လတ်တလော ရခိုင်ပြည်နယ်တွင် ဖြစ်ပေါ်နေသည့်အခြေအနေအပေါ်တွင် ဝါရင့်နိုင်ငံရေးသမားတစ်ဦးဖြစ်သည့် ဒေါက်တာအေးမောင်က ဟင်္သာကိုးသောင်း ဥပမာကိုခှိုင်းနှိုင်းကာ သတိပေးပြောကြားသွားသည်။
ရခိုင်ပြည်လွတ်မြောက်ရေးပါတီ စစ်ဦးချုပ် ဗိုလ်ချုပ်ခိုင်စိုးမြနှင့် အရာရှိ(၂) ဦး ပြီးခဲ့သည့် ရက်ပိုင်းအတွင်းက ရခိုင်ပြည်နယ် ၊ စစ်တွေမြို့ပေါ်တွင် လုပ်ကြံခံရမှုနှင့် ပတ်သက်၍ မေးမြန်းစဉ် ရခိုင်ဦးဆောင်ပါတီဥက္ကဋ္ဌ ဒေါက်တာအေးမောင်က ပေါ်ပြူလာနယူး(စ်) သို့ ပြောကြားခဲ့ခြင်း ဖြစ်သည်။
” ဒီအခင်းအကျင်းကို လက်ခံတဲ့ လူထုကတော့ အင်မတန်ရာခိုင်နှုန်း နည်းနိုင်ပါတယ်။ ဘာကြောင့်ပဲ သတ်သတ်ပေါ့ဗျာ။ ကိုယ့် ရခိုင်ဒေသမှာ ကိုယ့် ရခိုင် လူမျိုးအချင်းချင်းလို့ပဲ လက်ခံမှာပေါ့။ ကျွန်တော်တို့လည်း ခဏခဏ ပြောပါတယ်။ ဇာတ်တူသားစားရင် ဟင်္သာကိုးသောင်း ပျက်တယ်ဆိုတာ နိပါတ်တော် လာတယ်။ ဆင်ခြင်သင့်တဲ့ ကာလလည်း ဖြစ်တယ်ဗျာ” ဟု ဒေါက်တာအေးမောင်က ပြောသည်။
အဆိုပါ ဖြစ်စဉ်နှင့် ပတ်သက်၍ ရခိုင်ပြည်သူလူထုအနေဖြင့် လုံခြုံရေးအခြေအနေပေါ် သံသယဝင်စရာရှိပြီး ဆန့်ကျင်ဖက်အဖွဲ့အစည်းများအနေဖြင့်လည်း တရားဥပဒေအရ ညှိနှိုင်းဆွေးနွေးမှုများသာ လုပ်ဆောင်သင့်ကြောင်းလည်း ဆိုသည်။
” ဘယ်လိုပဲဖြစ်ဖြစ် သွေးမြေကျတာကတော့ မကောင်းဘူး။ ရခိုင်လူထုကတော့ မလုံခြုံဘူးဆိုတာကို ခံစားရမှာပေါ့။ ရခိုင်ပြည်ရဲ့ မြို့တော်ပဲလေ။ အုပ်ချုပ်မှုယန္တရားပေါ်မှာ သွားပြီးတော့ လူထုယုံကြည်မှု လျော့နိုင်တာပေါ့။ ဆန့်ကျင်ဖက်အဖွဲ့အစည်းတွေ ဖြစ်ရင်တောင်မှ တရားဥပဒေအတိုင်းပဲ ဆွေးနွေးကြစေချင်တယ်။ ညှိနှိုင်းကြစေချင်တယ်” ဟု ၎င်းက ပြောသည်။
ပြီးခဲ့သည့် ဇန်နဝါရီလ (၄) ရက် နံနက်ပိုင်းက ရခိုင်ပြည်နယ် ၊ စစ်တွေမြို့ပေါ်တွင် ရခိုင်ပြည်လွတ်မြောက်ရေးပါတီ စစ်ဦးချုပ်နှင့် အရာရှိ(၂) ဦးလိုက်ပါလာသည့် မော်တော်ယာဉ်ကို သေနတ်သမားများက ပစ်ခတ်လုပ်ကြံခဲ့သည့်အတွက် စစ်ဦးစီးချုပ် ဗိုလ်ချုပ်ခိုင်စိုးမြနှင့် အရာရှိ (၂) ဦး သေဆုံးသွားခဲ့ခြင်း ဖြစ်သည်။
အဆိုပါ ဖြစ်စဉ်နှင့် ပတ်သက်၍ ရခိုင်အမျိုးသားအဖွဲ့ချုပ်/ရခိုင့်တပ်တော်(ULA/AA)၏ လက်ချက်ဖြစ်ကြောင်း ရခိုင်ပြည်လွတ်မြောက်ရေးပါတီဖက်မှ ပြောကြားထားသည်။
ယင်းပြောကားချက်နှင့် ပတ်သက်၍ ULA/AA ၏ ပြောရေးဆိုခွင့်ရှိသူ ဦးခိုင်သုခက ALP ၏ ပြောကြားချက်မှာ အခြေအမြစ်မရှိသည့် စွတ်စွဲပြောဆိုမှုသာ ဖြစ်ကြောင်း ပြန်လည်ချေပပြောဆိုထားသည်။
လက်ရှိတွင် ရခိုင်ပြည်နယ်အတွင်း တကျော့ပြန်စစ်ပွဲများ ရပ်နားထားရန် မြန်မာ့ တပ်မတော်နှင့် AAတို့အကြား သဘောတူညီမှု ရယူထားသည့်အတွက် ပြန်လည်တည်ငြိမ်စပြုလာချိန်တွင် ယခုဖြစ်စဉ် ဖြစ်ပေါ်လာခြင်းအပေါ် ရခိုင်လူထုအနေဖြင့်လည်း စိုးရိမ်မကင်းဖြစ်ပေါ်နေကြရသည့် အခြေအနေသို့ ရောက်ရှိနေခြင်း ဖြစ်သည်။
ALP ပါတီသည် NCA လက်မှတ်ရေးထိုးထားသည့်အပြင် နစက ဥက္ကဋ္ဌ အပါအဝင် ဗိုလ်ချုပ်ရာပြည့် ဦးဆောင်သည့် ငြိမ်းချမ်းရေးဖော်ဆောင်ရေးအဖွဲ့နှင့်လည်း (၃) ကြိမ်တိုင် တွေ့ဆုံဆွေးနွေးထားသည့်အဖွဲ့တစ်ဖွဲ့ဖြစ်သည်။
