တိုင်းရင်းသားလူမျိုးများရေးရာဝန်ကြီးဌာန၊ပြည်ထောင်စုဝန်ကြီးဦးစောထွန်းအောင်မြင့်က ထိုင်းနိုင်ငံတွင်ပြုလုပ်သည့် တိုင်းရင်းသားရေးရာမူဝါဒနှင့်ယဉ်ကျေးမှုဖလှယ်ရေးဆွေးနွေးပွဲတွင် မိန့်ခွန်းပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
မဲခေါင်-လန်ချန်း ပူးပေါင်းဆောင်ရွက်မှုအထူးရန်ပုံငွေ(၂၀၂၀)ဖြင့် တိုင်းရင်းသားရေးရာ ယဉ်ကျေးမှုဖလှယ်ရေးအစီအစဉ်အရ တိုင်းရင်းသားရေးရာ မူဝါဒနှင့်ယဉ်ကျေးမှုဖလှယ်ရေးဆွေးနွေးပွဲဖွင့်ပွဲအခမ်းအနားအား ဇန်နဝါရီ ၁၉ ရက်နံနက်ပိုင်းက ထိုင်းနိုင်ငံ၊ဗန်ကောက်မြို့ရှိ Ambassador Hotel တွင်ပြုလုပ်ခဲ့သည်။
မဲခေါင်-လန်ချန်းပူးပေါင်းဆောင်ရွက်မှု(၂၀၂၁) တွင် မြန်မာနိုင်ငံ၊ ရှမ်းပြည်နယ်၊ တောင်ကြီးမြို့၌ “တိုင်းရင်းသားရေးရာနှင့်သက်မွေးပညာသင်တန်းစင်တာ”အဆောက်အဦးကို အကောင်အထည်ဖော်ဆောင်ရွက်လျက်ရှိသည်ဟု ပြောသည်။
ယင်း အဆောက်အဦးအတွက် မြန်မာနိုင်ငံအစိုးရအနေဖြင့် အထူးအလေးထားကာ လိုအပ်ချက်များကို ဖြည့်ဆည်းပေးလျက်ရှိပြီး တည်ဆောက်ပြီးစီးပါက မဲခေါင်နိုင်ငံများကြား အသက်မွေးဝမ်းကျောင်းနည်းပညာများဖလှယ်ရေးဆောင်ရွက်နိုင်ရန် ထိုင်းနိုင်ငံ၊ လူမှုဘဝလုံခြုံရေးနှင့်ဖွံ့ ဖြိုးတိုးတက်ရေးဝန်ကြီးဌာနနှင့်ဆက်လက် ပူးပေါင်းဆောင်ရွက်သွားလိုသည်ဟု ပြောသည်။
ထို့အတူ ထိုင်းနိုင်ငံ၊ လူမှုဘဝလုံခြုံရေးနှင့်ဖွံ့ဖြိုးတိုးတက်ရေးဝန်ကြီးဌာန၊ အကြီးအကဲ Mr.Anan Dontree က ကြိုဆိုနှုတ်ခွန်းဆက်စကားနှင့်ထိုင်းနိုင်ငံ၊ နိုင်ငံခြားရေးဝန်ကြီးဌာန ဒု-အမြဲတမ်းအတွင်းဝန် Ms. Phantipha Iamsudha Ekarohit က အမှာစကားပြောကြားခဲ့သည်။
ထို့နောက် တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန၊ ဒု-ညွှန်ကြားရေးမှူးချုပ်ဒေါ်နန်းလောင်ဟွမ်က မဲခေါင်-လန်ချန်း ပူးပေါင်းဆောင်ရွက်မှု စီမံချက်နှင့်ပတ်သက်၍ ရှင်းလင်းဆွေးနွေးခဲ့သည်။
ထို့အတူ မြန်မာနိုင်ငံမှတက်ရောက်လာသည့် တာဝန်ရှိသူများနှင့်ထိုင်းနိုင်ငံမှတာဝန်ရှိသူများက သက်ဆိုင်ရာခေါင်းစဥ်အလိုက် ရှင်းလင်းဆွေးနွေးခဲ့ကြသည်။
ထို့နောက် မြန်မာ-ထိုင်း နှစ်နိုင်ငံတာဝန်ရှိသူများက အထွေထွေဆွေးနွေးပြီးနောက် တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီးဦးစောထွန်းအောင်မြင့်က ကျေးဇူးတင်စကားပြောကြားခဲ့ကြောင်း သိရသည်။
