တရုတ်နိုင်ငံအစိုးရမှ မြန်မာနိုင်ငံသို့ ပံ့ပိုးကူညီသည့် အကြိမ်ရေ (Doses) ၃ သန်းအသုံးပြုနိုင်မည့် ကိုဗစ်-၁၉ ရောဂါကာကွယ်ဆေးများ ထပ်မံလွှဲပြောင်းပေးအပ်ခြင်းအခမ်းအနားကို ဇန်နဝါရီလ ၁၉ ရက်နေ့တွင် ရန်ကုန်အပြည်ပြည်ဆိုင်ရာလေဆိပ်၌ ကျင်းပခဲ့သည်။
တရုတ်နိုင်ငံဘက်မှ ကိုဗစ်-၁၉ ရောဂါကာကွယ်ဆေးများ ထပ်မံပံ့ပိုးပေးရန် မြန်မာနိုင်ငံဘက်က တောင်းဆိုလာသည့်အတွက် တရုတ်ဘက်မှ လှူဒါန်းပေးရန် ချက်ချင်းတုံ့ပြန်ခဲ့ပြီး လေကြောင်းခရီးစဉ်အကျပ်အတည်းကို ကျော်လွှားကာ ကာကွယ်ဆေးများကို အမြန်ဆုံးပို့ဆောင်ပေးခဲ့ကြောင်း၊ ထို့ပြင် ကိုဗစ်-၁၉ ရောဂါ ဒယ်လ်တာမျိုးကွဲ ကူးစက်ပြန့်ပွားချိန်တွင်လည်း တရုတ်နိုင်ငံက မြန်မာနိုင်ငံအတွက် အောက်ဆီဂျင်အရည် စသည့် အရေးပါသော ကပ်ရောဂါကာကွယ်ကုသရေးပစ္စည်းများ ပို့ဆောင်နိုင်ရန် အထူးလမ်းကြောင်းများ ဖွင့်လှစ်ပေးခဲ့ပြီး မြန်မာနိုင်ငံသို့ အောက်ဆီဂျင်စက် စသည့်ပစ္စည်းများ အရေးပေါ် ပံ့ပိုးပေးခဲ့ကြောင်း၊ မြန်မာနိုင်ငံတွင် ကိုဗစ်-၁၉ ကာကွယ်ဆေးကို ကိုယ်တိုင်ပုလင်းသွင်းဖြည့်တင်းခြင်း (Fill-Finish) ကာကွယ်ဆေးထုတ်လုပ်နိုင်ရန်အတွက်လည်း ကူညီပေးခဲ့ပြီး မြန်မာနိုင်ငံ၏ ကပ်ရောဂါတိုက်ဖျက်ရေးလုပ်ငန်းများအတွက် စဉ်ဆက်မပြတ် ကူညီပံ့ပိုးပေးလျက်ရှိကြောင်း၊ တရုတ်နိုင်ငံ၏အကူအညီဖြင့် မြန်မာနိုင်ငံ ကူးစက်ရောဂါ ထိန်းချုပ်ရေးဗဟိုဌာနနှင့် ကျန်းမာရေးဝန်ထမ်းများ လေ့ကျင့်ရေးဌာနကိုလည်း တည်ငြိမ်စွာ တွန်းအားပေး ဖော်ဆောင်လျက်ရှိကြောင်း၊ ဤလုပ်ငန်းများသည် လက်တွေ့ကျသောလုပ်ဆောင်မှုများဖြင့် တရုတ်-မြန်မာအေးအတူပူအမျှအသိုက်အဝန်း အတူတကွတည်ဆောက်ရေး စိတ်ဓာတ်ကို ကျင့်သုံးနေခြင်းဖြစ်ကြောင်း မြန်မာနိုင်ငံဆိုင်ရာတရုတ်သံအမတ်ကြီး Mr. Chen Hai က ပြောသည်။
တရုတ်နိုင်ငံသည် မြန်မာနိုင်ငံသို့ ကာကွယ်ဆေး အကြိမ်ရေ ၆၁ သန်းခန့် ပံ့ပိုးပေးခဲ့ကြောင်း၊ ယခုအကြိမ် ပံ့ပိုးပေးသော ကာကွယ်ဆေး ၃ သန်းကို ကျောင်းနေအရွယ်ကလေးငယ်များနှင့် နာတာရှည် ရောဂါခံစားနေရသော သက်ကြီးရွယ်အိုများအတွက် ထပ်ဆောင်းကာကွယ်ဆေး (booster) အဖြစ် ထိုးနှံပေးမည်ဖြစ်ကြောင်း၊ တရုတ်နိုင်ငံ၏ အကူအညီဖြင့် တည်ဆောက်သည့် မြန်မာနိုင်ငံ ကူးစက်ရောဂါ ထိန်းချုပ်ရေးဗဟိုဌာနနှင့် ကျန်းမာရေးဝန်ထမ်းများ လေ့ကျင့်ရေးဌာနကို ၂၀၂၃ ခုနှစ်ကုန်ပိုင်းတွင် တည်ဆောက်ပြီးစီးရန် စီစဉ်ထားကြောင်း၊ တရုတ်နိုင်ငံ၏ ပံ့ပိုးကူညီမှုများအတွက် မြန်မာနိုင်ငံမှ ကျေးဇူးတင်ရှိကြောင်း မြန်မာနိုင်ငံ ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းက ပြောသည်။
မြန်မာနိုင်ငံတွင် တရုတ်နိုင်ငံမှ ကိုဗစ်-၁၉ ကာကွယ် ဆေးများကို အဓိကထိုးနှံထားပြီး လတ်တလောကာလတွင် ကူးစက်မှုနှုန်း အလွန်နည်းပါးလာကာ သေဆုံးမှုနှုန်း မရှိသလောက်ဖြစ်လာကြောင်း၊ တရုတ်ကာကွယ်ဆေးများသည် ပြင်းထန်သောရောဂါ ဖြစ်ပွားနှုန်းနှင့် သေဆုံးမှုနှုန်း လျှော့ချရာတွင် ကောင်းမွန်သော အကျိုးသက်ရောက်မှုရှိသည်ကို ယင်းက သက်သေပြနေကြောင်း၊ လက်ရှိတွင် တရုတ်နိုင်ငံပြည်တွင်း၌ ကိုဗစ်-၁၉ ကူးစက်မှုနှုန်းသည် အထွတ်အထိပ်ကာလကို ကျော်လွန်ခဲ့ပြီး ကပ်ရောဂါ၏ အကျိုးသက်ရောက်မှုကို ထိန်းချုပ်နိုင်ပြီ ဖြစ်ကြောင်း၊ ယင်းသည် တရုတ်နိုင်ငံအစိုးရ၏ ထိမိတိကျသော၊ သိပ္ပံနည်းကျသော၊ ထိရောက်သော ကုသရေးနှင့် ကာကွယ်ရေးလုပ်ငန်းများ၏ အကျိုးရလဒ်ပင် ဖြစ်ကြောင်းကိုလည်း ပြည်ထောင်စု၀န်ကြီးကပြောကြားခဲ့သည်။
