ကရင်ပြည်နယ်ရှိ မြဝတီ-ကော့ကရိတ်သွား အာရှလမ်းမကြီးတွင် ဒီဇင်ဘာ ၂၂ ရက်ကဖြစ်ပွားခဲ့သည့် ထိတွေ့တိုက်ပွဲများနှင့်တော်နော်ရေတံခွန်အနီးရှိ ချောင်းကူးတံတားတို့ မိုင်းထောင်ဖောက်ခွဲဖျက်ဆီးခံခဲ့ရသဖြင့် အာရှလမ်းမကြီးအား ဖြတ် သန်းသွားလာခွင့်ယာယီပိတ်ထားကြောင်း သိရသည်။
“လုံခြုံရေးအခြေအနေအရ အတက်/အဆင်း ပိတ်ထားတယ် ကော့ကရိတ်ကပြန်အဆင်းနားလောက်မှာဆိုရင် တွဲကားနဲ့ပိတ်ထားတာ ဆိုင်ကယ်တွေကအစသွားလို့မရဘူး လုံခြုံရေးအခြေအ နေအရပိတ်ထားတဲ့သဘောပေါ့”ဟု မြဝတီမြို့အခြေစိုက်လူမှုကူညီရေးအသင်းဝင်တစ်ဦးကပြောသည်။
ထိုသို့ အာရှလမ်းမကြီးအား ဖြတ်သန်းသွားလာခွင့်ပိတ်ထားသဖြင့် မဖြစ်မနေသွားလာရမည့်သူ များသည် ကားကြီးများနှင့်ကားအောက်ပိုင်းမြင့်သည့်ကားများသာသွားလာနိုင်သော ထော့်ကော်ကိုးလမ်းမှသာ သွားလာနေရသည်ဟု သိရသည်။
“မြဝတီနဲ့ကော့ကရိတ်ကိုသွားတဲ့လမ်းက ၃ လမ်းရှိတယ် အာရှလမ်းရယ် အရင်လမ်းဟောင်းရယ် ထော့ကော်ကိုးလမ်းရယ်ပေါ့ လမ်းဟောင်းကလည်းသွားလာလို့ မရဲကြတဲ့အတွက် ထော့ကော်ကိုးလမ်းကပဲသွားနေကြတာများတယ် လမ်းက တော့အတော်ကြမ်းတယ် မြေသားလမ်းပါ”ဟု လူ မှုကူညီရေးအသင်းဝင်ကပြောသည်။
လက်ရှိအချိန်၌ အာရှလမ်းမကြီးအား ဖြတ်သန်းသွားလာရန်စောင့်ဆိုင်းနေသည့် ကုန်တင်ကားများ၊ခရီးသည်တင်ကားများနှင့်ကိုယ်ပိုင်ကားများ သည် ရာချီရှိနေကာ ရောက်ရှိသည့်နေရာ၌ရပ်တန့်၍ ဖြတ်သန်းခွင့်ရမည့်အချိန်အား စောင့်ဆိုင်းကြကြောင်း သိရသည်။
ထိုသို့ စောင့်ဆိုင်းနေရသဖြင့် ထိုင်းနိုင်ငံဘက်သို့ပို့ရန် ကုန်တင်ကားများပေါ်တွင်တင်ဆောင်လာသည့် အသီးအနှံများနှင့်ဟင်းသီးဟင်းရွက်များအား ပျက်စီးမည်ကိုစိုးရိမ်၍ ပြန်လည်ရောင်းချမှုများလည်းရှိနေကြောင်း သိရသည်။
“ပုတ်ကုန်ပေါ့ ဟင်းသီးဟင်းရွက်တွေက လမ်းကဘယ်အချိန်မှဖြတ်လို့ရမလဲဆိုတာလည်းမသိရတော့ စျေးလျော့ပြီး စရိတ်ကျေအောင်ပြန်ရောင်းနေကြတဲ့သဘောပါ တစ်ချို့ကားတွေဆိုရင်ပြန်လှည့်သွားကြတယ်”ဟု လူမှုကူညီရေးအသင်းဝင်ကပြောသည်။
လက်ရှိအချိန်၌ အာရှလမ်းမကြီးအားဖြတ်သန်းသွားလာခွင့်ပိတ်ထားရာတွင် မြဝတီမြို့သို့သွားမည့်ကားများအား တံတားကျိုးစစ်ဆေးရေးဂိတ်နှင့် မြဝတီမြို့ဘက်မှ ကော့ကရိတ်မြို့ဘက်သို့သွား လာမည့်ကားများအား သင်္ဃန်းညီနောင်ရှိ အာရှလမ်းသစ်လမ်းဆုံတို့မှစ၍ ဖြတ်သန်းခွင့်ပိတ်ထားကြောင်း သိရသည်။
Photo-ဘီဝမ်း
