ကုန်းလမ်းပို့ဆောင်ရေးညွှန်ကြားမှုဦးစီးဌာနမှ မော်တော်ယာဥ်ဖောင်းကြွနံပါတ်ပြားအသစ်များ ပြောင်းလဲတပ်ဆင်ရန်နှင့်ပတ်သက်၍ အသိပေးနှိုးဆော်ခဲ့ခြင်းဖြစ်သည်။
မော်တော်ယာဥ်များအားလုံး ဖောင်းကြွနံပါတ်ပြားပုံစံအသစ်ပြောင်းလဲတပ်ဆင်ခြင်းကို ရာနှုန်းပြည့်ပြီးစီးရန် နိုင်ငံပိုင်ဌာနဆိုင်ရာယာဉ်များ၊ အဝေးပြေးခရီးသည်တင်ယာဉ်များ၊မြို့တွင်းခရီးသည်တင်ယာဉ်လိုင်းများ၊ Taxi ယာဉ်များ၊ကုန်တင်ယာဉ်များအား မတ် ၃၁ ရက်အပြီး ပြောင်းလဲတပ်ဆင်ရမည်ဟု အသိပေးခဲ့သည်။
ထိုသို့ ပြောင်းလဲတပ်ဆင်ခြင်းအား သက်ဆိုင်ရာကုန်းလမ်းပို့ဆောင်ရေးညွှန်ကြားမှုဦးစီးဌာနရုံးများနှင့်ဆက်သွယ်၍ ဖောင်းကြွနံပါတ်ပြားအသစ်များပြောင်းလဲတပ်ဆင်ရမည်ဟု နှိုးဆော်ထား သည်။
ထို့ပြင် ပုဂ္ဂလိကမော်တော်ယာဉ်ပိုင်ရှင်များအနေဖြင့်လည်း နှစ်လဲသက်တမ်းတိုးချိန်၊သက်တမ်းတိုးချိန်မတိုင်မီတို့တွင် သက်ဆိုင်ရာ ကုန်းလမ်းပို့ဆောင်ရေးညွှန်ကြားမှုဦးစီးဌာနရုံးများနှင့်ဆက်သွယ်၍ ဖောင်းကြွနံပါတ်ပြားအသစ်များကို အမြန်ပြောင်းလဲတပ်ဆင်ရန်လည်း အသိပေးနှိုးဆော်ထားသည်။
ကုန်းလမ်းပို့ဆောင်ရေးညွှန်ကြားမှုဦးစီးဌာနမှ မော်တော်ယာဉ်ဖောင်းကြွနံပါတ်ပြားတွင် မြို့နယ်ကိုယ်စားပြုဂဏန်းဖော်ပြချက်နှင့်မော်တော်ယာဉ်အမျိုးအမည်ဖော်ပြချက်တို့ကို ထပ်တိုးထည့်သွင်းရိုက်နှိပ်၍ မော်တော်ယာဉ်ဖောင်းကြွ နံပါတ်ပြားပုံစံအသစ်အား ၂၀၂၁ ခုနှစ်၊ဇူလိုင် ၁ ရက်မှစတင်၍ ပြောင်းလဲတပ်ဆင်ပေးလျက်ရှိသည်
လက်ရှိအချိန်တွင်လည်း ကနဦးမှတ်ပုံတင်ယာဉ်များ၊နယ်ဝင်/အမည်ပြောင်း/လိပ်စာပြောင်း/အင်ဂျင်ပြောင်း/ဆေးရောင်ပြောင်း/မော်တော်ယာဉ်မှတ်ပုံတင်စာအုပ်ပျောက်/မော်တော်ယာဉ်မှတ် ပုံတင်သက်သေခံလက်မှတ်ပျောက်ယာဉ်များနှင့် နှစ်လဲသက်တမ်းတိုးယာဉ်များအား ဖောင်းကြွနံပါတ်ပြားအသစ်များကို ပြောင်းလဲတပ်ဆင်ပေးလျက်ရှိသည်။
