ရန်ကုန်တိုင်းနှင့်ပဲခူးတိုင်း(အရှေ့ပိုင်း)သို့ ဓာတ်အားပို့လွှတ်ဖြန့်ဖြူးလျက်ရှိသည့် ၂၃၀ ကေဗွီ တောင်ငူ-သာယာကုန်းဓာတ်အားလိုင်း၏ တာဝါတိုင် ၁ တိုင်ဖောက်ခွဲဖျက်ဆီးခံရမှုနှင့်သဘာဝ ဓာတ်ငွေ့သုံးဓာတ်အားပေးစက်ရုံများမှ ဓာတ်အားထုတ်လုပ်ပေးနိုင်မှုအခြေအနေတို့နှင့်ပတ်သက်၍ ရန်ကုန်လျှပ်စစ်ဓာတ်အားပေးရေးကော်ပိုရေးရှင်း(YESC)က အသိပေးခဲ့ခြင်းဖြစ်သည်။
ရန်ကုန်တိုင်းနှင့်ပဲခူးတိုင်း(အရှေ့ပိုင်း)သို့ ဓာတ်အားပို့လွှတ်ဖြန့်ဖြူးလျက်ရှိသည့် ၂၃၀ ကေဗွီ တောင်ငူ-သာယာကုန်းဓာတ်အားလိုင်း၏ ကျောက်တံခါးမြို့အနီးရှိ တာဝါတိုင် ၁ တိုင်အား PDF အဖွဲ့ဝင်များက ဒီဇင်ဘာ ၃၁ ရက်ည ၁ နာရီတွင် ဖောက်ခွဲဖျက်ဆီးခဲ့ကြသည်ဟု YESC က အသိပေးခဲ့သည်။
ထို့ကြောင့် တာဝါတိုင်တိမ်းစောင်းသွားခဲ့၍ လျှပ်စစ်စွမ်းအားဝန်ကြီးဌာနမှဝန်ထမ်းများမှ ဇန်နဝါရီ ၁ ရက်နေ့လည် ၁ နာရီမှစတင်ကာ တာဝါတိုင်လဲ ကျ၍ ဓာတ်အားပြတ်တောက်မှုမဖြစ်ပေါ်စေရန် အမြန်ဆုံးပြင်ဆင်လျက်ရှိသည်ဟု YESC ကအ သိပေးခဲ့သည်။
ထို့ပြင် ပုံမှန်ထိန်းသိမ်းပြုပြင်ရေးလုပ်ငန်းများ ဆောင်ရွက်နေသည့် ရတနာကမ်းလွန် သဘာဝ ဓာတ်ငွေ့စီမံကိန်းမှ ပုံမှန်ပို့လွှတ်နေသော ဓာတ်ငွေ့ပမာဏထက်လျှော့ချပို့လွှတ်နေစဉ် ဒီဇင်ဘာ ၃၁ ရက်နံနက် ၁၁ နာရီ၌ ရတနာကမ်းလွန်ပလက် ဖောင်းပေါ်ရှိ ဓာတ်ငွေ့ဖိအားထိန်းချုပ်စနစ်ချို့ ယွင်းကာ မူလဓာတ်ငွေ့ပို့လွှတ်မှုပမာဏထက်လျော့ကျခဲ့သည်။
ထို့ကြောင့် ရန်ကုန်တိုင်းအတွင်းရှိ သဘာဝဓာတ် ငွေ့စက်ရုံများမှ စုစုပေါင်းထုတ်လုပ်မှု ၅၃၀ မဂ္ဂါဝပ်ခန့်လျော့နည်းခဲ့၍ ရေအားလျှပ်စစ်ဓာတ်အားပေးစက်ရုံများမှ ဓာတ်အားတိုးမြှင့်ထုတ်လုပ်ခြင်း၊ဓာတ်အားစနစ်ကွန်ရက်တည်ငြိမ်မှုရှိစေရန် အခြား ၂၃၀ ကေဗွီ ဓာတ်အားလိုင်းများမှ ဝန်အားမျှ၍ ပို့လွှတ်ဖြန့်ဖြူးခြင်းများကို ဆောင်ရွက်လျက်ရှိသည်ဟု YESC ကအသိပေးခဲ့သည်။
လျှပ်စစ်စွမ်းအားဝန်ကြီးဌာနမှ ၂၃၀ ကေဗွီ တောင်ငူ-သာယာကုန်း မဟာဓာတ်အားလိုင်း တာဝါတိုင်အား အမြန်ဆုံးပြုပြင်လျက်ရှိပြီး ရတနာကမ်းလွန်သဘာဝဓာတ်ငွေ့စီမံကိန်းမှ သဘာဝ ဓာတ်ငွေ့အမြန်ဆုံး ပြန်လည်ရရှိရေးကိုလည်း ဆောင်ရွက်လျက်ရှိသည်။
ထိုသို့ ဆောင်ရွက်နေချိန်၌ ဓာတ်အားထိန်းညှိဖြန့် ဖြူးခြင်းများဆောင်ရွက်ရမှုကို ပြည်သူလူထုအနေဖြင့် နားလည်ပေးပါရန် YESC ကအသိပေးထုတ်ပြန်ခဲ့သည်။
