ယူကရိန်းအပစ်အခတ်ရပ်စဲရေးနှင့်ပတ်သက်၍ ရုရှား၏တုံ့ပြန်မှုကို ယခုပတ်အတွင်း ရရှိမည်ဟု ထရမ့်မျှော်လင့်

ယူကရိန်းပဋိပက္ခတွင် ဖြစ်နိုင်ခြေရှိသော အပစ်အခတ်ရပ်စဲရေးနှင့်ပတ်သက်၍ ရုရှား၏တုံ့ပြန်မှုကို ယခုပတ်အတွင်း အစောဆုံးရရှိမည်ဟု အိမ်ဖြူတော်ရှိ သတင်းထောက်များအား အမေရိကန်သမ္မတ ဒေါ်နယ်ထရမ့်ကပြောကြားခဲ့သည်။

“ကျွန်တော်တို့ကို ဒီအပတ်အတွင်း သူတို့ဆီကအကြောင်းပြန်မယ်၊ တကယ်တော့ အရမ်းမြန်မြန်ပါပဲ။ ကျွန်တော်တို့နီးစပ်နေပြီလို့ထင်တယ်၊ ဒါကို အမြန်ပဲသိရှိရမှာပါ” ဟု အမေရိကန်သမ္မတက ပြောကြားခဲ့သည်။

မတ်လ ၁၈ ရက်နေ့တွင် အမေရိကန်သမ္မတ ဒေါ်နယ်ထရမ့်က ပဋိပက္ခဖြစ်ပွားနေသောနိုင်ငံများအနေဖြင့် စွမ်းအင်အခြေခံအဆောက်အအုံများကို ၃၀ ရက်ကြာ ဗုံးကြဲတိုက်ခိုက်မှုမပြုရန် အဆိုပြုခဲ့သည်။ ရုရှားသမ္မတ ဗလာဒီမာပူတင်က သဘောတူညီပြီး ရုရှားစစ်တပ်အား သင့်လျော်သောအမိန့်ကို ချက်ချင်းပေးခဲ့သည်။ ဗလာဒီမာဇယ်လင်စကီးကလည်း နောက်ပိုင်းတွင် ယူကရိန်းနိုင်ငံအနေဖြင့် အဆိုပြုချက်ကို ထောက်ခံမည်ဟု ပြောကြားခဲ့သည်။

သို့သော် မတ်လ ၁၈ ရက်နေ့မှ ဧပြီလ ၁၆ ရက်နေ့အထိရက်များအတွင်း ယူကရိန်းတပ်ဖွဲ့များက ရုရှား၏စွမ်းအင်ဆိုင်ရာနေရာများကို ဒေသ ၁၅ ခုတွင် တိုက်ခိုက်ခဲ့သည်။ ၎င်းတို့မှာ ဘယ်ဂိုရိုဒ်၊ ဘရီယန်စ်၊ ဗိုရိုနီဇ်၊ ဇာပါရိုဇီ၊ ကာစ်၊ လီပက်စ်၊ ရိုစတော့ဗ်၊ ဆာရာတော့ဗ်၊ စမိုလန်စ်၊ တမ်ဘော့ဗ်၊ ခရက်စနိုဒါနှင့် ခေါ်ဆန်ဒေသများ၊ ခရိုင်းမီးယား၊ ဒိုနက်စ်နှင့် လူဂန်စ်ပြည်သူ့သမ္မတနိုင်ငံတို့ဖြစ်သည်။ ထိုတိုက်ခိုက်မှုများကို ဒရုန်းများနှင့် HIMARS အပါအဝင် အမျိုးမျိုးသောအမြောက်လက်နက်များဖြင့် ဆောင်ရွက်ခဲ့သည်။ ရုရှားအစိုးရ ပြောရေးဆိုခွင့်ရှိသူ ဒီမီထရီပက်စ‌ကော့ဗ်က ယူကရိန်းသည် အမှန်တကယ်အားဖြင့် ရုရှား၏စွမ်းအင်ကဏ္ဍကို တိုက်ခိုက်ရန် ကြိုးပမ်းမှုများ ဆက်လက်ရှိနေသေးကြောင်း၊ ယာယီအပစ်အခတ်ရပ်စဲရေးကို လိုက်နာခြင်းမရှိကြောင်း ပြောကြားခဲ့သည်။