ကျန်းမာရေးဝန်ကြီးဌာနမှ ဇန်နဝါရီ ၁၉ ရက်(ယနေ့)ည ၁၂ နာရီမှစတင်သက်ရောက်မည့် မြန်မာ -ထိုင်း နယ်စပ်ဝင်/ထွက်ဂိတ်များမှတဆင့် မြန်မာနိုင်ငံသို့ ဝင်ရောက်မည့်သူများလိုက်နာရမည့် ပြည်သူ့ကျန်းမာရေးဆိုင်ရာ သတ်မှတ်ချက်များထုတ်ပြန်ရာ၌ ထည့်သွင်းထုတ်ပြန်ခဲ့ခြင်းဖြစ် သည်။
မြန်မာ-ထိုင်း နယ်စပ်ဝင်ထွက်ဂိတ်များမှ ဝင်ရောက်မည့် ခရီးသွားများသည် ကျန်းမာရေးဝန် ကြီးဌာနမှ အသိအမှတ်ပြုထားသည့် ကိုဗစ်(၁၉) ရောဂါကာကွယ်ဆေးများအနက် တစ်မျိုးမျိုးအား မြန်မာနိုင်ငံမဝင်မီ ၁၄ ရက်ကျော်က အကြိမ်ပြည့်ထိုးနှံပြီးကြောင်း သက်သေခံလက်မှတ်ပါရှိရမည်ဖြစ်ကာ ယင်း သတ်မှတ်ချက်အား အသက် (၁၂)နှစ်အောက်ကလေးများကင်းလွတ်ခွင့်ရမည်ဖြစ်သည်။
ထို့ပြင် ကိုဗစ်(၁၉)ရောဂါကာကွယ်ဆေးအကြိမ်ပြည့်ထိုးနှံရခြင်းမရှိသေးသူများသည် မြန်မာနိုင်ငံသို့မဝင်ရောက်မီ ၄၈ နာရီအတွင်း ကိုဗစ်(၁၉) ရောဂါကင်းရှင်းကြောင်း RT-PCR နည်းဖြင့်စစ်ဆေးထုတ်ပေးထားသည့် ဓာတ်ခွဲအဖြေပါရှိရမည်ဖြစ်သည်။
ယင်း စာရွက်စာတမ်း/အထောက်အထားများ၏ မိတ္တူတစ်စုံစီကို မြန်မာ-ထိုင်း နယ်စပ်ဝင်ထွက်ဂိတ်ရှိ ကျန်းမာရေးအရာရှိများထံ ပြသရမည်ဖြစ်သည်။
ခရီးသွားများသည် ကျန်းမာရေးကြေညာချက် (Health Declaration Form)အား မြန်မာနိုင်ငံရောက်ချိန်၌ မြန်မာ-ထိုင်း နယ်စပ်ဝင်ထွက်ဂိတ်ရှိ ကျန်းမာရေးအရာရှိများထံ တင်ပြရမည်ဖြစ်ပြီး မှန်ကန်စွာဖြည့်စွက်ထားခြင်းမရှိပါက ဥပဒေအရအရေးယူခံရမည်ဖြစ်သည်။
ထို့အတူ နယ်စပ်ဝင်/ထွက်ဂိတ်၌ ကိုယ်အပူချိန်တိုင်းခြင်းနှင့်လိုအပ်သည့် ကျန်းမာရေးစစ်ဆေးခြင်းတို့ကိုခံယူရမည်ဖြစ်ကာ ကုန်ကျစရိတ်အဖြစ် တစ်ဦးလျင် မြန်မာငွေ ၁၅၀၀၀ ကျပ်အား မိမိအစီအစဥ်ဖြင့် ကျခံရမည်ဖြစ်ကာ နှစ်နိုင်ငံ နေ့ချင်းပြန်သွားရောက်သူများအနေဖြင့် RDT ဖြင့်စစ်ဆေးခြင်းအား ကင်းလွတ်ခွင့်ရမည်ဖြစ်သည်။
