လမ်းပန်းဆက်သွယ်ရေးခက်ခဲသည့် တိုင်းရင်းသားဒေသများဖြစ်သော ချင်းပြည်နယ်အပါအဝင် အခြားတိုင်းဒေသကြီးနှင့်ပြည်နယ်များသို့ ဝေဠုကျော်ဖောင်ဒေးရှင်းက ယခုနှစ်အတွက်အနွေးထည်နှင့် အဝတ်အထည်အသစ်စုစုပေါင်း နှစ်သောင်းကျော်ကိုပေးပို့လှူဒါန်းလျက်ရှိကြောင်း ယင်းဖောင်ဒေးရှင်းအဖွဲ့တာဝန်ခံ မညိုမီသိန်းက ပေါ်ပြူလားနယူးစ် သို့ ပြောသည်။
ဝေဠုကျော်ဖောင်ဒေးရှင်းအနေဖြင့် နှစ်စဉ် ဆောင်းရာသီသို့ရောက်ရှိတိုင်း ဝေးလံခေါင်သီသော တိုင်းရင်းသားဒေသများရှိ ကလေးငယ်များအပါအဝင် သက်ကြီးရွယ်အိုများအတွက် လှူဒါန်းပေးပို့လျက်ရှိသည်ဟု ဆိုသည်။
” ကျွန်မတို့ ရန်ကုန်တိုင်းကလွဲလို့ အခြားဝေးလံတဲ့အရပ်ဒေသက ကလေးငယ်တွေအတွက်ရော သက်ကြီးရွယ်အိုတွေအတွက်ပါ အနွေးထည်အသစ် အဝတ်အစားအသစ်တွေကိုပေးပို့လှူဒါန်းတာရှိသလို ကိုယ်တိုင်လည်းသွားလှူပေးတာမျိူတွေရှိပါတယ်။ ဒီနှစ်ဆို ချင်းပြည်နယ်က ပလက်ဝ အရှိုချင်းလူမျိုးနဲ့ တစ်ဖက်မှာ ဆလုံလူမျိုးစုတွေအတွက်ပါ လှူဒါန်းပေးနေတာပါ။ ပြော
ရရင်တော့ ရခိုင်၊ ချင်း၊ ကရင်၊ ဧရာဝတီတိုင်း၊ တနင်္သာရီတိုင်း အစုံကို လှူဒါန်ပေးနေပါတယ်”ဟု ဒေါ်ညိုမီသိန်းကဆိုသည်။
ပြီးခဲ့သော ဇန်နဝါရီလ ၇ ရက်နေ့တွင်လည်း ချင်းပြည်နယ်တောင်ပိုင်း၊ပလက်ဝမြို့နယ်၊ဆမီးမြို့ရှိ ရွာများသို့ ဒုတိယအကြိမ် အနွေးထည်နှင့် အဝတ်အထည်အသစ် (၁၁၂၀) ထည်ကိုလည်း ဒေသခံပရဟိတအဖွဲ့တစ်ခုမှတဆင့် ပေးပို့လှူဒါန်းခဲ့ကြောင်း သိရသည်။
ယင်းဒေသသည် ရခိုင်ပြည်နယ်နှင့်ဆက်စပ်လျက်ရှိပြီး တိုက်ပွဲဒဏ်ခံရသော မြို့ရွာများဖြစ်သည့်အတွက် တိုက်ပွဲရှောင်စခန်းများလည်းရှိကြောင်း ဆိုသည်။
ထို့အပြင် ၂၀၂၂ခုနှစ် ဒီဇင်ဘာလအတွင်း၌လည်း ချင်းပြည်နယ် ၊မင်းတပ်မြို့ ၊ ကျေးရွာများသို့လည်းကောင်း၊ ကရင်ပြည်နယ် ၊လိပ်သိုမြို့ရှိ တောင်ပေါ်ရွာအချို့အား လည်းကောင်း အသီးသီးလှူဒါန်းခဲ့ကြကြောင်း ယင်းဖောင်ဒေးရှင်ထံမှ သိရသည်။
လက်ရှိတွင် ဧရာဝတီတိုင်းဒေသကြီးအတွက် အနွေးထည်ပေါင်း ၃၀၀၀၊ ကချင်ပြည်နယ် ၁၁၀၀ ၊စစ်ကိုင်းတိုင်းဒေသကြီး (နာဂဒေသ) ၃၀၀၀၊ စစ်ကိုင်းတိုင်းဒေသကြီး (ကလေး) ၁၇၀၀၊ မကွေးတိုင်းဒေသကြီး ၂၀၀၀၊ ချင်းပြည်နယ် ၁၄၀၀ ၊ရခိုင် ပြည်နယ်၂၀၀၀၊ ကရင်ပြည်နယ် ၁၅၀၀နှင့် ရှမ်းပြည်နယ် ၁၅၀၀ တို့ကိုပေးပို့လှူဒါန်းခဲ့ကြောင်း သိရသည်။
