ဇန်နဝါရီ လဆန်းပိုင်းမှ စတင်ကာ ဆက်တိုက်နီးပါး မြင့်တက်လာသည့် ပြည်တွင်း ရွှေဈေးနှုန်းမှာ ယနေ့ ဇန်နဝါရီ (၁၆)ရက်တွင် အနည်းငယ်ပြန်လည်ကျဆင်းလာခဲ့သည်။
ပြည်တွင်း ရွှေဈေးကွက်တွင် ယနေ့ နံနက်ပိုင်း ဈေးကွက်ဖွင့်ချိန်၌ အခေါက်ရွှေ (၁)ကျပ်သားလျှင် ၂,၈၄၀,၀၀၀ ဝန်းကျင် ဈေးဖွင့် အရောင်းအဝယ် ပြုလုပ်ကြပြီး ယမန်နေ့ ဈေးနှုန်းနှင့် နှိုင်းယှဉ်ပါက ကျပ် ၁၀,၀၀၀ ဝန်းကျင် ပြန်လည် ကျဆင်းခဲ့ခြင်း ဖြစ်သည်။
ဇန်နဝါရီ လဆန်းပိုင်းက စတင်ကာ အတက်ဖက်သို့ ဦးတည်လာသည့် ရွှေဈေးနှုန်းမှာ ပြီးခဲ့သည့် တစ်ပတ် ဈေးကွက်ပိတ်ချိန်တွင် တစ်ကျပ်သား ၂,၈၇၀,၀၀၀ကျပ်ဝန်းကျင်အထိ ဈေးရောက်ခဲ့ပြီး တဖြေးဖြေးပြန်လည် ကျဆင်းလာခြင်းလည်း ဖြစ်သည်။
” ဒီနေ့တော့ နည်းနည်း ပြန်ကျပါတယ် ။ ၁၀,၀၀၀ ဝန်းကျင်ပေါ့။ အစိုးရရဲ့ ထိန်းကြောင်းမှုလည်းပါတယ် ။ ဝယ်လိုအား ရောင်းလိုအားနဲ့လည်း ဆိုင်တာပေါ့ ” ဟု ရန်ကုန်မြို့ရှိ ရွှေလုပ်ငန်းလုပ်ကိုင်သူ တစ်ဦးက ပြောသည်။
ယခုလအတွင်း ကမ္ဘာ့ရွှေဈေးနှုန်း မတည်ငြိမ်မှုကြောင့် ပြည်တွင်း ရွှေဈေးကွက်တွင်ပါ ဈေးနှုန်းမတည်မငြိမ် ဖြစ်ပေါ်စေခဲ့ပြီး ကောလာဟလနှင့် ဈေးကစားမှုများသည်လည်း ရွှေဈေးနှုန်းကို မတည်ငြိမ်စေသည့် အကြောင်းအရင်း တစ်ခုအဖြစ်ရှိနေကြောင်း ရွှေလုပ်ငန်းရှင်အချို့က သုံးသပ်ကြသည်။
ယနေ့ ဇန်နဝါရီ (၁၆) ရက် ညနေပိုင်း ရန်ကုန်တိုင်း ရွှေအသင်း၏ ရည်ညွှန်းဈေးနှုန်းမှာ အကယ်ဒမီ အခေါက်ရွှေတစ်ကျပ်သားလျှင် ၂,၂၅၇,၃၀၀ကျပ်ဖြစ်ပြီး ကမ္ဘာ့ရွှေဈေးနှုန်းမှာ တစ်အောင်စလျှင် အမေရိကန်ဒေါ်လာ ၁၉၁၆ ဒေါ်လာ ဖြစ်ကြောင်း သိရသည်။
ရန်ကုန် ၊ မန္တလေး အပါအဝင် ပြည်နယ်နှင့် တိုင်းအချို့မှ ရွှေလုပ်ငန်းရှင်အသင်းများအနေဖြင့် ပြည်တွင်းဈေးကွက်တွင် အခေါက်ရွှေ တစ်ကျပ်သားလျှင် ၂၇ သိန်းအောက် ရောင်းချရန် မေတ္တာရပ်ခံထားပြီး ၂၇ သိန်း အထက် ရောင်းချသည့် ရွှေဆိုင်များကို လုပ်ငန်းလိုင်စင် ပိတ်သိမ်းကာ အမည်ပျက်စာရင်း ကြော်ငြာသည်အထိ အရေးယူမည်ဟုလည်း ပြောဆိုထားသည်။
စျေးကွက်အတွင်းအမြင့်စျေးဖြင့်ဝယ်ထားမိသည့် သူများမှလည်း စျေးနှုန်ဆွဲတင်ရန်အတွက် ညှိနှိုင်းဝယ်ယူခြင်းများလည်းရှိနေကြောင်း ရွှေအရောင်းအဝယ်လုပ်ကိုင်နေသူများထံမှကြားနေရသည်များလည်းရှိသည်။