ထို့ပြင် RDT ဖြင့်စစ်ဆေးပြီး၍ ၁ နာရီအတွင်း ဓာတ်ခွဲအဖြေအရ ကိုဗစ်(၁၉)ရောဂါပိုးမတွေ့ရှိရပါက ခရီးစဥ်အတိုင်း ဆက်လက်သွားရောက်နိုင်ကြောင်း သိရသည်။
RDT နည်းဖြင့်စစ်ဆေးစဥ် ကိုယ်အပူချိန်မြင့်ခြင်း၊ကိုဗစ်(၁၉)ရောဂါလက္ခဏာများတွေ့ပါက ချက် ချင်းသီးခြားထားရှိ၍ သတ်မှတ်ထားသည့် ဆေး ရုံ(သို့)ကုသရေးစင်တာ(သို့)ဟိုတယ်သို့ လွှဲပြောင်းပို့ဆောင်ကာ ကုသမှုခံယူရမည်ဖြစ်ပြီး မြန်မာနိုင်ငံ၌နေထိုင်စဉ် ကိုဗစ်(၁၉)ရောဂါလက္ခဏာများပေါ်ပေါက်လာပါက ရောက်ရှိရာဒေသရှိ ကျန်းမာရေးဌာနသို့ သတင်းပေးပို့ရမည်ဖြစ်သည်။
မြန်မာနိုင်ငံမှ ပြန်လည်ထွက်ခွာခြင်းမပြုမီ ထိုင်းနိုင်ငံ၏လိုအပ်ချက်အရ ကိုဗစ်(၁၉)ရောဂါ ဓာတ်ခွဲစစ်ဆေးမှုပြုလုပ်လိုပါက ကျန်းမာရေးဝန်ကြီးဌာနမှ အသိအမှတ်ပြုထားသည့် ဓာတ်ခွဲခန်းများတွင် မိမိစရိတ်ဖြင့်ဆောင်ရွက်နိုင်သည်ဟု အသိပေးထုတ်ပြန်ခဲ့သည်။
နိုင်ငံခြားသားခရီးသွားများသည် အသွားအလာကန့်သတ်ခြင်း၊ဓာတ်ခွဲစစ်ဆေးမှုနှင့်ဆေးကုသမှု ကုန်ကျစရိတ်များအားကျခံရမည်ဖြစ်ကာ သံတမန်များ၊ကုလသမဂ္ဂအဖွဲ့အစည်းတွင် တာဝန်ထမ်းဆောင်သည့် နိုင်ငံတကာဝန်ထမ်းများနှင့်မိသားစုဝင်များအား Home Quarantine ခွင့်ပြုပေးမည်ဖြစ်သည်။
ထို့ပြင် ခရီးသွားများသည် မြန်မာ-ထိုင်းနယ်စပ်ဝင်ထွက်ဂိတ်တာဝန်ရှိသူများနှင့်သက်ဆိုင်ရာ ကျန်းမာရေးဌာန၏ ညွှန်ကြားချက်များကို တိကျ စွာလိုက်နာရမည်ဖြစ်ပြီး ပျက်ကွက်ပါကဥပဒေအရအရေးယူခံရမည်ဖြစ်သည်။
မြန်မာနိုင်ငံသို့ နိုင်ငံတော်အဆင့်လာရောက်သည့် နိုင်ငံတော်အဆင့် ဧည့်သည်တော်များ(သို့)နိုင်ငံခြားကိုယ်စားလှယ်တော်များသည် ဆိုက်ရောက်မည့် နေ့ရက်မတိုင်မီ အလုပ်လုပ်ရက် အနည်းဆုံး ၅ ရက်ကြိုတင်၍ ကိုဗစ်(၁၉)ရောဂါ ကာကွယ်၊ထိန်းချုပ်ကုသရေးဗဟိုကော်မတီ၊နိုင်ငံခြားရေးဝန်ကြီးဌာနနှင့်ကျန်းမာရေးဝန်ကြီးဌာနတို့သို့တင်ပြ၍ သတ်မှတ်ချက်များမှ ကင်းလွတ်ခွင့်တောင်းခံနိုင်သည်ဟု ကျန်းမာရေးဝန်ကြီးဌာနက အသိပေးထုတ်ပြန်ခဲ့သည်။
