ယနေ့ဇန်နဝါရီ (၈) ရက် နံနက်ပိုင်းတွင်း တရုတ် – မြန်မာနယ်စပ် ကျယ်ခေါင်မြို့နှင့် ထိစပ်နေသည့် နယ်စပ်ဂိတ် (၃) ခုကို ပြန်လည်ဖွင့်လှစ်မည်ဟု မူလကကြေညာထားသော်လည်း ကိုဗစ်(၁၉) ရောဂါ ကူးစက်မှုအခြေအနေကြောင့် မြန်မာဖက်မှ ဆိုင်းငံ့ထားကြောင်း သိရသည်။
မူလက ဇန်နဝါရီလ (၈) ရက် ၊နံနက် (၈) နာရီမှ စတင်ကာ တပြိုင်နက်တည်း ပြန်လည်ဖွင့်လှစ်ပေးသွားမည်ဖြစ် ကြောင်း တရုတ်သံရုံးမှ အသိပေးထားသော်လည်း ယနေ့ နံနက်ပိုင်းတွင် နန်းတော်ဂိတ်အား တရုတ်နိုင်ငံဖက်မှ ဖွင့်ပေးခဲ့သော်လည်း မြန်မာဖက်အခြမ်းတွင် ပိတ်ထားဆဲ ဖြစ်ကြောင်း သိရသည်။
” မနေ့က မူဆယ်မှာ အစည်းဝေးလုပ်တယ် ။ ဒီအစည်းဝေးက ဘာလဲဆိုတော့ တစ်ဖက်နိုင်ငံ ရွှေလီမြို့မှာ ကိုဗစ်ရောဂါတွေ့ရှိနှုန်းတွေ တအားများနေတယ်။ တကယ်လို့များ ဂိတ်ဖွင့်လိုက်ရင် သေချာပေါက်မူဆယ်ဖက်အခြမ်းကို ဝင်လာမှာ ။ မူဆယ်ကနေပြီးတော့ ဗမာပြည်ထဲကို ရောက်မယ်။ ဒါ့ကြောင့် မနေ့က အစည်း အဝေးကနေပြီးတော့ ကိုဗစ်ကျန်းမာရေးကို ရှေးရှုပြီးတော့ကျန်းမာ ရေးအကြောင်းပြချက်နဲ့ ဗမာဖက်အခြမ်းကတော့ မဖွင့်သေး ပါဘူး” ဟု မူဆယ်ဆန်စပါးကုန်စည်ဒိုင် ဥက္ကဋ္ဌ ဦးမင်းသိ မ်းက အခြေအနေကို ရှင်းပြသည်။
ယင်းကဲ့သို့ မြန်မာဖက်အခြမ်းမှ နယ်စပ်ဂိတ်များ ပြန်လည်ဖွင့်လှစ်ခြင်း မရှိသော်လည်း မူဆယ် – ကျယ်ခေါင် နယ်စပ် အကြီးဆုံးဝင်ထွက်ပေါက်ဖြစ်သည့် နန်းတော်ဂိတ်ကို တရုတ်နိုင်ငံဖက်အခြမ်းမှ ယနေ့ နံနက် (၈) နာရီတွင် ပြန်လည်ဖွင့်လှစ်ပေးလိုက်ကြောင်း သိရသည်။
ပြီးခဲ့သည့် ရက်ပိုင်းအတွင်းက ကြေညာခဲ့သည့် နယ်စပ်ဂိတ်များ ပြန်လည်ဖွင့်လှစ်မည်ဆိုသည့် သတင်းကြောင့် တရုတ်နိုင်ငံဖက်အခြမ်းသို့ ဝင်ရောက်ရန်လာရောက်စောင့်ဆိုင်းသည့် ပြည်သူရာနှင့်ချီ ရှိခဲ့ပြီး သတင်းစုံစမ်းသူများလည်း ရှိခဲ့ကြောင်း ယနေ့နံနက်ပိုင်း နန်းတော်ဂိတ် မူဆယ်ဖက်အခြမ်းသို့ ရောက်ရှိခဲ့သည့် သတင်းရင်းမြစ်တ စ်ဦးက ပေါ်ပြူလာနယူး(စ်) သို့ ပြောပြသည်။
လတ်တလောတွင် အဆိုပါ ဂိတ်မဖွင့်သည့် ကိစ္စနှင့် ပတ်သက်၍ ကောလာဟလသတင်းများလည်း ထွက်ပေါ်နေပြီး နယ်စပ်ဖြတ်ကျော်ခွင့် စာအုပ် ဈေးနှုန်းများ အဆမတန်မြင့်နေသည့်အတွက် ညှိနှိုင်းနေရသည်ဆိုသည့် သတင်းကိုကြားရကြောင်း ၎င်းက ဆိုသည်။
အဆိုပါ ကိစ္စနှင့် ပတ်သက်၍ မေးမြန်းကြည့်စဉ် အခြေအမြစ်မရှိသည့် ကောလာဟလသတင်းများသာ ဖြစ် ကြောင်း ဦးမင်းသိမ်းက ပေါ်ပြူလာနယူး(စ်) သို့ ပြောသည်။
” မဟုတ်ပါဘူး။ လုံးဝမဖြစ်နိုင်တဲ့ ကိစ္စတွေ။ လဝက ကဂိတ်မဖွင့်တဲ့အတွက် စာအုပ်လည်း လုပ်မပေးသေးဘူး။ နယ်စပ်ပတ်စပို့(စ်)ခေါ်တာပေါ့။ ဒါမဖြစ်နိုင်ပါဘူး” ဟု ဦးမင်းသိမ်းက ပြောသည်။
လက်ရှိတွင် ယမန်နေ့ အစည်းဝေး ဆုံးဖြတ်ချက်အတိုင်း မြန်မာဖက်အခြမ်းရှိ နယ်စပ်ဂိတ်များ ဆက်လက်ပိတ်ထားဆဲဖြစ်ပြီး မည်သည့်အချိန် ပြန်လည်ဖွင့်လှစ်မည်ကိုလည်း မပြောကြားသေးကြောင်း သိရသည်။
မူဆယ် – ကျယ်ခေါင် နယ်စပ်ရှိ နန်းတော်ဂိတ် ၊ ဆင်ဖြူဂိတ်နှင့် မန့်ဝိန်းဂိတ်များကို ပြီးခဲ့သည့် ၂၀၂၀ ခုနှစ်မှစ တင်ကာ ကိုဗစ်ကပ်ရောဂါ ထိန်းချုပ်ကာကွယ်ရေး စည်း ကမ်းများနှင့်အညီ နှစ်ဖက်အစိုးရမှ ပိတ်ထားခဲ့ခြင်းဖြစ်သည်။
