Myanmar National League 2024-25 Week-14 ပွဲစဉ်အပြီး ရှမ်းယူနိုက်တက်အသင်းသည် အမှတ်ပေးဇယားရပ်တည်မှု ထိပ်ဆုံးတွင် ရပ်တည်နေကြောင်း မြန်မာနေရှင်နယ်ကော်မတီ၏ အသိပေးဖော်ပြချက်အရ သိရသည်။
ရှမ်းယူနိုက်တက်အသင်းအနေဖြင့် ရမှတ်(၄၀)ဖြင့် ရပ်တည်မှုအဆင့်(၁)၊ ရန်ကုန်ယူနိုက်တက်အနေဖြင့် ရမှတ်(၃၄) မှတ်ဖြင့် အဆင့်(၂)နှင့် ဟံသာဝတီယူနိုက်တက်မှာ ရမှတ် (၃၃)မှတ်ဖြင့် အဆင့်(၃)နေရာတို့တွင် အသီးသီး ရပ်တည်နေကြသည်။
ထို့အတူ ဒဂုံစတား ယူနိုက်တက်ရမှတ်(၂၉)မှတ်၊ ISPE ရမှတ်(၂၃)မှတ်၊ မဟာယူနိုက်တက် ရမှတ်(၁၉)မှတ်၊ ရတနာပုံယူနိုက်တက် ရမှတ်(၁၉)မှတ်၊ ဒဂုံပေါ့စ်ယူနိုက်တက် ရမှတ် (၁၂)မှတ်၊ သစ္စာအားမာန်ယူနိုက်တက် ရမှတ်(၁၁) မှတ်၊ ဧရာဝတီ ယူနိုက်တက် ရမှတ်(၁၁) မှတ်၊ မြဝတီယူနိုက်တက် ရမှတ်(၄)မှတ်၊ရခိုင်ယူနိုက်တက် ရမှတ်(၃)မှတ်ဖြင့် အဆင့်အလိုက် ရပ်တည်နေကြခြင်းဖြစ်သည်။
မြန်မာနေရှင်နယ်လိဂ် Week-15 ပွဲစဉ်များကို ယနေ့ ဇန်နဝါရီ (၁၀)ရက်တွင် ပြန်လည် ယှဉ်ပြိုင်ကစားကြမည်ဖြစ်ရာ ယနေ့တွင် အဆင့်ရပ်တည်မှု အောက်ဆုံးတွင်ရှိနေသည့် မြဝတီနှင့် ရခိုင်ယူနိုက်တက်အသင်း၊ အဆင့်ရပ်တည်မှုအဆင့် (၄)တွင်ရပ်တည်နေသည့် ဒဂုံးစတားယူနိုက်တက်အသင်းနှင့် အဆင့် (၈)တွင် ရပ်တည်နေသည့် ဒဂုံပေါ့စ် အသင်းတို့ ထိပ်တိုက်ရင်ဆိုင် ကြရမည်ဖြစ်သည်။
ရှမ်းယူနိုက်အသင်းအနေဖြင့် ဇန်နဝါရီ (၁၂)ရက်၌ သစ္စာအားမာန်အသင်းဖြင့် တောင်ကြီးမြို့တွင် ထိပ်တိုက်ရင်ဆိုင်သွားကြရမည်ဖြစ်ကြောင်း သိရသည်။
၂၀၂၄-၂၀၂၅ မြန်မာနေရှင်နယ်လိဂ် ဘောလုံးပြိုင်ပွဲကို နိုင်ငံတကာဘောလုံးပြက္ခဒိန်နှင့်အညီ ပထမဆုံးအကြိမ် ကျင်းပပြုလုပ်နေခြင်းဖြစ်ပြီး ပြိုင်ပွဲအား ဇူလိုင် (၆)ရက်မှစတင်ခဲ့ကာ ဘောလုံးကလပ်အသင်း (၁၂)သင်းပါဝင်ကစားနေကြခြင်းလည်းဖြစ်သည်။
ယခုနှစ် ကျင်းပနေသည့် မြန်မာနေရှင်နယ်လိဂ်ပြိုင်ပွဲသည် (၁၅)ကြိမ်မြောက် ရှိပြီဖြစ်ကာ ၂၀၂၄ ဇူလိုင်လ (၆) ရက်မှ ၂၀၂၅ ဖေဖော်ဝါရီလ (၁၆) ရက်ထိ (၈) လကြာ ကျင်းပပြု လုပ်သွားမည်ဖြစ်သည်။