မူဆယ် ၁၀၅ မိုင်မှ တရုတ်ဖက်သို့ ကုန်ပစ္စည်း တင်ပို့မည့် ကုန်တင်ယာဉ်များ ခေါက်တို ရှန်တိန်စနစ်(အစားထိုးယာဉ်မောင်း) ဖြေလျှော့မှုများပြုလုပ်ခဲ့သည့်အတွက် ကုန်ပစ္စည်းတင်ပို့သူများ ကုန်ကျစရိတ်သက်သာလာကြောင်း မူဆယ်နယ်စပ် ကုန်သည်များထံမှ သိရသည်။
ယခင်က ကိုဗစ်ကန့်သတ်ချက်များနှင့်အညီ တားမြစ်ချက်များကြောင့် မြန်မာဖက်ခြမ်းမှ ကုန်ပစ္စည်း တင်ပို့မည့်သူများအနေဖြင့် ခေါက်တိုအစားထိုး ယာဉ်မောင်းများ ငှားရမ်းပြီး မောင်းနှင်နေရသည့်အတွက် ကုန်ကျစရိတ်များပြားခဲ့ကြောင်း သိရသည်။
ယခုတွင် အဆိုပါ မူဆယ် ၁၀၅ မိုင်ရှိ ဝန်တိမ် – ကျင်စန်းကျော့ နယ်စပ်လမ်းကြောင်းတွင် ရှန်တိန် စနစ် (၃) ဆင့်ကို ဖြေလျှော့ ပေးလိုက်ပြီး တရုတ်ပြည်ဖက်သို့ ကူးသည့် လမ်းကြောင်းကိုသာ ရှန်တိန်စနစ်မောင်းနှင် ရကြောင်းသိရသည်။
” ဟုတ်ပါတယ် ။ နှင်းနှင်းခိုင်ကွင်း ကနေပြီးတော့ ရွှေလယ်အင်အထိ ရှန်တိန် စနစ် ဖြေလျှော့ ပေးလိုက်တဲ့အတွက် ကိုယ့်ကားကိုယ်မောင်းဝင်လို့ ရပါပြီ။ ရွှေလယ်အင်ရောက်ခါမှ ကွင်းထဲကို ဝင်ဖို့ ရှန်တိန် တစ်ဆင့်ပဲ ကျန်ပါတော့တယ် ” မူဆယ် ၁၀၅ မိုင်မှ ကုန်သည်တစ်ဦးက ပြောသည်။
ယခင်က ရွှေမိုင်းယုကွင်းမှ မူဆယ် ကုန်သွယ်ရေးဇုန်အထိ တဆင့်၊ ကုန်သွယ်ရေးဇုန်မှ နှင်းနှင်းခိုင်ကွင်းအထိတဆင့်၊ နှင်းနှင်းခိုင်ကွင်းမှ ရွှေလီရေးဗားကွင်းသို့ တဆင့်၊ ရွှေလီရေးဗားကွင်းမှ ကျင်စန်းကျော့ လွယ်အင်ရွာအထိ ရှန်တိန်တဆင့်နဲ့ လွယ်အင်ရွာကနေ ရွှေလွယ်အင်ကွင်းအထိ နောက်ရှန်တိန် (၁) ဆင့် စသဖြင့် အဆင့်ဆင့်ရှိပြီး ကုန်ကျစရိတ်အနေဖြင့် ၁ သိန်းခွဲဝန်းကျင် ကုန်ကျကြောင်း သိရသည်။
လက်ရှိတွင် အဆိုပါ ရှန်တိန်စနစ်ကို ဇန်နဝါရီလ (၁၅) ရက် နံနက်ပိုင်းမှ စတင်ကာ ဖြေလျှော့ပေးလိုက်ခြင်း ဖြစ်ပြီး ကုန်သည်များအတွက် အဆင်ပြေကြောင်းလည်း မူဆယ်နယ်စပ် ကုန်သည်များက ပြောသည်။
” အခုတော့ ကိုယ့်ကားကိုယ်မောင်း ဝင်လို့ ရပြီဆိုတော့ အဆင်ပြေတာပေါ့။ တရုတ်ကို ငှားရတာက အဆင်မပြေဘူးလေ။ ပျက်တာစီးတာကလည်း ရှိသေးတယ် ။ ဘယ်သူမှတော့ ကိုယ့်ကားကိုယ်မောင်းသလောက် မကောင်းကြဘူးလေ” ဟု မူဆယ် ၁၀၅ မိုင်မှ နယ်စပ်ကုန်သည်တစ်ဦးက ပြောသည်။
လက်ရှိတွင် မြန်မာနိုင်ငံမှ ဆန်၊ ဆန်ကွဲ၊ ပဲ၊ ပြောင်း၊ နှမ်း၊ ဖရဲ၊ သခွား စသည့် လယ်ယာထွက် ကုန်ပစ္စည်းများ၊ ရော်ဘာ၊ ကြက်သွန်၊ ရေထွက်ပစ္စည်း၊ ငရုတ်သီး အစရှိသည့် ကုန်ပစ္စည်းများကို တရုတ်ပြည်သို့ တင်ပို့နေပြီး တရုတ်နိုင်ငံဘက်မှ ဆောက်လုပ်ရေးပစ္စည်း၊ လျှပ်စစ်ပစ္စည်း၊ စက်ပစ္စည်း၊ စားကုန်သောက်ကုန်နှင့် ဆေးဝါးများ ပြန်လည်တင်သွင်းလျက်ရှိကြောင်း သိရသည်။
အဆိုပါ တရုတ် – မြန်မာ နယ်စပ် ဝန်တိန် – ကျင်စန်းကျော့ လမ်းကြောင်းတွင် တစ်ရက်လျှင် ကားအစီးရေ ၁၅ဝ မှ ၁၆ဝ ကြား ပုံမှန်ဝင်ထွက်လျက်ရှိကြောင်း သိရသည်။
