ကမ္ဘာတစ်ဝန်း ကိုဗစ်ကြောင့် ပိတ်ထားတဲ့ နယ်စပ်ဂိတ်တွေ ပြန်ဖွင့်လာတဲ့အတွက် ခရီးသွား ဝါသနာပါသူတွေလည်း ပြည်ပနိုင်ငံများကို သွားရောက်လည်ပတ်ကြဖို့ စိတ်အားထက်သန်လာပါတယ်။
ဒါကြောင့် ကမ္ဘာတစ်ဝန်းက ခရီးသွားချစ်သူတွေအတွက် ဟန်လေ ပတ်စပို့ အညွှန်းက သူရဲ့ သုံးလတစ်ကြိမ် ထုတ်ပြန်လေ့ရှိတဲ့ နိုင်ငံရပ်ခြား ခရီးထွက်ဖို့ အကောင်းဆုံး ပတ်စပို့များ စာရင်းကို ထုတ်ပြန်လိုက်ပါတယ်။
ဟန်လေ ပတ်စပို့ အညွှန်း ဆိုတာက ကမ္ဘာ့နိုင်ငံတွေရဲ့ ဗီဇာ မလိုဘဲ ပတ်စပို့ဖြင့်သာ ဝင်ရောက်နိုင်တဲ့ နိုင်ငံအရေအတွက်အပေါ် စာရင်းကောက်ယူပြီး တရားဝင်အဆင့် သတ်မှတ်ပေးတာ ဖြစ်ပါတယ်။
ဟန်လေကပေးတဲ့ ခရီးထွက်ဖို့ အကောင်းဆုံး ပတ်စပို့တွေရဲ့ ပထမနေရာကိုတော့ ဂျပန်နိုင်ငံရဲ့ ပတ်စပို့ကပဲ ငါးနှစ်ဆက်တိုက် ဆွတ်ခူးခဲ့ပါတယ်။ ဂျပန်ပတ်စပို့ကို ကိုင်ဆောင်ထားသူတွေဟာ နိုင်ငံပေါင်း ၁၉၃ နိုင်ငံကို ဗီဇာလွတ် ဒါမှမဟုတ် ဗီဇာဖြင့် ဝင်ရောက်နိုင်မှာဖြစ်ပါတယ်။
ဒုတိယနေရာကိုလည်း အာရှနိုင်ငံတွေဖြစ်တဲ့ စင်ကာပူနဲ့ တောင်ကိုရီးယားက ၁၉၂ နိုင်ငံကို ဗီဇာလွတ် ဝင်ရောက်နိုင်ခြင်းဖြင့် ပူးတွဲရရှိခဲ့ပါတယ်။
ဂျာမနီနဲ့ စပိန်နိုင်ငံရဲ့ ပတ်စပို့တွေက ၁၉၀ နိုင်ငံဖြင့် တတိယနေရာ၊ အီတလီ၊ ဖင်လန်နဲ့ လူဇင်ဘတ်တို့က ၁၈၉ နိုင်ငံဖြင့် စတုတ္ထနေရာနဲ့ ဆွီဒင်၊ ဩစတြီးယား၊ ဒိန်းမတ်နဲ့ နယ်သာလန်တို့က ၁၈၈ နိုင်ငံဖြင့် ပဥ္စမနေရာမှာ ရပ်တည်နိုင်ခဲ့ပါတယ်။
ပြင်သစ်၊ အိုင်ယာလန်နဲ့ ဗြိတိန်ကလည်း ၁၈၇ နိုင်ငံဖြင့် ဆဌမနေရာမှာကို ရရှိထားပါတယ်။
အမေရိကန်၊ ဘယ်လ်ဂျီယံ၊ နော်ဝေး၊ ဆွစ်ဇာလန်၊ နယူးဇီလန်နဲ့ ချက်နိုင်ငံတို့က သတ္တမနေရာ၊ ဩစတြေးလျ၊ ဂရိ၊ ကနေဒါနဲ့ မော်လတာတို့က အဌမနေရာ၊ ပိုလန်နဲ့ ဟန်ဂေရီက နဝမနေရာ၊ လစ်သူယေးနီးယားနဲ့ ဆလိုဗက်ကီးယားနိုင်ငံတို့က ၁၈၃ နိုင်ငံဖြင့် ဒသမနေရာ စသည်ဖြင့် တစ်နိုင်ငံစီ လျော့၍ ရရှိခဲ့ပါတယ်။
မြန်မာနိုင်ငံရဲ့ ပတ်စပို့ကတော့ ၄၇ နိုင်ငံဖြင့် အဆင့် ၉၆ နေရာမှာ ရပ်တည်ခဲ့ပါတယ်။
Source: WION
