် ဦးဆောင်သည့် နစက၏ ငြိမ်းချမ်းရေး ဖော်ဆောင်မှု ညှိ နှိုင်းရေး ကော်မတီဖက်မှ အဆင်သင့်မဖြစ်သေးကြော င်း အကြောင်းပြန်ကြားခဲ့သည်ဟု သိရသည်။
” သူတို့ဖက်က လက်မခံဘူးဆိုတာထက် လက်ခံမလိုလိုနဲ့ နောက်ပိုင်းကျတော့ အဆင်သင့်မဖြစ်ဘူး ၊ အဆင်မပြေသေးဘူး ဆိုတဲ့သဘော ကျွန်တော်ကတော့ စာအသွား အလာအရ အဲဒီလို နားလည်မှု ရှိတယ် ” ဟု ၎င်းက ဆိုသ ည်။
ဗိုလ်ချုပ်ကြီး ရာပြည့် ဦးဆောင်သည့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီအနေဖြင့် ပြီးခဲ့သည့် နိုဝင် ဘာလအတွင်းကလည်း နိုင်ငံရေးပါတီများ အစုအဖွဲ့မှ ပါတီထိပ်ပိုင်းခေါင်းဆောင်များနှင့် တွေ့ဆုံကာ ဖွဲ့စည်းပုံ ပြင်ဆင်ရေးအတွက် အချက် (၁၁) ချက် ဆွေးနွေးခဲ့ကြသေးကြောင်း သိရသည်။
ယခု တပေါင်းတစည်းတည်း တွေ့ဆုံရန် ကမ်းလှမ်းခြင်း ခံရသည့် EAOs အဖွဲ့ (၇) ဖွဲ့မှာ PPST အဖွဲ့ဝင်များ ဖြစ်သည့် ရှမ်းပြည်ပြန်လည်ထူထောင်ရေးကောင်စီ (RCSS)၊ ဒီမိုကရေစီအကျိုးပြု ကရင်တပ်မတော် (DKBA)၊ ကရင်အမျိုး သားအစည်းအရုံး/ ကရင်အမျိုးသားလွတ်မြောက် ရေးတပ်မတော် (ငြိမ်းချမ်းရေးကောင်စီ) (KNU/KNLA PC)၊ လားဟူ ဒီမိုကရက်တစ် အစည်းအရုံး (LDU)၊ ရခိုင်ပြည်လွတ်မြောက်ရေးပါတီ (ALP)၊ ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO)နှင့် မွန်ပြည်သစ်ပါတီ (MNS P) တို့ ဖြစ်ကြောင်း သိရသည်။
