မြန်မာနိုင်ငံကုန်သည်စက်မှုအသင်းချုပ်သည် ငလျင်ဒဏ်သင့်ဒေသများတွင် ပြန်လည်ထူထောင်ရေးလုပ်ငန်းများကို ထိရောက်စွာ ကူညီပံ့ပိုးပါဝင်ဆောင်ရွက်နိုင်ရန် UMFCCI Earthquake Relief and Rehabilitation Task Force ကို ဖွဲ့စည်းခဲ့ကြောင်း သိရသည်။
ကုန်သည်စက်မှုအသင်းချုပ် ညီနောင်နှင့် မိတ်ဖက်အသင်းများ၏ ပူးပေါင်းပါဝင်မှုဖြင့် ကူညီကယ်ဆယ်ရေးများ ပြုလုပ်လျက်ရှိရာမှ ပြန်လည်ထူထောင်ရေးလုပ်ငန်းများကို ထိရောက်စွာ ကူညီပံ့ပိုးပါဝင်ဆောင်ရွက်နိုင်ရန်အတွက် ဖွဲ့စည်းခဲ့ခြင်းဖြစ်ပြီး ထိခိုက်ပျက်စီး ဆုံးရှုံးမှု များပြားခဲ့ရသည့် ဒေသများ၌ ဒေသအခြေစိုက် အဖွဲ့အစည်းများသို့ ဆက်သွယ်၍ လိုအပ်သည့် အကူအညီပေးခြင်းကို တတ်စွမ်းသရွေ့ ဆောင်ရွက်နေပြီ ဖြစ်ကြောင်း အသိပေးထားသည်။
ကုန်သည်စက်မှုအသင်းချုပ်အနေဖြင့် မတ်လ ၂၉ ရက်မှစ၍ ကျပ် သိန်း ၂ဝ,ဝဝဝ မ တည်ကာ ငလျင်ဒဏ်သင့်ဒေသများသို့ ကူညီကယ်ဆယ်ရေးလုပ်ငန်းများ စတင်ဆောင်ရွက်ခဲ့ကြောင်းလည်း သိရသည်။
ထို့ပြင် ပူးပေါင်းပါဝင်ဆောင်ရွက်လိုသော ပြည်တွင်းပြည်ပ အဖွဲ့အစည်း များနှင့် လူပုဂ္ဂိုလ်တစ်ဦးချင်းအနေဖြင့် ကုန်သည်စက်မှုအသင်းချုပ်သို့ တိုက်ရိုက် ဆက်သွယ် နိုင်ကြောင်းနှင့် စီးပွားရေးလုပ်ငန်းရှင်များနှင့် စေတနာရှင်များ၏ ပူးပေါင်းပါဝင်မှုကို ကြိုဆိုကြောင်း ထုတ်ပြန်ထားသည်။
ပါဝင်လိုသူများအနေဖြင့် ကုန်သည်စက်မှုအသင်းချုပ်သို့ တိုက်ရိုက် ဆက်သွယ်နိုင်သည့် ဖုန်းနံပတ်များမှာ ပြည်သူ့ဆက်ဆံရေး ဌာန (PR) ၀၉၄၅၀၂၀၀၆၄၀၊ အသင်းသားရေးရာဌာန (MA) ၀၉၇၇၆၉၉၉၉၂၀/ ၀၉၇၇၆၉၉၉၉၄၀ကိုဆက်သွယ်နိုင်ကြောင်း သိရသည်။