ရန်ကုန်တိုင်း၊မှော်ဘီမြို့နယ်၊လိပ်ပုတ်ကျေးရွာ အုပ်စု၊အမှတ်(၄)လမ်းမကြီးပေါ်ရှိ Grand Royal အရက်ချက်စက်ရုံ၌ ဇန်နဝါရီ ၁၃ ရက်နေ့လည်ပိုင်းမှစတင်၍ လောင်ကျွမ်းခဲ့သည့် မီးလောင်မှုဖြစ်စဥ်အား နာရီပေါင်းများစွာငြှိမ်းသတ်ခဲ့ပြီးနောက် ဇန်နဝါရီ ၁၄ ရက်(ယနေ့)နံနက် ၇ နာရီတွင် မီးငြိမ်းသွားခဲ့သည်ဟု သိရသည်။
Grand Royal အရက်ချက်စက်ရုံမီးလောင်မှုအား သန္ဓေမီးသတ်တပ်ဖွဲ့ဝင်များ၊အရန်မီးသတ်တပ် ဖွဲ့ဝင်များ(စုစုပေါင်း ၅၅၀ ဦး)၊ရန်ကုန်တိုင်းအတွင်းရှိ လူမှုကူညီရေးအသင်းအဖွဲ့များ၊ကြက်ခြေ နီအသင်းဝင်များက ၁၅ နာရီခွဲကြာ ဝိုင်းဝန်းငြှိမ်းသတ်ခဲ့ရကြောင်း သိရသည်။
မီးလောင်မှုဖြစ်စဥ်သည် ဇန်နဝါရီ ၁၃ ရက်နေ့လည် ၃ နာရီ ၂၉ မိနစ်၌ စတင်ဖြစ်ပွားခဲ့ခြင်းဖြစ်ပြီး နေ့လည် ၃ နာရီ ၄၁ မိနစ်တွင် Level 3 အဆင့်ဖြင့် ငြှိမ်းသတ်ခဲ့ကြသဖြင့် ည ၈ နာရီ ၃၇ မိနစ်တွင် မီးထိန်းနိုင်ခဲ့ပြီး ဇန်နဝါရီ ၁၄ ရက်နံနက် ၇ နာရီ၌ မီးငြိမ်းသွားခဲ့သည်သဖြင့် စုစုပေါင်းမီးငြှိမ်းသတ်ချိန် ၁၅ နာရီခွဲကြာမြင့်ခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်၏ ထုတ်ပြန်ချက်အရ သိရသည်။
မီးလောင်မှုတွင် စက်ရုံရှိ RF 96% အရက်ဆီဂါ လန် (၅၀၀၀၀)ဆံ့ Tank (၃)လုံး၊ RF 50% အရက်ဆီလီတာ (၂၀၀၀၀)ဆံ့ Tank (၆)လုံးနှင့်ဂိုဒေါင် (၃)လုံးမီးလောင်ကျွမ်းလျက်ရှိပြီး မီးလောင်ကျွမ်းမှုအား မီးသတ်တပ်ဖွဲ့ဝင်များက ငြှိမ်းသတ်စဉ် ညနေ ၅ နာရီခွဲတွင် စက်ရုံအတွင်းမှပေါက်ကွဲမှုဖြစ်ပွားခဲ့သည်ဟု နစက ကထုတ်ပြန်ခဲ့သည်။
ထို့ပြင် မီးလောင်မှုအား ဝိုင်းဝန်းငြှိမ်းသတ်ပေးခဲ့ကြသည့် မီးသတ်တပ်ဖွဲ့ဝင်များနှင့်လူမှုကူညီရေးအသင်းဝင်အများအပြားတွင် အရေပြားအပူလောင်သည့် ထိခိုက်ဒဏ်ရာများ ရရှိခဲ့ကြသဖြင့် ရန်ကုန်ပြည်သူ့ဆေးရုံကြီးနှင့်အင်းစိန်ပြည်သူ့ဆေးရုံကြီးတို့၌ ဆေးကုသမှုခံယူလျက်ရှိကြောင်း သိရသည်။
“မီးလောင်တဲ့အချိန်ပေါက်ကွဲတာပါဖြစ်တော့ ပိုဆိုးတာပေါ့ ညကမီးထိန်းနိုင်ပြီးတာတောင် အပြီးတိုင်မီးငြိမ်းသွားဖို့ကိုတော်တော်ကြိုးစားခဲ့ရတယ် ပျက်စီးမှုကတော့အများကြီးပဲ ၂၀၂၃ ခုနှစ်ရဲ့ နှစ်စမှာအကြီးဆုံးမီးလောင်မှုပဲ လူနာတင်ကားတွေ မီးသတ်ကားတွေအများကြီးပဲ ကျွန်နော်ဆိုရင် အခုအသံသိပ်မထွက်နိုင်ဘူး မီးခိုးတွေကရှူမိတယ် မီးအပူဒဏ်ပြင်းတော့ လည်ပင်းတွေနာနေတယ်”ဟု ဝိုင်းဝန်းငြှိမ်းသတ်ပေးခဲ့သည့် လူမှုကူညီရေးအသင်းဝင်တစ်ဦးကပြောသည်။
မီးလောင်မှုဖြစ်ပွားရသည့်အကြောင်းရင်းနှင့်ပျက်စီးဆုံးရှုံးမှုတန်ဖိုးအား မီးသတ်တပ်ဖွဲ့တာဝန် ရှိသူများက စစ်ဆေးတွက်ချက်လျက်ရှိကြောင်း သိရသည်။
