AFC Women’s Futsal Asian Cup 2025 ခြေစစ်ပွဲဝင်မည့် မြန်မာ့လက်ရွေးစင်အသင်း ပဏာမ ကစားသမား ၁၇ ဦး စာရင်းကို မြန်မာနိုင်ငံဘောလုံးအဖွဲ့ချုပ်က ယမန်နေ့က အသိပေးထုတ်ပြန်ထား သည်။
ပြိုင်ပွဲအား ယခုလ ဇန်နဝါရီ ၁၅ မှ ၁၉ ရက်အထိ မြန်မာနိုင်ငံက အိမ်ရှင်အဖြစ်လက်ခံကျင်းပမည်ဖြစ်ပြီး၊ ကစားသမား ၂၁ ဦးကို စခန်းသွင်း လေ့ကျင့်မှုများ ပြုလုပ်ပြီးနောက် ပဏာမကစားသမား ၁၇ ဦး ရွေးချယ်လိုက်ခြင်းဖြစ်သည်။
ရွေးချယ်လိုက်သည့် ကစားသမားများစာရင်းတွင် ချောစန္ဒီအောင်(ဂိုး)၊ သရဖီအောင်(ဂိုး)၊ ယဉ်ယဉ်မိုးနိုင်(ဂိုး)၊ ယုမီမီလွင်၊ နန်းဆိုင်မိန်း၊ မေဇင်ဦး၊ ယမင်းသန့်ဇင်၊ ဆုဝါလွင် ၊ ဝတ်ရည်လွင်၊ ယမင်းလွင်၊ မေထက်ပိုင်၊ ဂျိုမိုးညီ၊ ဇင်ငြိမ်းချစ်၊ ဆက်နွယ်နီ၊ နှင်းစန္ဒာလှိုင်၊ သူဇာလှိုင်နှင့် အေးအေးထွေးတို့ကို ရွေးချယ်ခဲ့ကြောင်း သိရသည်။
ခြေစစ်ပွဲများကို အိမ်ရှင်နိုင်ငံများအဖြစ် မြန်မာ၊ ထိုင်း၊ အင်ဒိုနီးရှားနှင့် ဥဇဘက်ကစ္စတန်တို့တွင် ကျင်းပသွားမည်ဖြစ်ကာ ၁၉ သင်း ဝင်ရောက်ယှဉ်ပြိုင်မည်ဖြစ်ပြီး ၅ သင်း ၃ အုပ်စု၊ ၄သင်း ၁အုပ်စုခွဲ၍ ကျင်းပသွားမည်ဖြစ်ကြောင်း သိရသည်။
ပြိုင်ပွဲတွင် ခြေစစ်ပွဲ အုပ်စု ၄ ခုမှ ထိပ်ဆုံးရပ်တည်မှု ၂ သင်းစီ(၈သင်း)နှင့် အုပ်စု ၄ခုမှ အကောင်းဆုံး အုပ်စု တတိယရအသင်း စုစုပေါင်း ၉သင်း ခြေစစ်ပွဲ အောင်မြင်မည်ဖြစ်သည်။
၂၀၂၅ အာရှဖလား အမျိုးသမီး ဖူဆယ်ပြိုင်ပွဲကို အိမ်ရှင်အဖြစ် လက်ခံကျင်းပမည့် တရုတ်၊ ၂၀၁၈ ပြိုင်ပွဲ ချန်ပီယံ အီရန်နှင့် ဒုတိယရ ဂျပန်တို့မှာ တိုက်ရိုက်ဝင်ခွင့်ရခဲ့ပြီး ခြေစစ်ပွဲအောင် ၉ သင်း၊ စုစုပေါင်း အသင်း ၁၂ သင်းဖြင့် မေ ၇ မှ ၁၈ ရက်အထိ ကျင်းပသွားမည်ဖြစ် သည်။