နေပြည်တော် ဥတ္တရသီရိမြို့နယ်တွင် ပျောက်ဆုံးနေသည့် အမျိုးသမီးငယ်တစ်ဦး (၉) ရက်ကြာအထိ သတင်းအစအနပင်မရသေးသည့်အတွက် မိသားစုဝင်များအနေဖြင့် စိုးရိမ်ပူပန်နေရကြောင်း သိရသည်။
ဥတ္တရသီရိမြို့နယ် ၊ မြတ်လေးလမ်းတွင် နေထိုင်သည့် အသက် (၁၉) နှစ်အရွယ်ရှိ မဇူးဇင်ထိုက်(ခ) ဇူးဇူး သည် ပြီးခဲ့သည့် ဇန်နဝါရီလ (၁) ရက် ညပိုင်းတွင် နေအိမ်မှ ရုတ်တရက် ပျောက်ဆုံးသွားခြင်း ဖြစ်ပြီး လက်ရှိအချိန်ထိ သတင်းအစအနပင် မရသေးကြောင်း အစ်ကိုဖြစ်သူက ပေါ်ပြူလာနယူး (စ်) သို့ ပြောသည်။
” ဒီနေ့အထိ နေပြည်တော်ထဲမှာက ထူးခြားဖြစ်စဉ်ကို မရှိသေးဘူးဗျ။ ကျွန်တော်တို့လည်း ဖြစ်ဖြစ်ချင်းကတည်းက တိုင်ချက်လည်းဖွင့်ထားတယ်။ CCTV တွေ ကြည့်ခွင့်ရဖို့လည်း နေပြည်တော်ကောင်စီကို စာတင်ထားတယ်ဗျ။ ရဲကလည်း သီရိ (၅) မြို့နယ်ရော ၊ မြို့ဟောင်း (၃) မြို့နယ်ရော (၈) မြို့နယ်လုံးကို ဖြန့်ထားတယ်။ ဒါပေမဲ့ ဒီနေ့အထိ ဘာထူးခြားမှုမှ မရှိသေးဘူး” ဟု အစ်ကိုဖြစ်သူ ကိုအောင်သူဟိန်းက ပြောသည်။
ပျောက်ဆုံးနေသူ မဇူးဇင်ထိုက်(ခ) ဇူးဇူး သည် (၁) ရက်နေ့ ညပိုင်းက မိသားစုနှင့် အတူအိပ်ယာဝင်ခဲ့ရာမှ ပျောက်ဆုံးသွားခြင်း ဖြစ်ပြီး ၎င်းပျောက်ဆုံးနေသည်ကို နံနက်အစောပိုင်းတွင် မိခင်ဖြစ်သူမှ စတင် သတိထားမိခဲ့ခြင်းဖြစ်ကြောင်း သိရသည်။
ယင်းသို့ သိရှိရသည့်အတွက် ဥတ္တရသီရိမြို့နယ်အတွင်း လူအင်အားသုံးကာ လိုက်လံရှာဖွေခဲ့ရာ ဟိုတယ်ဇုန်အတွင်း ရွှေဂုံတိုင်ဟိုတယ်အနီးရှိ လမ်းဘေးတွင် ပျောက်ဆုံးသူ မဇူးဇင်ထိုက်(ခ)ဇူးဇူး၏ စက်ဘီးအား သော့ခတ်လျက် တွေ့ရှိရကြောင်း သိရသည်။
” အဲဒီဟိုတယ်နဲ့ အနီးဆုံးနေရာမှာတွေ့တော့ ကျွန်တော်တို့ ဟိုတယ်ကို သွားပြီး စုံစမ်းလိုက်တော့ ညီလေး တစ်ယောက်ပဲ ထွက်ပြောတယ်ဗျ။ သူပြောတာက (၁၁) ခွဲ ဝန်းကျင်လောက်ကို ကောင်မလေးတစ်ယောက် စက်ဘီးလေးစီးပြီးလာတယ်ပေါ့။ ဦးထုပ်လေးလည်းဆောင်းလာတယ်ပေါ့။ ညီမလေး ညမှာဝတ်သွားတဲ့ အဝတ်အစားပုံစံမျိုး သူက ပြောပြတယ်ဗျ။ လာမေးတယ်ပေါ့နော် ၊ ဂိတ်တဲမှာ အိပ်လို့ရမရပေါ့။ ဂိတ်က လုံခြုံရေးတွေကလည်း ပြဿနာရှိမှာစိုးလို့ မရဘူးပေါ့နော် ။ အခန်းယူမလားလိုတော့ မေးတယ် ။သူမှာက အခန်းယူနိုင်တဲ့ ပုံစံလည်း မဟုတ်ဘူးပေါ့နော်။ အဲဒါနဲ့ လက်မခံလိုက်တော့ စက်ဘီးလေးကို ပြန်တွန်းသွားတာတဲ့ လမ်းမဖက်ကိုပဲတဲ့ ။ ကျွန်တော်တို့လည်း CCTV ကြည့်ဖို့အကူအညီတောင်းကြည့်လိုက်တော့ သူလာပြောတဲ့ နေရာမှာက CCTV က မရှိထားဘူးဗျ” ဟု ကိုအောင်သူဟိန်းက အခင်းဖြစ်စဉ်ကို ရှင်းပြသည်။
ပျောက်ဆုံးနေသည့် မဇူးဇင်ထိုက်(ခ)ဇူးဇူး သည် အသက်အားဖြင့် (၁၉) နှစ်အရွယ်ဖြစ်သော်လည်း ၎င်း၏ ဉာဏ်ရည်မှာချို့ယွင်းချက်ရှိသည့်အပြင် စိတ်မူမမှန်သည့် အခြေအနေမျိုးလည်း ရှိနေကြောင်း သိရသည်။
လက်ရှိတွင် မဇူးဇင်ထိုက်(ခ) ဇူးဇူး ပျောက်ဆုံးနေသည်မှာ (၉) ရက်ဝန်းကျင် ကြာမြင့်နေပြီဖြစ်ပြီး သတင်းအစအနပင် မရသေးသည့် အတွက် နေပြည်တော် ဧရိယာအတွင်း၌ မရှိတော့ဘဲ လူကုန်ကူးမှုခံရခြင်း ၊ မကောင်းသည့်နေရာတွင် ရောင်းစားခြင်း ခံရမည်ကို စိုးရိမ်နေကြောင်းလည်း အစ်ကိုက ဆိုသည်။
မဇူးဇင်ထိုက်(ခ)ဇူးဇူး ပျောက်ဆုံးပြီးနောက်ပိုင်း လူမှုကွ န်ရက်မှတဆင့် အကူညီတောင်းခံခြင်းများ ဝိုင်းဝန်းလုပ် ဆောင်ထားပြီး တွေ့ရှိပါက ဆက်သွယ်အကြောင်း ကြားကြရန် အကူညီတောင်း ခံထားသည့်အတွက် ဆက်သွယ်အကြောင်းကြားမှုများ ရှိသော်လည်း ပျောက်ဆုံးနေသည့် မဇူးဇင်ထိုက် မဟုတ်ဘဲ အခြားသူများသာ ဖြစ်နေကာ မဇူးဇင်ထိုက် (ခ)ဇူးဇူး၏ သတင်းမှာ စုံစမ်း၍ မရသေးကြောင်း သိရသည်။
ယင်းကဲ့သို့ သတင်းအစအနပင် မရသေးသည့်အတွက် မဇူးဇင်ထိုက်(ခ) ဇူးဇူး အား အကြောင်းအမျိုးမျိုးဖြင့် တွေ့ရှိ၊ ထိန်းသိမ်း ၊ စောင့်ရှောက်ထားပါက အစ်ကိုဖြစ်သူ ကိုအောင်သူဟိန်းထံ ဆက်သွယ်ရန် ဖုန်းနံပါတ် 09420713059 သို့ ဆက်သွယ် အကြောင်းကြားပေးကြရန်လည်း လူမှုကွန်ရက်မှတဆင့် အကူညီတောင်းခံထားသည်။
