ရန်ကုန်မြို့ရှိ အများပြည်သူ သယ်ယူပို့ဆောင်ရေးအတွက် အသုံးပြုနေသော YBS ယာဉ်လိုင်းများတွင် EV City Bus များကို ထည့်သွင်းပြေးဆွဲသွားရန် စီစဉ်နေကြောင်း YBS ယာဉ်လိုင်း အများပိုင်ကုမ္ပဏီတခုထံမှ သိရသည်။
EV city bus များပြေးဆွဲနိုင်ရန် သက်ဆိုင်ရာဝန်ကြီးဌာနကို ပြီးခဲ့သည့် စက်တင်ဘာလက စီမံချက် တင်ပြခဲ့ပြီး လိုအပ်သည့် အချက်အလက်များကို ထပ်မံတင်ပြနိုင်အောင် ဆောင်ရွက်နေကြောင်းလည်း သိရသည်။
“ဒီနှစ်ထဲတော့ မဖြစ်ပေမယ့် လာမယ့် ၂၀၂၅ ထဲမှာတော့ ကျိန်းသေကို အကောင်အထည်ပေါ်လာမှာပါ၊ ဒီလို EV City Bus တွေ ပြေးဆွဲဖို့က ရင်းနှီးမြှုပ်နှံမှု တန်ဖိုးတွေ၊ အခြေခံအဆောက်အအုံ၊ ရာသီဥတုအခြေအနေတွေ အစရှိတဲ့ ဖြစ်နိုင်စွမ်း အခြေအနေ အရပ်ရပ်အပေါ် သုံးသပ်ဆွေးနွေးပြီး အကောင်အထည်ဖော်ဖို့ စီစဉ်နေတာဖြစ်ပါတယ်”ဟု ပြည်တွင်း မီဒီယာတခုကိုလည်း ပြန်လည်ဖြေကြားထားသည်။
လက်ရှိတွင် အဝေးပြေးယာဉ်လိုင်းအချို့တွင်လည်း EV Bus များကို အသုံးပြုနေလျက်ရှိသလို ရန်ကုန်၊ မန္တလေး၊ နေပြည်တော် တို့တွင် EV Taxi များပြေးဆွဲမှုရှိနေခြင်း ဖြစ်သည်။
ရန်ကုန်မြို့တွင် နေ့စဉ် YBS ယာဉ်လိုင်းပေါင်း (၁၃၀) ကျော်မှ ယာဉ်စီးရေ (၃၅၀၀) ကျော်ဖြင့် ခရီးသည် ၁ ဒသမ ၄ သန်းကျော်ကို ပြေးဆွဲဝန်ဆောင်ပေးနေလျက်ရှိကြောင်း YRTC ၏ စာရင်းများအရ သိရသည်။