နစက ဥက္ကဋ္ဌ၊ ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်ထံ ရုရှားနိုင်ငံ၊သမ္မတ မစ္စတာ ဗလာဒီမာ ပူတင်က ဇန်နဝါရီ ၄ ရက်(ယနေ့)တွင်ကျရောက်သည့် မြန်မာနိုင်ငံ၏ (၇၅)နှစ်မြောက် စိန်ရတုလွတ်လပ်ရေးနေ့ ဝမ်းမြောက်ကြောင်းသဝဏ်လွှာပေးပို့ခဲ့သည်။
မြန်မာနိုင်ငံနှင့် ရုရှားနိုင်ငံတို့ကိုစည်းနှောင်းထားသည့် ချစ်ကြည်ရင်းနှီးသောဆက်ဆံရေးကို ၂၀၂၂ ခုနှစ်၊စက်တင်ဘာလအတွင်း ဗလာဒီဗော့စတော့မြို့၌ မိမိတို့၏နှစ်ဖက်တွေ့ဆုံမှုက အပြည့်အဝခိုင်မာစေခဲ့ပါသည်ဟု သဝဏ်လွှာ၌ ရေးသားထားသည်။
နှစ်နိုင်ငံကြားရရှိထားပြီးဖြစ်သည့် သဘောတူညီချက်များသည် နှစ်နိုင်ငံပြည်သူများ၏ အကျိုးစီးပွားနှင့်ဒေသတွင်းတည်ငြိမ်မှုနှင့်လုံခြုံမှုတိုးမြှင့်စေရေးတို့အတွက် နယ်ပယ်စုံရှိ နှစ်နိုင်ငံဆက်ဆံရေးကို ပိုမိုဖွံ့ဖြိုးတိုးတက်စေနိုင်ရန် အထောက်အကူဖြစ်စေမည်ဟု ယုံကြည်ပါသည်ဟု သဝဏ်လွှာ၌ ရေးသားထားသည်။
ထို့ပြင် အဆွေတော်ကျန်းမာ၍ အောင်မြင်မှုများရရှိပါစေကြောင်းနှင့်မြန်မာပြည်သူများ ငြိမ်းချမ်း သာယာဝပြောပါစေကြောင်း ဆုမွန်ကောင်းတောင်းအပ်ပါသည်ဟုလည်း ရေးသားထား သည်။
ရာရှားနိုင်ငံ သမ္မတ ဗလာဒီမာ ပူတင်နည်းတူ ရုရှားနိုင်ငံ၊ ဝန်ကြီးချုပ် မစ္စတာ မီခေးလ် မီရှုစတင်မှလည်း နစက ဥက္ကဋ္ဌ၊ ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်ထံ မြန်မာနိုင်ငံ၏ (၇၅)နှစ် မြောက် စိန်ရတုလွတ်လပ်ရေးနေ့အတွက် ဝမ်းမြောက်ကြောင်းသဝဏ်လွှာပေးပို့ခဲ့သည်။
အဆိုပါ သဝဏ်လွှာ၌ မြန်မာနိုင်ငံနှင့်ရုရှားနိုင်ငံကို ချစ်ကြည်ရင်းနှီးသည့် မိတ်ဖက်ဆက်ဆံရေးဖြင့် စည်းနှောင်ထားကာ နှစ်နိုင်ငံအစိုးရများကြား တက်ကြွသည့် ပူးတွဲဆောင်ရွက်မှုများသည် ကုန်သွယ်ရေး၊စီးပွားရေး၊သိပ္ပံနှင့်နည်းပညာနှင့်လူ သားချင်းစာနာမှုဆိုင်ရာနယ်ပယ်များရှိ ပူးပေါင်းဆောင်ရွက်မှုများကို ပိုမိုခိုင်မာစေမည်ဖြစ်ပြီး အလားအလာရှိသောစီမံကိန်းများ တိုးမြှင့်စေရန် အခြေအနေကောင်းများကို ဖြစ်ထွန်းရရှိမည်ဟု ယုံကြည်ပါသည်ဟု ရေးသားထားသည်။
ထို့ပြင် နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးဝဏ္ဏမောင်လွင်ထံသို့ ရုရှားနိုင်ငံ၊နိုင်ငံခြားရေးဝန်ကြီး မစ္စတာ ဆာဂျီ လဗ် ရော့ဗ် မှ ၂၀၂၂ ခုနှစ်၊ဩဂုတ်လတွင် နေပြည်တော်၌ မိမိတို့၏ ဆွေးနွေးမှုများအတွင်း ရရှိခဲ့သည့် သဘောတူညီချက်များအောက်မှ ယုံကြည်စိတ်ချရသည့် နိုင်ငံရေးဆွေးနွေးပွဲနှင့်ထိတွေ့ဆက်ဆံမှုများကို စဉ်ဆက်မပြတ်မြှင့်တင်သွားရန် မျှော်လင့်လျက်ရှိကာ ကဏ္ဍစုံပူးပေါင်းဆောင်ရွက်မှုများကို ခိုင်မာစေခြင်းမှ မိမိတို့နှစ်နိုင်ငံ ပြည်သူများ၏ အဓိကအကျိုးစီးပွားများကို ထွန်းကားစေမည်ဖြစ်ပြီး အရှေ့တောင်အာရှနှင့်အာရှ-ပစိဖိတ်ဒေသတစ်ခုလုံး၏ ငြိမ်းချမ်းရေးနှင့် လုံခြုံရေးကို ထိန်းသိမ်းရာတွင်လည်း အကျိုးပြုစေမည်ဟု ယုံကြည်ပါသည်ဟုရေးသားထားသော ဝမ်းမြောက်ကြောင်း သဝဏ်လွှာပေးပို့ခဲ့သည်။
