ရန်ကုန်တိုင်းရှိ မြို့နယ် ၁၁ ခုနှင့်မြို့တွင်းမြို့နယ်များသို့ လှော်ကားရေလှောင်ကန်မှ ရေပေးဝေသည့် ၆၆ လက်မ ကွန်ကရိရေပိုက်ပေါက်နေ၍ ရန်ကုန်မြို့တော်စည်ပင်မှဝန်ထမ်းများက ပြန်လည်ပြင်ဆင်လျက်ရှိကြောင်း သိရသည်။
အဆိုပါ ရေပေးဝေသည့် ၆၆ လက်မ ကွန်ကရိရေပိုက်သည် ဇန်နဝါရီ ၂၀ ရက်ည ၈ နာရီခွဲက ပိုက်ပေါက်သွားခဲ့ခြင်းဖြစ်ကာ ပြန်လည်ပြင်ဆင်နေမှုများအား ရန်ကုန်မြို့တော်ဝန်ဦးဗိုလ်ဌေးမှ ယနေ့နံနက်ပိုင်းတွင် ကြည့်ရှုစစ်ဆေးခဲ့သည်။
ရေပိုက်ပေါက်ပြင်ဆင်မှုအား ယနေ့အပြီးပြုလုပ်လျက်ရှိပြီး ပြင်ဆင်မှုများပြီးစီးပါက ရေပြန်လွှတ် ပေးသွားမည်ဖြစ်ကာ ဇန်နဝါရီ ၂၃ ရက်(မနက် ဖြန်)တွင် မြို့နယ်များ၌ ရေပြန်လည်ရရှိနိုင်လောက်မည်ဖြစ် ကြောင်းသိရသည်။
ပြင်ဆင်နေသည့် ၆၆ လက်မ ကွန်ကရိရေပိုက်သည် လှော်ကားရေလှောင်ကန်မှတဆင့် မင်္ဂလာ ဒုံ၊ မရမ်းကုန်း၊ အင်းစိန်၊ လှိုင်၊ ကမာရွတ်၊ ကြည့်မြင်တိုင်၊ စမ်းချောင်း၊ ရန်ကင်း၊ တာမွေ၊ ဗဟန်း၊ မင်္ဂလာတောင်ညွန့်မြို့နယ်နှင့်မြို့တွင်းမြို့နယ်များသို့ ရေပေးဝေလျက်ရှိသည့် ရေပိုက်ဖြစ် ကြောင်း သိရသည်။
