(၄၄)ကြိမ်မြောက် သွေးလှူရှင်များဂုဏ်ပြုပွဲနှင့်လူမှုထူးချွန်တံဆိပ်(ပထမအဆင့်)ရရှိသည့် သွေးလှူရှင် ၃၀ ဦးအား ဂုဏ်ပြုပွဲအခမ်းအနား၌ ကျန်းမာရေးဝန်ကြီးဌာန ပြည်ထောင်စုဝန်ကြီးဒေါက်တာသက်ခိုင်ဝင်း၏ပြောကြားချက်အရ သိရသည်။
(၄၄)ကြိမ်မြောက် သွေးလှူရှင်များဂုဏ်ပြုပွဲနှင့် နစက မှချီးမြှင့်သည့် လူမှုထူးချွန်တံဆိပ်(ပထမအဆင့်)ရရှိသော သွေးလှူရှင် ၃၀ ဦးအားဂုဏ်ပြုပွဲအခမ်းအနားကို ဒီဇင်ဘာ ၈ မွန်းလွဲပိုင်းက သူနာပြုတက္ကသိုလ်(ရန်ကုန်)၌ ကျင်းပခဲ့သည်။
မြန်မာနိုင်ငံတွင် အမျိုးသားသွေးဌာန ၁ ခု၊မန္တလေး၊မကွေး၊မော်လမြိုင်၊မြစ်ကြီးနား၊တောင်ကြီး ၊ပုသိမ်နှင့်နေပြည်တော်တို့ရှိ ဆေးရုံကြီးများတွင်တွဲဖက်ထားသည့် သွေးဘဏ် ၇ ခု၊ ခုတင် ၂၀၀ နှင့်ခုတင် ၁၀၀ ဆံ့ ဆေးရုံများတွင် ဓာတ်ခွဲခန်းနှင့်တွဲဖက်ဆောင်ရွက်သည့် သွေးဘဏ်များအား တိုးချဲ့ဖွဲ့စည်းထားကြောင်း သိရသည်။
ထို့ပြင် မြန်မာနိုင်ငံတစ်ဝန်းရှိ သွေးသွင်းကုသမှု ဆောင်ရွက်ပေးနေသည့် ဆေးရုံများတွင် အခြေခံလိုအပ်ချက်ဖြစ်သော ဆေးပစ္စည်း၊သွေးလှူဒါန်းရာတွင် အသုံးပြုသည့်ပစ္စည်းများနှင့်သိုလှောင်ရသည့် စက်ပစ္စည်းများကို ပြည့်ဝစွာထောက်ပံ့ပေးထားပြီးဖြစ်သည်။
ထိုသို့ ထောက်ပံ့ပေးထားသော်လည်း စဉ်ဆက် မပြတ်လှူဒါန်းပေးသည့် စေတနာသွေးလှူရှင်များ ၏ လှူဒါန်းကူညီမှုမရှိခဲ့ပါက လူနာများအတွက် စိတ်ပူပန်မှုနှင့်ငွေကြေးကုန်ကျမှုများရှိမည့်အပြင် အမှန်တကယ်အန္တရာယ်ကင်းသည့် သွေးနှင့်သွေးပစ္စည်းများဖြင့် ကုသမှုခံယူခွင့်ရရှိနိုင်မည်မဟုတ်ကြောင်း ပြည်ထောင်စုဝန်ကြီးဒေါက်တာသက်ခိုင်ဝင်းကပြောကြားခဲ့သည်။
“ကိုဗစ်ရောဂါကူးစက်ခံရမှုအန္တရာယ်ကိုဂရုမစိုက်ဘဲ ဝေဒနာရှင်လူနာတွေအတွက် အမျိုးသားသွေးဌာနကို လာရောက်လှူဒါန်းပေးခဲ့သူ ၂၀၂၀ ပြည့်နှစ်ကနေ ၂၀၂၂ ခုနှစ်အထိ သွေးလှူရှင် ၁၁၂၄၉၇ ဦးရှိခဲ့ပါတယ်”ဟု ပြည်ထောင်စုဝန်ကြီးဒေါက်တာသက်ခိုင်ဝင်းကပြောသည်။
ယင်းသို့ လှူဒါန်းမှုများကြောင့် အမျိုးသားသွေးဌာနမှ ရန်ကုန်မြို့ပေါ်ရှိ ပြည်သူ့ဆေးရုံများနှင့်ပုဂ္ဂလိကဆေးရုံများအပါအဝင် ဆေးရုံစုစုပေါင်း ၃၆ ရုံအတွက် လုံလောက်စွာထောက်ပံ့နိုင်ခဲ့ပြီး သွေးသွင်းကုသရန်လိုအပ်သည့်လူနာများ ကပ်ရောဂါကာလအတွင်း အပူအပင်မရှိကုသမှုခံယူနိုင်ခဲ့ကြောင်း သိရသည်။
အခမ်းအနားတွင် ပြည်ထောင်စုဝန်ကြီးဒေါက်တာသက်ခိုင်ဝင်း၊ရန်ကုန်တိုင်းဝန်ကြီးချုပ်နှင့်တာဝန် ရှိသူများက လူမှုထူးချွန်တံဆိပ်(ပထမအဆင့်)ရရှိသည့် သွေးလှူရှင် ၃၀ ဦး၊ အကြိမ် ၁၂၀ နှင့်အထက်သွေးလှူရှင် ၃၅ ဦး၊အကြိမ် ၁၀၀ နှင့်အထက်သွေးလှူရှင် ၁၀ ဦး(စုစုပေါင်း ၇၅ ဦး)တို့အား ဂုဏ်ပြုတံဆိပ်၊ဂုဏ်ပြုမှတ်တမ်းလွှာနှင့်ဂုဏ်ပြုဆုငွေများ ပေးအပ်ခဲ့ကြသည်။
ထို့အတူ သွေးလှူရှင် ၅၅၁ ဦးကိုလည်း ကျန်းမာရေးဝန်ကြီးဌာနမှချီးမြှင့်သည့် ဂုဏ်ပြုတံဆိပ်နှင့် ဂုဏ်ပြုမှတ်တမ်းလွှာများပေးအပ်ခဲ့ကြသည်။
Photo Credit-မြို့တော်သတင်း
