ထိုင်းနိုင်ငံ ဆီတင်သင်္ဘောပေါက်ကွဲမှုတွင်သေဆုံးခဲ့သည့် မြန်မာနိုင်ငံသားများ၏ မိသားစုဝင်များအား မြန်မာသံရုံးက ဘတ် ၅၀၀၀ စီထောက်ပံ့ပေး

ထိုင်းနိုင်ငံ၊စမုဆွန်ခါခရိုင်၊စမုဆွန်ခရာမြို့ရှိ မဲခေါင်ဆိပ်ကမ်း၌ပြုပြင်ရန် ဆိုက်ကပ်ထားသည့် ဆီတင်သင်္ဘောသည် ဇန်နဝါရီ ၁၇ ရက်နံနက် ၁၀ နာရီခန့်က ပေါက်ကွဲမှုဖြစ်ပွားခဲ့သည်ဟု ထိုင်းနိုင်ငံဆိုင်ရာ မြန်မာသံရုံး၊ဗန်ကောက်မြို့မှ သိရသည်။

ဆီတင်သင်္ဘော Smoosh Sea C22 အား အလုပ်သမား ၃၀ ဦးခန့်က ဆီပိုက်လိုင်းများကို ဂဟေဆော်စဉ် ပိုက်လိုင်းများအတွင်းရှိ ဆီလက်ကျန်များမှတစ်ဆင့် ပေါက်ကွဲမှုဖြစ်ပွားခဲ့ခြင်းဖြစ်သည်ဟု မြန်မာသံရုံးမှ သိရသည်။

အဆိုပါ ပေါက်ကွဲမှုဖြစ်စဥ်တွင် မြန်မာအလုပ်သမားများပျောက်ဆုံးနေကြောင်း သတင်းအရ ဇန်နဝါရီ ၁၈ ရက်(ယနေ့)နံနက် ၉ နာရီခွဲတွင် မြန်မာသံရုံးမှတာဝန်ရှိသူများက သွားရောက်ကြည့်ရှုခဲ့ကြသည်။

ဖြစ်စဥ်၌ ပျောက်ဆုံးသူများရှိနေသဖြင့် ထိုင်းနိုင်ငံတာဝန်ရှိသူများနှင့်လူမှုကူညီရေးအသင်းများ ရှာဖွေကယ်ဆယ်ရေးလုပ်ငန်းများပြုလုပ်ခဲ့ရာ အခင်းဖြစ်သည့်နေ့၌ သေဆုံးနေသည့် မြန်မာနိုင်ငံသား ၁ ဦး၏ ရုပ်အလောင်းအား ရှာဖွေတွေ့ရှိခဲ့ရပြီး ဇန်နဝါရီ ၁၈ ရက်(ယနေ့)နံနက်ပိုင်းတွင်လည်း သေဆုံးနေသည့် မြန်မာနိုင်ငံသား ၆ ဦးနှင့်ထိုင်းနိုင်ငံသား ၁ ဦးတို့၏ ရုပ်အလောင်းများအား ထပ်မံရှာဖွေတွေ့ရှိခဲ့ရသည်ဟု မြန်မာသံရုံးမှ သိရသည်။

ထို့ကြောင့် မြန်မာသံရုံး၊ဗန်ကောက်မြို့ သံအမတ်ဦးသန်းထွေးမှ သေဆုံးသူများ၏ မိသားစုဝင်များကို သွားရောက်တွေ့ဆုံ၍ အလုပ်သမားများ၏ အာမခံကြေးများ၊ဆုကြေးများ၊နစ်နာကြေးများအား မိသားစုဝင်များအမြန်ဆုံးရရှိရန် ထိုင်းနိုင်ငံအလုပ်သမားဝန်ကြီးဌာန၊အလုပ်ရှင်များနှင့်ညှိနှိုင်းဆောင်ရွက်သွားမည်ဖြစ်ကြောင်း ပြောကြားခဲ့သည်။

ထို့ပြင် မြန်မာသံရုံးမှ သေဆုံးသူများ၏ မိသားစုဝင်များအား ထိုင်းဘတ်ငွေ ၅၀၀၀ စီထောက်ပံ့ပေးခဲ့ပြီး ထိခိုက်ဒဏ်ရာရရှိခဲ့သည့် မြန်မာနိုင်ငံသား ၂ ဦးအတွက် လိုအပ်သည့်ကူညီထောက်ပံ့မှုများ ပြုလုပ်ပေးသွားမည်ဟု သိရသည်။